Aizawl | October 10, 2020: Mizoram sawrkar chuan October 23-25 chhunga neih tur Baptist Church of Mizoram (BCM) Area Baptist Council Rorel Inkhawm-ah mo 120 tel a phalsak.
BCM Area Baptist Council rorel inkhawm (PCI-ah chuan Presbetery rorel ang) chu October 23-25 hian neih a ni dawn a. Kuminah hian hrileng avangin Inkhawmpui anga kalpui lovin Rorel Inkhawm leh Upa nemngheh inkhawm chauh neih tura ruahman a ni.
ABC rorelna hi sawrkarin inkaihhruaina a siam 'mi 50 chin' ah inkhung a harsat dawn avangin, BCM hruaituten Mizoram sawrkarah ngenna siamin, mi 120 chin ABC Rorel Inkhawmah hian kal khawm phalsak tur leh, Kohhran Upa nemnghehna (Ordination) inkhawm-a tel turte tan Pathianni a motor veivah khapna dan pawh thlahdul turin an ngen a. Mizoram State Disaster Management & Rehabilitation Authority chuan BCM hruaitute dilna hi ngaihtuahin a remtihsak a, October ni 7 khan ABC Rorel Inkhawmna-a mi 120 chin tel phalsakna leh Pathianni-a Upa nemngheh Inkhawmna-a tel turte lirtheia veivah phalsakna order hi Secretary, Disaster Management & Rehabilitation Department chuan a tichhuak a ni.
Kohhran hruaitute dilna Mizoram sawrkarin a phalsak avangin BCM General Secretary Rev F Ramdinmawia chuan Mizoram sawrkar chungah lawmthu a sawi.
Post a Comment
He post chungchanga i ngaihdan lo sawi ve rawh: