Mizoram Christian College Hawng

Aizawl | October 10, 2020: Mizoram Presbyterian Kohhran hnuaia Secular college - Mizoram Christian College (MCC) chu October 5 khan Synod Moderator Rev. R. Lalchangliana’n Pathian hnenah hlanin a hawng.

Hawnna inkhawm hi J.M.Lloyd Hall, Synod Office-ah neih a ni a, Rev. K. Lalrinmawia, Executive Secretary i/c MCC in programme kaihruaiin Bible chhiar leh tawngtaina hun a hmang a, Synod Secretary Rev. Vanlalrova Khiangte in inhmelhriattirna hun a hmang. Rev. Dr. Lalchungnunga, Principal, Mizoram Christian College-in Report leh thawktu tharte inhmelhriattirna hun a hmang leh a, Synod Moderator Rev. R. Lalchangliana’n College hawnna hun hmangin thuchah a sawi. Senior Executive Secretary Rev. Lianhmingthanga Sailo in College leh staff-te hlanna hun hmangin a tawngtai a, a duh apiang tan thusawina hun hman zawhah Executive Secretary Rev. B. Sangthanga’n malsawmnain programme a khar a ni.

College din a nih theih nan hian Synod-ah tum engemaw zat ngaihtuah a lo ni tawh thin a. Kum 1995 Synod-ah Hmarchhak Presbytery atangin ‘Secular College Synod-in din rawh se’ tih thu a lo lut tawh a. Kum 2001 Synod-ah a neih dan kawng zawn tha kan ti a, Synod Executive Committee (SEC)-in lo zir chiang se la, ruahmanna Synod-ah rawn thlen leh rawh se, tiin rel a ni ta a. SEC chuan a kawng ngaihtuahtu tur mi 10 ruatin an ruahmanna siam chu kum 2002 November-a SEC thutkhawmah an thlen a. SEC chuan ruahmanna te chu siamthat leh belh ngai an tih avangin 2002 Synod-ah thehluh a ni ta lo. Kum 2010 Synod-ah College din thu bawk hi Presbytery pathum - Aizawl West, Chhimphei leh Aizawl Bethel Presbytery te atangin rawtna a lut leh a. SEC in chak zawkin rawn umzui zel rawh se, tia thuthlukna siam a ni a, SEC erawh chuan ngun taka an ngaihtuah hnuin tun dinhmunah chuan kan tlin rih lo a ni a, tiin an rel ve leh thung a. College din thu chu dah that a ni leh ta rih a ni.

Kum 2017 Synod-ah Tanhril-a Kohhranin ram a lo neih tawh chu tinzawn deuhin Aizawl West I, Aizawl West II leh Champhai North Presbytery atangin College din rawtna a lut leh a. Hemi kum Synod chuan, ‘Secular College din chu tha kan ti a, a hmun tur thlan fel leh bawhzui ngaite bawh zui turin SEC kutah kan dah’ tiin rel a ni leh a. Heta tang hian College din thu hi chak takin a kal ta zel a ni. Kum 2018 February thlaa SEC thukhawm chuan ruahmanna siam tur Committee OM-in lo ruat rawh se, tiin an rel a. Kum 2018 November-a SEC thukhawm chuan Tanhril-a ram a lo neih sa bakah mimal ram lei belh ni se, chu chu College din nan hman ni se, tiin a rel ta a. College Governing Board pawh OM in a din zui nghal a, Board Secretary atan Rev. K. Lalrinmawia, Executive Secretary i/c Education chu ruat a ni. Class pawh 2020-2021 session atangin tan ni se tih a ni ta a. College hmun atana ram neih tak zau zawng chu 39,891,sq.m (4,29,228 sq.ft.) a ni. Governing Board lamin hma an la chhunzawm zelin September 11, 2019 khan Mizoram Sawrkarin College din phalna a pe ta a, Mizoram University (MZU) lamah pawh phalna dil zui a ni a, December 30, 2019 khan phalna a pe ve leh ta a ni. 

College hmun tur Tanhril ramah buatsaih a nih chhung hian class, office leh library te lo bun phawtna tur ngaihtuah a ni a, Synod-in Women’s Hostel sawn nan a lo lei tawh, Mission Vengthlanga mimal in sak sa la zawh fel chiah loh chu hman turin hmalak chhoh a ni a, harsatna engemaw avangin chawlhsan a ni leh ta rih a. Synod Higher Secondary School Campus-a an building hlui ruak chu chei thata hman phawt turin tih fel a ni leh ta a ni.
Mizoram Christian College-a thawk tur hian Principal atan Rev. Dr. Lalchungnunga, Minister pension chu Contract-in lak a ni a. Asst. Professor atan subject tinah mi 2 zel leh Librarian 1 lak tawh an ni bawk. Tin, Office Assistant 2 leh IV Grade 2 lak thar an ni bawk.  
Mizoram Chriatian College-ah hian subect pasariha bul tan a ni dawn a. Subject tinah seat 30 theuh lak tura tih a nih laiin Higher & Technical Education lam ngenna avangin English, Mizo, Political Science, Sociology, Public Administration bikah te chuan seat 40 ni tura tih pun a ni. July thla atang khan admission hawn tan a ni a, tun dinhmuna admission tih dan hetiang a ni :
English - 40 
Pol. Science - 40
Sociology  - 40
Public Administration - 40
Mizo - 25
BBA - 23
B.Com
 - 21
Total - 229 (Mipa 134 & Hmeichhia 95)

- MSR/News/Chanchinthar/Synod

Post a Comment

He post chungchanga i ngaihdan lo sawi ve rawh:

Previous Post Next Post