Mizoram hrek tumin Assam lamin kawng dang; Kolasib district-ah lirthei dang ve nghal

[Thu kallai a nih avangin, update reng a ni a. Copy emaw screenshot emaw mai lovin link hi i lo share ve dawn nia.]

Aizawl | October 28, 2020: Mizoram luhka pawimawh zinga mi silchar kawng chu vawiin chawhnu atang khan Lailapur-ah Assam lamin an dang chat a, Mizoram a lirthei luh an phal lo.

Hemi vanga lungawi lo hian zanin atang khan Vairengte Thalai Pawl leh a chhehvel khua thalaite ruahmanna-in Mizoram lamah pawh zanin atang khan kawng hi dan ve nghal a ni a, Mizoram atanga Assam pan turte an dang niin thudawnna chuan a tarlang.

Assam lam hian kawng an dan mai bakah Mizo driver te chu hmun hranah hrengin an dah hrang nia thu dawn a ni.

Mizo Students Union District Headquarters Kolasib secretary James Hmingthansanga chuan thuchhuah siamin, 'Mizoram lam aṭanga Assam lama lirthei chhuk thla te dang tura Vairengte Ṭhalai Pawlin ruahmanna an siam hi MSU District Hqrs. Kolasib chuan a thlawp tlat' tiin a sawi.

MSU thuchhuah chuan, "Vawiin ni 28. October, 2020 chawhnu dar 12 hnulama Cachar DC thupek anga Mizorama bungraw rawn phurlut tur lirthei te Lailapur ah dan an nih avang leh, Mizo driver te dahhran an nih avangin Mizoram lam aṭanga Assam lama lirthei chhuk thla te dang tura Vairengte Ṭhalai Pawlin ruahmanna an siam hi MSU District Hqrs. Kolasib chuan a thlawp tlat a." a ti a.

MSU district headquarters Kolasib chuan Kolasib district huamchhunga MSU dinna khua zawng zawng te chu zanin aṭangin Assam pana lirthei kalte hi mahni area theuh ah dan ve nghal turin a hriattir bawk a ni.

Thudawnna-in a tarlan danin, Hetia kawng dan a nih chhan hi Mizoram Police te Ramri atanga hnukkir tura nawrna vang a ni. Vawiin khan Zophai Muslim Biak in a Mizoram IR duty te sawnchhuah an duh avangin Zophai piahah Hailakandi lamin Mizoram a bungraw lut tur an dang a, Sahapui V a MZ IR duty te sawnchhuah an nih theih nan Lailapur-ah kawng an dang niin thudawn a ni bawk. 

Lailapur lamah hian inpuhtawnna a thleng a, Lalapur lam mi kan biak pawh theih te chuan Dholai OC in motor a dang, an ti a. Dholai OC in Lailapur lamin an dang, a ti ve thung.

Hetihlai hian Vawiin a Saihapui V tlawhtu Cachar DC chuan Saihapui V a MZ IR te chu lakchhuah an nih loh chuan Mizoram kawng dan a nih dawn thu a sawi a, Cachar DC te hi chawhnu dar 1:00 vel khan Saihapui atangin an haw a, hemi hnu lawk hian Lailapur-ah Mizoram a lut tur Motor dan a ni tan ta a ni. 

"Mizoram luhka pahnih dan a nih lai hian Phaisen bulah Dolchhora lamin an kawng danna chu an la ti chhelo niin thudawn a ni bawk. Anni hian Mizoram a an duh duh a ILP hmanga an luh ngiatin kawng an dang ve thung a ni." tiin ZMP Tlau chuan a post a ni.

Zanin kawng dang tur hian MSU Kolasib district thuchhuak angin, MSU Hqrs Vairengte, MSU Sub. Hqrs Bairabi, MSU Branch Meidum, Bilkhawthlir leh Pangbalkawn  te ho an che chhuak tawh  a ni.

Kolasib district -ah hian hmun hrang hrangah kawng hi dan a ni a. Vairengte, Bilkhawthlir leh Kawnpui-ah vawiin tlai lam atang khan an dang tan a, Bairabi-ah pawh Bairabi Thalai Tangrualin zanin dar 10 vel atang khan kawng an dang ve nghal a ni.