Assam Police leh forest deptt in Mizoram chhungah Mizo thlam halsak; MZP in hma la dawn, thlam sak ṭhatsak dawn

Aizawl | October 10, 2020: Thinghlun khuaa Mizo thlam Assam Police leh Forest Deptt in an halsak vangin boruak a zang hle a, hemi chungchangah hian MZP in hmalak an tum a, thlam pawh sakṭhatsak an tum.

Thlalatu: Rinnunga

Nimin tlai khan  Thinghlun khua John Zolawma thlam chu Assam Police leh Forest deptt lam mi leh sa te'n suasamin an halsak a, hei hian ṭhalai tam tak a tithinrim hle a. Hemi chungchangah hian Mizo Zirlai Pawl (MZP) general headquarters chuan vawiin khan 'Dar-rang'khawngin ṭhutkhawm hmanhmawh an kova, hmalak ngei turin an rel a, Zolawma thlam pawh an sakṭhatsak dawn.

MZP chuan vawiin chawhma khan emergency meeting kovin he thu hi an rel a, a rang thei ang bera hmalak nghal an titlu a, hmalak nghal an tum a ni.

MZP hian karleh, October 15 khian an rorelna sang ber dawttu Federal Council ṭhutkhawm nei turin an inbuatsaih mek a, hetiang boruak a awm takah chuan ṭhulh mai pawh an inhuam niin thudawnna chuan a tarlang.

Thlam haltute hian thlai leh kuhvate an tihchhiat bakah MGNREGS hnuaia hnathawhna lungphun pawh an titlu a ni.

Tunah hian Mizoram ramri, a bikin Assam nena inrina hrang hrang a buai mek a, Bairabi leh Vairengte ah pawh buai hmabakin boruak a inmung mek a, hengah te hian MZP lam aṭangin hmalak tumna a awm hnai niin thu dawn a ni bawk.