MZU BSW Gold Medalist 2020 Gracy Lalrinfeli Fanai

Mizoram University (MZU) Bachelor of Social Work (B.Sw) Gold Medalist 2020  Gracy Lalrinfeli Fanai kan belchiang.




MZU B.SW Gold Medalist 2020 
Gracy Lalrinfeli Fanai hi K Lalzikpuii leh F.Lalsawmliana(L) te fa upa ber niin,  April 1, 1999 khan a lo piang a. Upper Lunglawn, Lungleia cheng leh khawsa niin, BCM Lunglawn kohhran a lawi an ni.

Gracy Lalrinfeli Fanai hi Grace emaw felfel emaw a koh thin a ni a, Unau pathum niin a upa ber a ni.


Zirna lam: 
1. Pawl 1 atanga pawl 10 khawiah nge i kal? eng zatna nge i nih thin, pawl 10 pass kum?
- Pawl 1 leh pawl 2 hi Brighter Academy School, Lunglawn ah ka kal a, pawl 3 atanga pawl 5 thleng hi Holy Faith English School Venglai, Lunglei ah ka kal a, pawl 6 atanga pawl 10 hi Christ Church Co-ed school, (ICSE), Jabalpur, Madhya Pradesh ah ka lut leh a ni. Middle school level thleng hi chu zirna lamah Pathian zarah ka hlawhtling chho ve em em a, top ten ah ka lang char char zel a, pawl 6 atang hian ICSE board hnuaia ka zir avang hian zirna lamah abik takin science leh maths ah hian harsatna ka tawk nasa em em a, ka thiam loh mai bakah ka tui loh em avang hian ka ti tha ngai lo a, mahse Pathian zarah ka pass chho ve char char a, Pawl 10 hi 2015 khan ICSE board hnuaiah 2nd Division ah ka pass a ni.

2. Pawl 12 hi khawi atangin nge i pass? chuan, engah nge, a kum nen ?
- Pawl 11 leh 12 hi Delhi Public School, Mandla Road(CBSE), Jabalpur, M. P. ah ka zawm a, Humanities stream la in Pathian zarah kum 2017 khan distinction-ah pass in subject pa 5 zinga pa 4 (English, History, Political Science leh Knowledge & Traditional Practices of India)  ah te hian letter ka hmu ve a ni.

3. Zirna sang zawk i zir leh i zirna hmun leh kum?
- Kum 2017 atangin Bachelor hi Higher and Technical Institute, Mizoram, Lunglei ah Bachelor of Social Work (Professional course) ka zir a, kumin hian ka zo a.  Tunah hian Pathian zarah Tata Institute of Social Sciences, Mumbai ah inziak tlingin M. A. Social Work in Mental Health ka zir chhunzawm tawh bawk a, BSW final exam kan neih hma aṭang tawhin Master course class hi online in kan ṭan tawh bawk a ni. 

# I lehkha zir dan?
-HATIM a ka luh avang hian residential college a nihna angin hostel ah kan awm vek a, lehkha zir hun hi kan nei a, zingah darkar hnih, zanah darkar thum hi kan zir hun tlangpui a ni a, mahse, hetah hian kan duhthu-ah a innghat thui viau. Study hour nei tho mah ila, kan residence guides te hian min vil reng lova, mahni roomah study hour ah chuan kan study table a  thut a kan duh emaw duh lo emaw he hun hi kan vawng tha em em tur a ni a. Keimah bikah chuan engtik lai pawhin rilru pe thei lo mahila ka zir chhunah chuan thiam belh nei ngei ngei tumin ka zir ṭhin. Class lecture hi ka ngai pawimawh em em a, notes ka siam ngei ngei a, ka enlet leh ṭhin. Tin, study materials leh lehkhabu dang hi ka rawn tam a, ka chhiarchhuak a, ka hrethiam a, chuta tang chuan notes ka siam leh ṭhin a ni. Hei hian exam hunah pawh min pui nasa emem a, mahni ngeia notes in siam chu hriatthiam a awl a, hriat let pawh alo awl a, exam na ah class lecture aṭang leh ka notes siam aṭang hlirin ka chhang ṭhin a ni.

# harsatna I hmachhawn dan?
- Harsatna hi chu mihring in kan nei ṭheuh a, kan harsatna neih te a inang lo vek a, keimahah bik chuan ka harsatna tawh te a te emaw a lian emaw ṭawngtaina nen beih ka tum tlat ṭhin a, hei vang te pawh hi ani anga Pathian zarah  harsatna lian tham em em ka tawh sawi tur vak ka nei lo. Harsatna ka neih apiang hmachhawn a chung ka harsatnate aṭang chuan zirna tha zawk neih ngei ngei ka tum thin.

# Gold medalist i nihna (Subject) leh CGPA?
- Bachelor of Social Work, 8.00 CGPA. 


# Gold medalist ni tura i beih dan?
- Gold medalist nih hi ka in beisei emem ngailoa chutih rualin ka zirna ah a ṭha bera tih ka tum ngei ngei ṭhin a, ka zirna ah rilru pe reng lo mah ila, ka zir chhun ah ka theihtawp ka chhuah ngeingei bawk a, hriatthiamna hi ka ngaipawimawh ber a, ka hriatthiam hma chu topic ngai pawh nise ka zir char char zel a, midang hrilhfiah thei khawpa ka thiam te anih ngaawtloh chuan thiam tawkah ka inngai ngailo. Heta ka sawi belh leh duh chu ka tuina subject tak ka la hian gold medalist ka nihna kawngah min pui emem in ka hria a, ka tuina subject hi la lo ilang chuan hetiang dinhmun hi ka thlen pawh ka in beisei lo a ni. Tuina bera zir chuan rilru lo pek te pawh a awl a, lehkha zir chhunah han zir pawh a nuam emem bawk a, mahni tuina zawna kal ngam te pawh hi a ṭulzia ka hre thar leh zual. 

# Gold medalist ni tura i beihnaah faculty lamin an ṭawiawm/pui ṭha chein i hria em?
- Kan college a kan department, dept of Social work hi zirtirtu te leh zirlai te nena inlaichinna nei ṭha lutuk kan ni a, kan zirtirtu te hian an theih tawpin kan thiamna tur anih chuan ṭan min lakpui peih a, kawng tha min kawhhmuh in kan hma lam hun thleng min ngaihtuah pui emem a, zirna lamah emaw, discipline lamah pawh nise min fuihtu ber leh ṭan min lakpui tu te an ni. Fieldwork kan neih na ah hian zirtirtu ah te hian supervisor theuh kan nei a, research kan beih te pawhin hun bi awm lek lovin kan mamawh na ah kan tan an awm reng a, hei hian zirlai te nasa takin min pui a,innghahna ṭha tak an ni tih min hriatfiah tir hle a, rintlak taka awm a ṭul zia min hmuh nawn tir fo thin.

# I zirna atana i chhungte pawimawhna:
- Ka zirna ah hian ka chhungte hian nasa takin ṭawngtaina leh kawng engkimah ṭan min lakpui a, abik takin ka pu hi zirna ngaisang mi a nih avangin zirna lamah kan hnuaihnung bik a hlau emem ṭhin a, hemi anih avang tak hian pawl 1 ka nih aṭangin hostel ah te min awmtirin English te ka thiamloh hlauvin harsa ti tak chungin tuarchhel leh mahni a puitlin ka zir theih na turin ṭan min lakpui emem a, ka chhungten min tuipui na leh bang lova min ṭawngtaipuina azara tiang dinhmun hi thleng thei ka ni.

# I zirna atana i ṭhiante pawimawhna:
- Ka zirna ah hian ka ṭhiante hian hmun pawimawh tak an chang a, hostel a kan awm vangin lehkhazir hunah te hian group discussion te neiin kan thiam ang ang kan in hrilh tawn thin a, kan notes neih ang te leh study materials kan neih ang ang te hi kan in pe kual vek zel a, tin, research kan beih lai te pawhin harsatna tamtak a awm ve thin a, zan rei taktak te pawh in menpuiin kan ti zo lo ang tih hlauvin, phun nawi lovin kan in pui tawn liamliam zel a, hetiang hun te hi a hlu ka ti emem a, mihring kan in mamawh tawn zia leh midangte tana malsawmna kan nih theih zia a tarlang ka ti emem a, hetianga ṭhiante nena hun hman ho hi a hlu ka ti a, a tu a mai pawh hi kan pawimawh vek a ni tih a tarlang chiang hle bawk.


A duhzawng leh ngainat zawngte:
Rawng - Grey, Yellow
Chawhmeh  - duh bik ka neiloa, ka ei thei tlangpui, tin, chawhmeh ei duhloh neih hi ṭha ka ti lo
Incheina - Ka inhmeh tawk leh awm ti nuam thei ang ber, simple deuhin. 
Rimawi –a mood a zirin ka ngaithla kual vek thei. 
Mizo Ziaktu zingah -Mafaa Haunhar, Dr. Rema Chhakchhuak leh Rev. Lalhmingchhuanga Zongte
Hla- Aw Pathian, Nang Lalber i ni, I offer my life by Don Moen
Hla phuahtu - C Lalzarmawia
Teacher - Lehkha ka zir chhung zawng hian ziritru tha taktak ka tawng a, an hming mala han ziahlan mai theih an ni lo, an ṭha vel vek mai. 
Leader - APJ Abdul Kalam

Mize ngainat zawng:
- Rilru tluangtlam, midangte pawisawilo mi leh midangte tana in pe zo.

Mize ngai nat loh zawng:
- Midang sawisel leh rel hmang, mite ṭhatna lai hmu thei lo, mahni indah chungchung ching.

Hobby: - Painting, ei siam leh lehkhabu chhiar

Relationship status - 😁

Kawppui atan duhzawng:
- Pathian ṭih mi, mi puitling tak leh chhungte dah pawimawh em em tu. 


Zawhna dang:::
1. A tel lova i awm theih loh: Pathian

2. I nun kaihruaitu: Pathian, ka chhungte leh self discipline 

3. Hringnuna i hlauh ber: midangte tana malsawmna nih loh

4. I tih ngai miah loh tur: Mi ṭhatna lai hmuh theihloh

5. Mizo Tualzal nuna ṭha i tih: Chhiatni, ṭhatni a in ṭawiawm, tlawmngaihna.

6.  Quote i duh ber:
"For I know the plans I have for you" declares the Lord, "plans to prosper you and not to harm you, plans to give you hope and a future". 
- Jeremiah 29:11

7. Mizoram leh Mizo tualzal nuna Mizo hmeichhiate dinhmun:
- Mizo hmeichhiate hi tunlai khawvelah kan langsar ve tawh emem a, khawihmunah pawh ka ila, hna ṭha tak thawk thei dinhmunah te kan ding fur tawh hlawm a, zirna lam ah pawh nise a ti ṭha pawl kan ni zel a, heihi a lawmawm ka ti a, tin, inchhungkhur enkawl na lamah pawh nise, homemaker hi hna tha tak ani tih hi kan hriat a tul emem a, engkim hi tette atanga chhungkaw in enkawl na aṭanga in zir chho vek kan ni awm a, heta ṭang hian hmeichhia te dinhmun a pawimawh zia a tarlang chiang hle in ka hria, fate enkawl aṭanga inchhungkhur hna emaw pawn lam hna pawh ni se, a rintlak pawl kan ni zel te hi Pathian malsawmna a ni tih hi kan hriatchian a tul emem a, hmeichhiate hian eng hna pawh thawk ila, kan chhungte tan ṭangkaina dinhmun ṭha tak kan chelh a ni tih hi hre thar leh fo zel ang u.

8. Hnam hmingṭhat leh hmingchhiat kawngah Hmeichhiate'n mawhphurhna:
- Hnam hmingṭhat leh hmingchhiat kawngah hian a tu a mai pawh hi kan pawimawh ka ti a, engpawh ti ila keimahni a a tha thei ang ber kan lakchhuah a, kan thiltih kawng engkima rinawmna leh taimakna nena kan thawh chuan kan hnam mai nilo in kan ram leh khawtlang ti hmingṭha tu kan ni tih hi hria ila, hmeichhia chiah nilo in a mipui ang pumpui pawha kan ṭan lakna tur a ni in ka hria.

9. Hnam ziarang chawinun kawnga Hmeichhiate mawhphurna:
- Kan hnam ah hian chiang ila, a ti hmingchhetu ni lo in a ti hmingthatu nih tum ila, kawng dik leh kawng ṭha kan zawh phawt chuan  kan hnam ziarang hi kan chawi nungin kan chawimawi a ni tih hi hria ila, heihi kan mawhphurna a ni bawkin ka hria.

10. Mizote tan 'Fa neih tlem' inzirtir hi a ṭulin i hria em?
- Engkim hi a hun leh a hmuna zirin a ṭulin a ṭullo thei a, mizo chu hnam tlemte kan la ni a, pung chu kan mamawh viau rualin kan sum dinhmun leh kan theihtawk a zirin heichu mimal ngaihdan ah ka dah a, mahni kan inhre chiang ber a, chuvang chuan mahni theihna te a zirin kalpui mai chi in ka hria a, a hranpa a fa neih tlem in zirtir hi a ṭul rihin ka hrelo a, mahse mahni dinhmun kan in hriatchian a kan sum dinhmun leh kan theihna te hmu thiam tur leh chumi mila thutlukna siam tura in zirtir erawh hi chu a ṭha ka ti.

11. Mizo hnam ṭhanmawh bawk nia i hriat?
- Eirukna te, that chhiatna te leh kan theihtawp kan chhuah lohna. 

 
12. Mizo hnam damna atana  kawng awm nia i hriatte?
- Pathian in kan ram hi min pek ani tih hria ila, kan enkawl tur a ni tih pawh hi hre nawn thar leh ila. Dikna hi vawng nung reng ila, mahni kan in hmangaih ang bawkin kan ram hi hmangaih ila, kan neihchhun ani tih hi hriaiin kawng engkimah hma a sawn theihnan ṭan lak zel hi a pawimawh ka ti.

13. Hnam chhan nana Hmeichhiate ṭangkaina leh mawhphurna?
- Ka sawi tawh ang bawkin tupawh hian kan hnam hi kan chhan thei ani tih hi hria ila, kan hnam ah hian chiang emem ila, hmasawn zawng leh dikna nen kan in vawn nun tlat hian kan ram leh hnam hi kan chhanhim thei ani tih hi hre thar ila, hmeichhia kan ni emaw, mipa kan ni emaw, kan ram tana kan zirna ah te, kan hnathawhna ah te leh kawng engkima kan thiltih ah mi dik kan nih chuan kan hnam hi kan hriatloh lai pawhin kan chhan reng a ni.

14. Zirna, Khawtlang leh Kohhran hi?
- Zirlai kan nih chhung hi chuan kan zirna hi kan dah hmasak ber a ṭulin ka hria a, kan zirna leh kan thiltih a theihtawp kan chhuah chuan nakin zelah kohhran leh khawtlang tan mi ṭangkai tak kan ni zel ani tih hi hriat a tul a. Kohhran leh khawtlang te innghahfakna pawh hi zirlai ah te bawk hian ani tih hi hria ila, kan zirna hmang hian kan chhehvel ah mi ṭangkai tak ni thei tur hian zir hmasak phawt hi a pawimawh.

15. Khawtlang, Kohhran leh nangmah:
- Mizorama ka awm tamloh avang leh mizorama ka awm ve chhuna hostel ka awm daih ṭhin avangin kohhran leh khawtlangah hian ka duh ang tawkin ka inhmang theilo a, mahse ka awm chhunah chuan engkimah tel kim vek ka tum a, ka tel kim angreng viau pawhin ka inhria. Tin, ṭangkaina ka neih theih chinah hian ṭangkai takin ka inhmang ve ṭhin bawk a ni. Kan khawtlang leh kohhran hruaitu te an fel emem a, mi an ngaipawimaha, ka awm lai hi chuan chanvo ṭha taktak te hi min pe thin a, an chungah ka lawm emem bawk a ni.

16. Social Media leh Nangmah:
- HATIM ah hian phone kan kawl theilo tawp a, kum 3 chhung hi chu social media te hi kan khawih tamlo emem a,  hostel a kan awmloh chang te hi chuan ka hmang nasa ve emem a, tangkai taka hman ka duh bawk  a chuvang chuan instagram lamah te hian page tha taktak zirna lam emaw, nunchang lam emaw, news lam te hi ka follow nasa a, hemi hmang te hian ka in upadate ve ṭhin a ni.

17. Mizoram ṭhalai tam tak tlakchham:
- Mihring chu kan mizia a in anglo fur hlawm a, kan ngaihdan te a in anglo hlawm emem a, ṭhalai tamtak mi hlawhtling leh mahni in vawngfel an tam viau rualin ṭhalai tamtak mahni tana ṭha tur pawh ngaihtuah zolo kan tam viau bawk a, hetah hi chuan mahni inhriatchianna hi kan tlachham ka ti a, mahni tana theihtawp chhuah leh thatchhiat loh hi kan zir ala ṭul viauin ka hria,heihi kan tlakchham a ni bawk a. Thil hi a ho lam maimai in ngai lo ila, kawng engkimah kan theihna hi hman ṭangkai thiam kan zir ala ṭul hle a ni. 

18. Mizo ṭhalaite hian ngaihsan tur dik an ngaisangin i hria em?
- Mahni tuina lamah chuan ngaihsan tur tha tak kan nei fur hlawmin ka hria a, tupawh hi mahni zawn ṭheuhah chuan kan mi ngaihsan te atangin hlawkna tamtak te pawh kan tel ve bawk a, keimahni in a ṭha zawnga kan hlawkpui phawt chuan ngaihsan tur dik kan ngaisang in ka hria chutihrualin hetiang zawnga kal ve lo te pawh kan tam a, hei hi a pawi ka ti ve eme em a, tupawh ngaisang ila, kawng ṭha zawk a min kaihhruai theitu an nih loh chuan kan ngaihsan zawng te hi thlahthlam thiam a ṭul ka ti viau bawk.

19. Ngaihsan tur dik nia i hriat:
- Mi rawntlak leh mi rintlak, Kawng engkima theihtawp chhuah ṭhin te leh mahni in dah hmasa lo a a chhehvela midangte ngaichang thiam mi. 

20. Hlawhtlinna tura pawimawh:
- Pathian dah hmasak ber a, mahni theihna te inhriat chiana, kan theihtawk ai baka ṭan lak a, kawng engkimah taimakna nen a thawh.

21. Hloh i hlauh ber: Pathian leh ka chhungte

22. Hnam dang nupui pasal neih hi:
- Mimal tin hian duhthlanna kan nei ṭheuh a, kan duhthlanna te hi a tha emaw a chhia emaw kan lungdamna a nih phawt chuan hlimna min pe tu an ni ṭhin a, va sawisel emaw va sawimawi vak thei chu ka nilo a, mahse mimal ngaihdan in dah pawimawh sak hi a ṭul ka ti ber zawk. 


I thalaipuite tan fuihna--
- Ka ṭhalaipui te hnena ka fuih duh chu eng pawh ti ila Pathian kutah engkim dah thiam ila, mahni theihna leh tlakchham te inhriatchian tum zel ila, chumi kawngah chuan ṭan lak thiama, theihtawp chhuah hi tum zel ila, kan hmalam hun hi ngaihtuah tel zel a pawimawh zia hi hriat a ṭul ka ti em em a. Tin, mahni tuina lama kal hi ngam hi a pawimawh ka ti a, kan tui phawt chuan mahni pawh kan in nawr a, nuam tak si, ṭha tak siin kan zir thei ṭhin bawk a ni. Mi dangte leh mahni aia thiamte rawn hrehlo ila, engpawh ti ila, zirna ah emaw hnathawhna ah pawh nise kan thiltih ah chiang ila, keimahni a ṭhatna awm te hmang chhuak thiam a, mi tangkai tak ni thei turin tan i la zel ang u.

EXPLOREMIZORAM.COM i hmuh dan: 
- Mizoram hian EXPLOREMIZORAM.COM  kan nei che u hi kan vannei ka ti hle a, hetiang kawnga hma in lakna ah hian mizoramah mai nilo, hmun hrang hrang atanga lo chhiar tu ten mizoram chungchang te anlo hriat ve phah a, thil in hrilhriatna tha tak a ni tih hi hai rual a nilo. Tourism promote-na tha tak in ni leh zel bawk hi a lawmawm ka ti. Tin, hetianga Mizo te hlawhtlinna ngaipawimawha documentation tha tak in ti thei hi a finthlak ka ti em em bawk a ni. In entawntlakin mi dangte tan malsawmna  in ni lehzel bawk hi thil lawmawm tak a ni. In kal zelna turah duhsakna sang ber ka hlan duh che u. Pathianin malsawm che u rawh se!



Founder/Editor
Explore Mizoram



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments