Ramri-ah boruak a tang hle; Mizoram lam inkau reng!

(Thu kal lai, Update reng leh siamthat reng a ni a, Copy/screenshot lovin Link i lo share dawn nia.)

Aizawl | October 29, 2020: Mizoram leh Assam ramri chuan ziaawm lam aiin buai lam a pan zel a, vawiin khan Vairengte thalai chu inpun khawmin Ramri-a Mizoram sipiate inkulhna tur khur an lai.

Ramri chungchang-ah hian Mizoram thalai tam tak an inkau reng a, Ramri pan tum tam tak an awm tawh nia hriat a ni bawk.

Nimin khan JAC on Inner Line Reserve 509 Sq. Miles Demand - Mizoram thuchhuah siamin, Țhalai kan ram, kan hnam chhan ngam tur zofa țhalai volunteer thei a sawm a, MZP leh MSU office ah inhriattir turin hriattirna a tichhuak.


Ramri chungchangah hian vawiin khan Central YMA chuan thuchhuah siamin, 1875 ramri chu an pawm dan leh dinna a nih reng thu an tichiang.

Nimin chawhnu atang khan Assam lam chuan Cachar district chhunga mi Lailapur ah Kanwgpui dangin Mizoram a chakkhai lo lut tur an dang a, nizan khan Mizoram lamah pawh Kolasib district-ah kawng hi dan ve a ni.

CYMA thuchhuah chuan, "Mizoram leh Assam ramri buaina kal zelah boruak muanawm a awm tawh tura kan ngaih laiin, Assam Sawrkar-in boruak tha lo hring chhuak thei zawnga hma a la chhunzawm zel hi kan dem tak zet a ni. Mizoram mipuite hian kan pi leh pu ten kum 1875 a ramri an lo sah chhuah tawh sa hi kan pawm dan leh kan dinna a la ni reng a ni." a ti a.

CYMA chuan, "Vawiin Khuangchawithla ni 29, 2020 (Ningani) tlai dar 6:30-a Union Home Secretary-in Mizoram leh Assam State Chief Secretary biakhmuhtheihna (Video Conferencing) hmanga a kawm turah hian kan dinhmun chiang taka tarlan ni se, Mizoram chhungah Assam lam mi engemawzat khawsa mek kan neihte himna pawh Central Sawrkar-in ngaihtuah se kan ti. Mizo mipui ten ramria kan pawm hi dinpui tlat turin Sawrkar kan phut tlat a ni." an ti.

Hemi vang hian YMA Vairengte chuan a hnuaia mi ang hian thuchhuah an siam;
HRIATTIRNA
Tunah hian mipa tawh phawt chu Saihapui V lamah kal thlak tur ania, bawngtuthlawh, suahdur, buara te ken tur ani, buara nei ten kan pasaltha fehchhuak turte iken tir ang u, Assam nen inkah palh thuta kan IR te awmna tur siam a ngai dawna dar 2 hian liam thlak tur ani e, zu rui buai leh ngaihtuah ngai ang chi chu kal loh ngam ni se rilru fim tak puin Ram leh hnam tan fehchhuak theuh turin kan in sawm ani.
Joint YMA kaihhruaiin dar 2 ah kal thlak hman ni se atha ang.
Secretary
 Zalen Veng Branch YMA

IR 5th Bn Lungverh lam thuchhuah pawhin a hnuaia mi ang hian  a darh;
Vawiin ah Assam lam police hotu ADG pakhat Saihapui tlawhtu in Mizoram police lam min vau in darkar 24 chhunga border atanga kan in withdraw vek loh chuan kawngpui zawng zawng a dan chah tir tur te, Mizoram police kan indahna hmun bul zelah Assam police a let 4 zela tam an dah ve dawn thu te,  inkah an inpeih reng thu te a sawi in, a hnu lawk atangin Assam atanga Mizoram a lut kawngpui zawng zawng dan chah nghal a ni ta bawk a. Hei vang hian PHQ lama kan hotuten ramri a duty zawng zawng in ral ring turin min hriattir e.

Assam lam hian ramri  hmun hrang hrang ah police an rawn dah nghal bawk. 
Heng vang hian  ramri a kan duty na - Medili/Kanhmun leh Zophai a awm te engtiklai pawha in ralring tur leh che ve nghal thei turin kan inhriattir a ni e. 
5th IR Bn., 
Lungverh.

Post a Comment

0 Comments