Aizawl | October 3, 2020: Nimin chhun dar 11:30 hian Directorate of Health Service Conference Hall-ah State Field Laboratory Unit IDSP hnuaia Volunteer MGDA leh Zonet tangkawpin chawimawina an pek te, Citation leh sum fai hlanna hun hman a ni.
Hemi rual hian MGDA leh Zonet tangkawpin chawimawina hun an siama tel ve hman lote pawh vawiin hian chawimawina Citation mawihnai tak hlan tel an ni bawk.
He hunah hian infuhtharna te nei in thusawi tha tak takte ngaihthlak a ni a, he hun a thusawitu Dr. Pachuau Lalmalsawma State Nodal Officer IDSP chuan Sawrkar hnathawk nghet (regular) te tan pawh heng volunteer te inpekna hi chona siamtu a nih thu a sawi a, “Kumin kum tir January thla chawhnu lam atang tawh khan State IDSP a thawktute hi he Covid natna hrileng avang hian chawlh pawh nei thei lovin, chhun leh zanah pawh an buai char char a ni” tiin State IDSP-a thawktu te inpekna ropuizia leh hahzia a sawi lang bawk a ni.
State IDSP hnuaiah hian Unit hrang hrang, Data Management, Sample Collection Unit leh sum lam buaipuitu te awmin anni hian mahni zawnah theuh thahnem ngaitakin he natna do nan hian Ram leh Hnam tan theihtawp an chhuah theuh thu a sawi a. Thla tam tak chhung he natna do nana hun hman a nih chhung hian harsatna neuh neuh awm thin mahse Pathian kaihhruaina leh Sawrkar hmalaknate avangin harsatna lian tham tawk lova tluang taka hma laka a ni thei zel chu lawmawm a tih thu sawiin, hnathawktu te zawng zawng pawh he natna do tura Pathian ruat bik an nih a rin hial thu Dr. Pachuau Lalmalsawma chuan a sawi lang bawk a ni.
He hunah hian Volunteer leh Driver-te mi 30 lai chawimawina pek an ni.
Post a Comment
He post chungchanga i ngaihdan lo sawi ve rawh: