Mizo mipuite vau a kawng dan Mizo mipuite hmuhsitnaah MZP in ngai; ‘Ha aiah ha mit aiah mit’ tih a hun tawh - MZP

Aizawl | October 30, 2020: Ramri buaina kal zelah Assam ADGP in ramri humhalh tura duty mek IR te tham lo taka tawngkhum-in insaseng tura a tih bakah, Mizo mipuite min vau zuiin Mizorama ei leh bar lo luhna hrang hrang an dang chat leh ta mai hi MZP chuan a la thutakin, thinurthlak an ti hle a. Mizo mipuite hmuhsitnaah MZP chuan an ngai tih thuchhuah siamin an sawi.




MZP chuan thuchhuah siamin he thu hi an sawi a, "Mizoram sawrkar pawhin Assam kaltlang lova ei leh bar lakluhna kawng dang dap ve nghal turin an ngen a. Mizo mipuite pawh chiai mai lova sawrkar hmalakna ngaichang turin an ngen a ni."

Ramri chungchanga harsatna hrang hrang a thlen nawn tawh lohna turin a tawp thleng a bei ngam turin MZP chuan sorkar thuneitute leh hemi lama ngaihtuahna sengtute an ngen.

Covid-19 vanga kan buai mek laiin diklo taka kan ram min luah sak tuten kan awm hle hle lai min rawn tibuaiin, kan thlam min hal chhiat sak a, kan thlai min tihchhiat sak a. Tunhnaiah kan inkal pawhna hmun hrang hrang ah harsatna min siamsak zel hi MZP chuan an hrethiam thei lova. ‘Ha aiah ha mit aiah mit’ tih a hun tawh niin MZP chuan an ngai.

MZP thuchhuah chuan, "Saihapui V leh Vairengte mipuite ram humhalha ke an penna-ah MZP chuan lawmthu a sawi a,  a theih angin a thlawp zel dawn a. Kan ram neichhun hi engti kawng maha chan kan phal lova, kan ram humhalh tur chuan MZP chuan a theihna zawng zawng a hmang dawn a, Mizo mipuite kan tanrual phawt chuan ramri buai hi chinfel a nih theih MZP chuan a beisei tlat a ni." an ti a.

MZP chuan, He thil thleng hian Mizo mipuite min ti tang rual zual sauh se la, politics-a inchirhthehna leh party bil hamthatna lak tum lovin a tul huna ram leh hnam chhan tura lungrual taka pen chhuak thei turin Mizo mipuite an sawm.

Post a Comment

0 Comments