MZU M.Tech (ECE) Gold Medalist 2020 C Lalengkima

Mizoram University (MZU) M.Tech (Electronics and Communication Engineering) Gold Medalist 2020 C Lalengkima kan belchiang.


MZU M.Tech (Electronics and Communication Engineering) Gold medalist 2020, CGPA 7.73 score thei Kimkima emaw Kima emaw a koh thin C Lalengkima hi Lalmalsawmi Pautu leh C Lalbuatsaiha te fa pathum zinga naupang ber niin, October  8, 1995 khan a lo piang a. An unau hi pathum niin, Hmeichhia pakhat a awm.

C Lalengkima te hi PCI Armed Veng East Kohhran-ah lawiin, Armed Veng South-ah chengin an khawsa a ni.

Zirna lam:
1. Pawl 1 atanga pawl 10 khawiah nge i kal? eng zatna nge i nih thin, pawl 10 pass kum?
- Pawl 1 atanga pawl 7 hi Little Kingdom School, Chhinga Veng-ah ka lut a. Pawl 8 atang pawl 10 hi Mount Carmel School, Chaltlang ah ka lut a, 2011 khan pawl 10 hi Distinction (L in 3 subjects) ah ka pass ve.

2. Pawl 12 hi khawi atangin nge i pass? chuan, engah nge, a kum nen ? 
- Pawl 12 (Sc) hi St. Peter's Higher Secondary School, Chhingchhip atangin kum 2013 khan 2nd division-ah ka pass.

3. zirna sang zawk i zir leh i zirna hmun leh kum?
- 2013 khan St. Aloysius Institute of Technology, Jabalpur, M.P. ah B.E (Bachelor of Engineering) Electronics and Communication Engineering subject ka zir a, 2017 khan distinction in ka zo. 2018 khan MZU, School of Engineering and Technology ah M.Tech (Master of Technology) Electronics and Communication Engineering ah vek ka zir a, kumin hian ka zo ve leh a ni.


# I lehkha zir dan?
- Lehkha zir dan tih hian, routine chu ka insiam ve a, a detail chuan sawi lo mai ila. Mahse, eng emaw neuh neuh vang hian zawm dik a har khawp mai. A tawi zawngin sawi mai ila, hun neih dan a zirin a tam thei ang ber zir chu ka tum thin. Tunkum chho bikah chuan nitin darkar 6 vel chu ka zir tlangpui. Zir chakna bo riau chang a awm thin a, zir turin ka in nawr lui lem lova, rilru tih thawl nan hun ka hmang thin.

# harsatna I hmachhawn dan?
- Harsatna hmachhawn dan hi ka thiam meuh lo. Ka tawngtaina hi ka ring deuh bur a, ka hriatloh karah Pathian hian min lo paltlang pui nimai zel hian ka hria.
 
# Gold medalist i nihna (Subject) leh CGPA?
- M.Tech (Electronics and Communication Engineering), CGPA 7.73

Gold medalist ni tura i beih dan?
- Kan sawi hmasak duh chu, Gold Medalist nih tum hian ka bei ngai ko hrim hrim a. Keima tui ang tawk leh ka chak ang tawkin ka zir mai thin a. Gold medalist nih hi chu Pathian Malsawmna ka dawn ni mai zawkin ka hria. M.Tech 3rd sem atang hian project kan nei a, research angin a kal tawh avangin ka theih anga tam research paper ka chhiar a, ka subject related video emaw article te ka subscribe a, ka hmang tangkai thin khawp mai. Tin, project presentation pek thin a nih angin presentation hi ka theih ang tawka tha in ka inpuahchah ve thin.



Gold medalist ni tura i beihnaah faculty lamin an ṭawiawm/pui ṭha chein i hria em?
- Sawi tawh ang khian Research anga a kal tawh vangin guide kan nei theuh a. Ka guide hi Dr. Reshmi Maity ani a, min pui nasa khawp mai. Thil te ber pawh hi hriatloh ka ngah thei sia, ka duh duh ka zawt thin hi a ni deuh ber mai. Nu ang maiin ka ena, harsatna tawh a han peihloh riau chang pawh in moral support min pe tha em em a, min hrethiam thin khawp mai. Tin kan Department faculty zawng zawng leh office staff thleng in, kan HOD, Dr. NP Maity pawh advice chitin reng min pe a, engkimah ka rawn thin an ni a, heng dinhmun ka thlen theihna hi an mahni vang liau liau a ni.

I zirna atana i chhungte pawimawhna:
- Ka chhungte hi ka engkim an ni a, an mi thlawpna tel lo chuan engmah ka ni lo. Engtik lai pawha tawngtaina nena min umzuitu an ni a, anmahni hi a hlawhtlinna neitu zawk chu an ni. In lamah leh chhungkaw tulah pawh min awl a, ka zirlai zir tawp tur hian zalenna zau tak min pe in min tuipui em em a ni.


I zirna atana i ṭhiante pawimawhna:
- Ka thiante ka classmate te hi ka tan chuan an hlu khawp mai, harsatna neih in min pui a, thiam loh nei ila min hrilhfiah a, kan inpui tawn liam liam thin. Tin, department danga ka thiante hi an pawimawh khawp mai sawi vek seng lo mah ila, kawng tinrengah an hlu khawp mai.

A duhzawng leh ngainat zawngte:
Rawng - Asen leh. Adum
Chawhmeh  - Alu, dal leh maian bai
Incheina - Inchei dan bik pawh ka nei lova, mahni neih tawk a mawi ka in bel mai zel. 
Rimawi – Ka mood a zir hian ka ngaithla kual veka, ngainat bik ka nei lem lo. 
Mizo Ziaktu zingah - Duh ber ka neilo an thiam ka ti hlawm lutuk a. 
Hla - Tunge in thlei thei? 
Hla phuahtu - K. Hminga
Teacher - Richard Feynman/Sir Walter Lewin
Leader - LeBron James


Mize ngainat zawng:
- Midang milpui zel a in siamrem thiam

Mize ngai nat loh zawng:
- Midang chaldelh ching

Hobby: - Basketball leh Research Paper chhiar

Relationship status - Single

Kawppui atan duhzawng:
- Pathian tih mi leh mi rinawm, hmangaihna ngah.


Zawhna dang:::
1. A tel lova i awm theih loh: Pathian

2. I nun kaihruaitu: Isua Krista

3. Hringnuna i hlauh ber: Midangte harsatna siamtu nih

4. I tih ngai miah loh tur: Mahni in khawngaih

5. Mizo Tualzal nuna ṭha i tih: Tlawmngaihna

6.  Quote i duh ber: My belief is stronger than your doubt

7. Mizote tan 'Fa neih tlem' inzirtir hi a ṭulin i hria em?
- A that leh thatloh chu ka hre miah lova, kan chawmzawh tawk tur neih erawh a pawimawh ka ti.

8. Mizo hnam ṭhanmawh bawk nia i hriat?
- Mizote hi hma kan sawn nasa em em tawh a, thil pakhat ka vei ve deuh chu hlawhtlinna hi kan hmanhmawh pui vak thin niin ka hria,tun ai hian teirei peihna nei ila.

9. Mizo hnam damna atana  kawng awm nia i hriatte?
- Pathian a taka tihna nei ila, Mahni thiltihah kan phak tawk theuha tha ber nih tum ila, thildang tam a ngai in ka hre lo.

10. Zirna, Khawtlang leh Kohhran hi?
- Mihring hmasawn tur chuan zirna hi a pawimawh em em a. Kohhran leh Khawtlang hmasawn kan duh chuan mihring hmasawnna a pawimawh leh a, chumi nghawng chu kohhran leh khawtlang ah a lang thin. Zirlai tan zirna leh kohhran leh khawtlanga inhmang chunga tha taka kan zir thei anih chuan a tluk a awm lova, all round development diktak niin ka hria. Mahse, kan zirna in a tawrh ai chuan Kohhran leh Khawtlang hi chu a in hman dan tawk kan thiam a pawimawh ka ti, thiam dawnloh chuan kan ngaihpawimawh ber ah khan nasa taka beih vak mai turah ka ngai.

11. Khawtlang, Kohhran leh nangmah:
- Ka theih ang leh hman ang tawk chuan Kohhran leh Khawtlangah ka in hmang ve a. Lehkha zir a ngaih chuan Kohhran leh Khawtlang lama kan hruaitute hian min hrethiam thin khawp mai. An chungah pawh lawmthu ka sawi tak meuh meuh bawk a ni.

12. Social Media leh Nangmah:
- Lehkha zirkai bik chuan ka dah bo mai a, zir lem loh chuan dan pangai ang bawkin ka hmang ve thin.

13. Mizoram ṭhalai tam tak tlakchham:
- Life Principle nghet tak nei lem lova awm ve tawp hi kan tam mah mah em aw ka ti ve thin.

14. Mizo ṭhalaite hian ngaihsan tur dik an ngaisangin i hria em?
- Sawi thiam a har hle mai. Kan ngaihsan te kha eng ang mi pawh nise, an thatna lam kan ngaihsan thiam chuan, ngaihsan tur diklo awm theiin ka hre lo. Chutih rualin, tlemin tuna kan ngaihsan luai luai aia mi tangkai deuh zawk  chu kan ngaisang thei theuhin ka ring.

15. Ngaihsan tur dik nia i hriat:
- Mi dik leh Tumruh

16. Hlawhtlinna tura pawimawh:
- Teirei peih leh tih tauh tauhna thinlung put tlat a pawimawh ka ti. 

17. hloh i hlauh ber: Ka nu leh pa

18. Hnam dang nupui pasal neih hi:
- Midang in an neih chuan harsatna ka nei lem lo. Keimah erawh chuan Mizo nula ngei neih ka tum.


I thalaipuite tan fuihna--- 
- Engkim hi mahni atangin a in tan vek a, mahni tana chakai khawrh vek kan ni a. I ram leh hnam tana i tih pawh kha i tana ti i nih avangin, mahni laka rinawm thalai ni thei theuh ila ka duh khawp mai.


EXPLOREMIZORAM.COM i hmuh dan:
- A tha ka ti khawp mai, content tha tak tak in nei thin a, thalaite hmasawnna leh zoram hmakhua in ngaih zia chu a chiang maiin ka hria. In thahnem ngaihna te, midangte chawimawitu in nihna te hi chawimawi leh fak in phu hle in ka hria. In kal leh zelna turah pawh ka duhsakna sang ber ka hlan bawk a che u.





Founder/Editor
Explore Mizoram



(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)


Post a Comment

1 Comments

  1. Ads hi in dah tam hle mai.. banner ads ho hi chu.. ti tlem deuh thei ula.. tha ngawt ang.. Page Load pawh a rei.. chn.. Wibsite link in tarlan ho khi.. Icon Hmangin nalh deuh in rem te u.. fb, twitter, Instagram link ho khi..

    ReplyDelete

He post chungchanga i ngaihdan lo sawi ve rawh: