Minister pathumin Vairengte tlawh

Aizawl | October 19, 2020: Nizan khan School Education Minister Pu Lalchhandama Ralte, Excise Minister Dr K.Beichhua leh Tourism Minister Pu Robert Romawia Royte te chuan Vairengte tlawhin ramria harsatna awmte a hmunah an enfiah a. Vairengte khawtlang hruaitute leh Central YMA Hruaitute, MZP Gen Hqrs Hruaitute leh MSU Gen Hqrs Hruaitute Vairengteah hian an kawm bawk.


ZDU Office Vairengtea Central YMA, Kolosib Sub Hqrs YMA, Group YMA, Vairengte Joint YMA leh VC te nena inkawmnaah Sorkar aiawhin Education Minister Pu Lalchhandama Ralte chuan Chief Minister hova Cabinet Meeting-in Assam Sorkar leh misualte Ramri pela an rawn chetdan a dem takzet tih sawiin, Zoram venghim tura Sorkarin a tul tul a tih tur thu te, Home Ministry-in Bihar-a IR Police Company 10 tir tura a tih anga insiam vek tawh te pawh thulhtirin ramria duty-tir an nih tur thu te leh Sorkarin buhfai chu thla 3 ei tur a neih thu te, Assam-in kawng an dan pin reng pawha eichawp mamawh chakkhai dangte Tripura, Manipur, Myanmar leh Bangladesh atanga lakluh dan tur thlengin sorkarin a ngaihtuah tih a sawi. Minister Pu Lalchhandama Ralte chuan Vairengte khawtlang, YMA, MZP, MSU leh Police Force zawng zawngte chungah Sorkar aiawhin lawmthu a sawi.
He meeting-ah hian Bialtu MLA Pu Lalrinsanga Ralte pawhin Chief Minister leh Sorkar hotu dangten an ngaihsak avang leh Dy Speaker, Minister 3, MLA 11 leh Pawl hrang hrang hotuten a hmuna a bial harsatna ngaihsaka an tlawha an chamchilh hlawm avangin Bial mipui aiawhin lawmthu a sawi.
Tukin zing hian Supply Minister Pu K.Lalrinliana, Education Minister Pu Lalchhandama Ralte, Excise Minister Dr K.Beichhua leh Sports Minister Pu Robert Romawia Royte te chuan Kolasib-a sorkar hmalakna thenkhat —Saidan Football Ground siam zawhhlim te, AH&Vety Deptt District Office leh Building sak mekte, Sethawna Rehabilitation Centre siamthat mekte, Food, Civil Supplies & Consumer Affairs Department building sakte an thlirho nghal a ni.
Kolasib Saidan Vengah hian SAI bultumin Football Academy Field sak niin Academy tha tak din tum a ni a, Astro Turf phah pawh zawh fel a ni tawh. Football bakah sports discipline dang 3 lai dah tel tum a ni a, a senso zawng zawng hi Central Sorkar tum tur a ni. A hawnna neih thuai tum a ni.

- DIPR

Post a Comment

0 Comments