Aizawl | October 3, 2020: Nimin khan Venglai YMA Park, Kolasibah Faina Hapta 2020 khuhhawnna neih a ni a, Dr. H.Lalthlangliana, Deputy Commissioner chu khuallian niin Pu Gaston Vanlalhriatpuia, District Urban Development Officer-in hun a kaihruai a ni.
Dr. H.Lalthlanglianachuan,” ‘I In leh a velvawngfai la, Kolasib hi Khawpui Thianghlimah siam rawh’ tih hi kumin Kolasiba Faina Hapta kan hmannaah hian thupuiah i nei theuh ang u,” a ti a, ”Khawchhung hmun tam ber hi mimal ram a ni a, mahni ram chin zel tha taka kan tihfai chuan khawpui fai kan ni mai dawn a ni,” a ti. Deputy Commissioner chuan Kolasibah Solid Waste Management Centre hman tur a peih fel tep a nih thu leh chumi atana inkaihhruaina dan pawh mipui zawm tur a tlangzarh a nih tawh thu sawiin,” The Kolasib Town Solid Waste Management Bye-laws 2020 hnuaiah hian inhremtheihna dan hrang hrangte awm mahse, heng inhremna dan te hi hman ngailo turin faina kawngah hma ila tlang ang u,” a ti.
Dr. H.Lalthlangliana chuan lawmman vang chauh a fai tum lo turin kalkhawmte a chah a,” Kan fai leh thianghlim lutuk vang zawk a lawmman la chauh kan ni zawk tur a ni,” a ti a, vawiin atangin faina lama hmasawnna kawng zawh tum theuh turin a chah bawk a ni. Faina Hapta 2020 hi kumtluana hman tur a ni a, endikna te kalpui a nih hnuah Republic Day 2021-ah lawmman te chu sem tur a ni dawn a ni.
Faina Hapta 2020 khuhhawnna hunah hian Sawrkar department hrang hrang hotute, Village Council, YMA, MUP leh MHIP hruaitute an tel a, faina thutiam sawihona hun neih niin kawng dung phiahfaina hun hman a ni bawk a ni.
Post a Comment
He post chungchanga i ngaihdan lo sawi ve rawh: