Mizoram University (MZU) Master of Arts (Economics) Gold Medalist 2020 Ashley Lalremruati kan belchiang.
Ashley hi MZU M.A (Economics)-ah CGPA 8.8 score in Gold Medalist a ni a, MZU M.A Econocmics record a la siam a ni. Tin, Ashley hi MZU Varsity Miss 2019 atan thlan a ni a, hemi bakah hian hmanni lawk khan MZU Student of the Year 2020 atan thlan a ni leh a, hei chang ala ni lo; MA 2nd Semester a zir lai hian NET a lo inziak tling der tawh a ni.
Ashley hi Zoliansanga (L) & Lalhmachhuani te fanu niin, January 4, 1997 khan a lo piang a, Ashley emaw Ash emaw tia koh thin a ni.
Ashley te hi Mission veng, Aizawl-ah chengin an khawsa a, Presbyterian Kohhran-a lawi an ni.
Zirna lam:
1. Pawl 1 atanga pawl 10 khawiah nge i kal? eng zatna nge i nih thin, pawl 10 pass kum?
-Kg atanga pawl 7 thleng chu Gospel Centenary School, Mission Vengah ka zir a. Middle school ah hian a titha pawl ka ni ve thin a, top 10 ah chuan ka lang ve ziah thin.
Pawl 8 atanga pawl 10 thleng hi St. Paul’s Higher Secondary School Tlangnuam ah ka zir a, hemi chhung pawh hian zirlai ah chuan harsatna ka nei vak ngailoa, Pathian zarah zirna lamah hi chuan ka tluang chho lutuk ani.
Pawl 10 hi 2013 khan Distinction ah ka pass a, subject zawng zawngah Letter marks ka hmu ve a ni.
2. Pawl 12 hi khawi atangin nge i pass? chuan, engah nge, a kum nen?
- Pawl 12 hi St. Pauls Higher Secondary School atang bawkin kum 2015 khan Distinction ah ka pass ve a. Physics, Chemistry leh Biology ah te Letter marks ka hmu ve bawk ani.
3. zirna sang zawk i zirte leh i zirna hmun leh kumte?
- Under-graduate hi Christ University ah kum 2015-2018 chhung khan ka zir a, Arts lamah inletin B.A. Triple major (Economics, Psychology, Sociology) ka zir chhuak a ni.
Post-graduate hi Mizoram University ah kum 2018-2020 chhungin ka zir a, M.A (Economics) subject la in tluang takin ka zir zo ve a ni.
Website a fakna hi i lo hmet ve thin dawn nia.
# I lehkha zir dan?
Ka subject lak (Economics) ah hian ka tui em em a, chuvangin lehkha zir hi a peihawm loh chang pawn taimak luih a awlsam zawkin ka hria. Eng topic pawh zir dawn ila hriatchian ka duh avangin textbook hi pahnih aia tlemlo ka rawn ziaha, Library ah hun ka hmang tam hle. Midang hrilhfiah tur khawpa ka hriatthiam loh chuan thiam ka inti ngai lo. Economics textbooks mai bakah tunlai khawvela chanchinthar te, kan ram dinhmun te nen engkim hi hriatthiam ka tum thin a, hei hian min pui berin ka hre thin. Lehkha hi zir rei lam ngawt ni lovin ka zir chhuna rilru pe taka zir ka tum zawk thin.
# harsatna I hmachhawn dan?
- Mimal nun leh chhungkaw nun lamah harsatna chu a awm lo thei loa. Eng buaina pawh tawk ila, rilru puthmang hi ka dah pawimawh em em a. Harsatna awm hi tlansan emaw palzul loh hram ka tum a, tihtheih ka neih phawt chuan ka theihtawp ka chhuah thin. Kan rilru kan adjust thiam a, hmachhawn dan kan thiam phawt chuan harsatna hi kan inzirna zelah ngaih ka tum hram thin.
M.A (Economics) Gold medalist ni tura i beih dan?
- Pathian zarah ka lehkha zirah ka tui avangin zirlai leh a a kaihhnawih hi ka chhiar tam a. Pakhatna nih tumin ka zir ngailoa, thiam tumin ka chhiar thung thin. He rilru puthmang hian min puiin ka hre thin. Phur reng lo mah ila, peihloh viau chang pawha tlem tal chhiar tum ve na rilru te khan min pui lutuk ani.
M.A (Economics) Gold medalist ni tura i beihnaah faculty lamin an ṭawiawm/pui ṭha chein i hria em?
- Mizoram University-a ka zir chhung zawng khan kan faculty (teaching leh non-teaching) hi an fel a, zirlaite pawh min ngaihsak hle mai. Harsatna engpawh nei ila chhun leh zanah an inhawng renga, zirlaite hian kan zirlai mai niloin mahni personal life ah pawh buaina kan neih chuan pan theih vekin an awm ani.
Kan Head of Department, Dr. Lalhriatpuii hi a bikin a fakawm ka ti thei hle a. Zirlai ah leh University activity reng rengah min phurpui renga, ani hi kan Department leh a chhunga mi te tihlawhtlingtu a niin ka hria ani.
NET i inziaktling tawh tih kan lo hria a, engtikah nge i inziah tlin?
-NET hi June 2019 khan II Semester ka zir laiin ka inziak tling ve ani.
NET atana i inbuatsaih dan?
-NET atan hian inbuatsaihna hran ka nei lem lo hle a. II semester ka nih lai khan tawnhriat atan pek ve hrim hrim ka duh avangin inbuatsaihna nei em em lovin ka pe ve a, ka lo vannei ve hlauh a. University exam nen a inrual thin avangin a hranpaa en ka nei lem loa, mahse Undergraduate atang tawha kan lo zir chhoh ve na leh a subject kan chian ve na khan min pui hle ani.
I zirna atana i chhungte pawimawhna:
-Kan naupan lai atangin ka chhungte hian lehkha min zirpui ngai lem loa, min zirtirnaah chuan kan tihthat leh tihchhiat chu kan chungah a innghat tih hi a ni ber a. Chutih rualin kan zir duh phawt chuan mamawh engpawh nei ila min hnial ngailo a, min phurpui em em thin a. Hetia min zirtirna hian lehkhazir ah min ti taima zawk a, mahni tuhrah seng theuh tur anga kan inngaih avangin kan unau pawhin zirlai hi kan ngai pawimawh thei em em a ni.
University ka kal lai phei chuan ka naute phaiah an awm avangin ka pi nen chauh inah kan awm thin a, ani hian ka zirlai ka ngaih pawimawh loh hi a phal ngai loa. Library ka kal duh chang leh room-a lehkhazir duh vanga ka inkhung te pawhin hriatthiamna nasa tak a nei zel a. Tun dinhmun ka thlen theihna hi ka pi enkawlna leh taimakna ka ti lo thei lo a ni.
I zirna atana i thiante pawimawhna:
- Ka thiante tello chuan he dinhmun hi ka thleng miah lo ang. Kan thiam ang te kan inhrilh tawn a, thahnem kan inngaihpui tawn bawk a, zirlai lamah thiamna engmah kan ui lo a. Hetiang boruak a awm avang hian kan vaiin kan thatpui in ka hria. Zirna pawn lamah pawh ka thiante hian min tawiawm tha em em zel a, ka tan chuan an hlu takzet a ni.
MZU Students of The Year a thlan i ni hi:
- Mizoram University (MZU) Students of the Year (SOY) nihna hi ka chan phak ka ring ngailo hrim hrim a, thlan ka ni tih ka hriat tirh chuan mak ka tiin ka lawm khawp mai. University a ka zir chhunga ka hun hman te ka ngaihtuah let a, he chawimawima hi phu lo ka inti hle a. Ka thian fel tak tak te, ka chhungte leh kan department min tawiawmna leh min duhsakna zar liau liau niin ka hria.
A duhzawng leh ngainat zawngte:
Rawng - Light blue/ Blue
Chawhmeh - Alu
Incheina – Comfortable taka ka awm theihna
Rimawi – Rimawi chu a hun azirin chi hrang hrang ka ngaithla kual nasa
Mizo Ziaktu zingah - Vanneihtluanga Hla- Sleeping at Last- “Saturn”
Hla phuahtu – Zirsangzela Hnamte
Teacher – Lehkha ka zirlai zawngin zirtirtu tha leh fel tak tak ka tawng hnem a. Zirlai ah min ti phur tu leh hriathhiamna min pe tu an nih bakah tun thlenga zirlai ringawt loa min duhsaktu an ni thin. Hming hmerin sawilo mah ila ka zirtirtu neiih tawhte hi ka tan an hlu e mem ani.
Leader – Tunlaia political leaders ah chuan Jacinda Ardern hi ka ngaisang a, leader tih vuah a phu hle in ka hria.
Mize ngainat zawng:
-Mi rinawm, ngilnei thei leh rilru tha
Mize ngai nat loh zawng:
- Midang rilru puthmang leh dinhmun hriatthiam pui tum miahlo hi ngainat an har ka ti thin. Hobby- Thuziah leh lehkhabu chhiar
Relationship status – Tuna ka awm danah hian ka hlim em em tih bak ka sawi lo mai ang.
Kawppui atan duhzawng:
– Mi rilru tha leh puitling, thian tha ni thei leh engkima in support tawn thei.
::ZAWHNA DANG:::
1. A tel lova i awm theih loh:
- Ka chhungte leh ka thian tha te
2. I nun kaihruaitu:
- Ka nun hi keima tan chauha hmang loin midang tana malsawmna nih ka duh a, nitin chu chu ka tum thin. Ka nuna entawn ka tum ber thin ber chu mi ngilnei leh midang tana malsawmna nih tum reng te hi an ni.
3. Hringnuna i hlauh ber:
- Khawvel hi ka kalsan hnua a aia thaa kalsan ka duha, ka tihtheih a tam emaw a tamlo emaw, reilote ka awm ve chhung hian a tha zawnga danglamna siam ka duh ani. Chu chu hlenchhuah loh ka hlau ber.
4. I tih ngai miah loh tur:
- Ka phu miahloh malsawmna ka dawnte avanga chapo leh midang diriam zawka tawng/ chet.
5. Mizo Tualzal nuna ṭha i tih:
- Lawm nia in lawmpui hi chu a harsa lo thin a, mahse Mizo nuna ka chhuan ber chu tawrh nia kan intawrhpui thiam dan leh khawtlang kan in ngaihpawimawh thinna hi ani.
6. Quote i duh ber:
“Trust in the Lord with all your heart, and lean not on your own understanding”
7. Mizoram leh Mizo tualzal nuna Mizo hmeichhiate dinhmun:
- Mizorama Mizo hmeichhiate hi kan ram tan an pawimawhna leh an hlutna te ka hmu thiam telh telh a. In lama chhungkaw enkawlna atanga ram hruaina thlengin hmeichhiate hian dinhmun pawimawh tak an chelh a, an hlenchhuak tha thin hle in ka hria. Hmeichhiate hi zirna lamah te, sumdawnna lamah te, sawrkar hna ah te pawh Mizo hnam chawisangtu an ni chho zel a, hmasawn lamin kan kal zel bawkin ka hria a ni. Chutih rualin, hmeichhe naupangte kan zirtirna ah hian hmeichhia te hlutna leh tangkaina te, mahni theuha intodelh thei kan ni tih te leh sang lua a awmlo ani tih te hi inzirtir uar ila, Mizo hmeichhiate tan mai bakah ram tan hmasawnna nasa tak a thlen theih ka ring ani
8. Hnam hmingṭhat leh hmingchhiat kawngah Hmeichhiate'n mawhphurhna:
- Hnam hmingthat leh hmingchhiat chu a ram mite ah a innghat a, en tu leh ngaithlatu an tam poh leh hmingchhiat leh hmingthat hi a awl thin a, hemi kawngah hi chuan tu pawhin mawhphurhna kan nei vekin ka hria.
Hnam tih hmingthat nan thil harsa leh lian tih vak a ngaiin ka hrelo. Eng dinhmun ah pawh awm ila, kan hna leh kan mawhphurhna te fel tak leh rinawm taka kan hlenchhuah chuan kan hnam timawitu leh ti hmingthatu kan ni vekin ka hria. Zirlai emaw hnathawk kan ni emaw, nula emaw nu kan ni emaw, kan tih tur theuh tha tak leh rinawm taka kan hlenchhuah bak hi hnam hmingthatna awmin ka hre chuanglo.
9. Hnam ziarang chawinun kawnga Hmeichhiate mawhphurna:
- Mizo hmeichhia ah hian a tam zawkin in leh naupang enkawltu tu nihna an chang a. Hnam ziarang chawinun nan hian in lamah leh kan inenkawlnaah te Mizo nih awmzia te, Mizo hla leh thawnthu te, Mizo in hman atanga kan inzirna te hi inhrilhhre thei ila. Zirlai atan mai niloin inah chawinun leh chawimawina chang kan inzirtir thiam chuan khawtlangah pawh a langchhuak ang tih ka ring ani.
10. Mizote tan 'Fa neih tlem' inzirtir hi a ṭulin i hria em?
- Mizote hian ‘Fa neih tlem’ hi inzirtir a tul ka la ti lem loa, mahse fa neih tam ringawt pawh uar chi a niin ka hre chuanglo. Kan inzirnaah leh kan inhrilhhriatna ah hian fa neih leh enkawl dan tha leh mahni taksa enkawl dan (reproductive health) te inzirtir ila tha ka ti. Tam tur ringawta fa neih chuan hun reiah reitheihna (mimal leh ramah) a thlen thin ani. Chuvang chuan mahni dinhmun (mental and physical health, economic and social well-being) azira fa neih inzirtir hi a tha in ka hria ani.
11. Mizo hnam ṭhanmawh bawk nia i hriat?
- Ram leh a mipuite hmasawn nan chuan hruaitute mawhphurhna a san em avangin Mizo hnam thanmawk bawk sawi dawn chuan kan hruaitute a sawi loh theihloh a. Mizo anga a hnamin hma kan sawm dawn chuan kan hruaitute hmalakna (emaw hmalaklohna) hian nghawng a nei thui em em ani. Mipuite ei ai ei hruaitu te, ruihtheihthil leh zu ngawl veia buai tam lutuk chunga buaipuina leh enkawl zuina (rehabilitation) awm thalo te, thalai lehkha zir sang hnathawh tur hmulo tam lutuk te hi kan buaina lian berte niin ka hria.
12. Mizo hnam damna atana kawng awm nia i hriatte?
- Mizoramah hian literacy rate sang viau mah se, a tak ai chuan lehkhaah hian thiamna a sangin a lang thin. Kan zirlaite hian zir mawl lovin keimahni leh kan ram tan engtin nge kan hman tangkai theih ang tih hi ngaihtuah tel ila, kan thuhriat apiang dik emaw tiloa zawhna zawh tam te zir ila, kan tuina leh thiamna te eizawnna changtlung ah hmang tur te in bei ila, hruaitu tha te thlanchhuah tum ila a pawimawhin ka hria ani. Thalaite hi tunah chuan kan pawimawh bera, kan ram dinhmun ah lungawi lohna kan nei anih chuan danglamna siam thei bertu kan ni a, sawiselah duhtawk loa hna tul ang kan thawh ngam a pawimawh ka ti ani.
13. Hnam chhan nana Hmeichhiate ṭangkaina leh mawhphurna?
- A hmaa ka sawi ang khan hnam dinchhuah nan leh hmasawn nan chuan hmeichhiate hian kan theihna kan inzira kan hriatthiam a pawimawh hle in ka hria a. Inchhungah te, hna lamah te, khawtlangah te pawh kan hna leh chanvo neih ang ang hi tha takin hlenchhuak ila, tuna kan thlen tawk hi duhtawk loin a aia thaa hmasawm tum zel ila ka ti. “Hmeichhia ka nih vangin a remlo” tih zawngin eng hna mah hi ngailo ila, kan thiam zawng leh tui zawngah chuan huaisen takin hmahruaitu ni ngam ila, hnam ang pawhin hma kan sawn zel zawk ka ring ani.
14. Zirna, Khawtlang leh Kohhran hi?
- Zirna, khawtlang leh kohhran hi a kal kawp vekin ka hria a, kan nunphung ah lakhran theih a niin ka hrelo. Ka ngaihdan chuan zirlai kan nih chhung chuan zirlai kan dah hmasa anga, mahse kan zirchhuah leh kan thiamna te hi khawtlang leh kohhran tan kan theih hunah kan hmang ve turah ka ngai.
15. Khawtlang, Kohhran leh nangmah:
- Zirlai ka nih chhung chuan ka zirna hi ka dah hmasa ngei ngei a, mahse khawtlang leh kohhranah ka mawhphurhna ka hlen loh phah ngaiin ka hrelo. Hemi chungchangah hian kan khawtlang leh kohhran lama hruaitute pawh an fel em em a, exam lai leh lehkha zir ngawrh lai chuan min hrethiam zel thin a, hetianga zirna min ngaih pawimawh puina leh min hriatthiamna hian mawhphurhna min pek ve ah te min ti phur zawk thin a ni.
16. Social Media leh Nangmah:
- Social media hi ka hmang tam vak loa, account te pawh nei mah ila ka hunawl hnawhkhat nan bak ka hmang vaklo ani.
17. Mizoram ṭhalai tam tak tlakchham:
- Mizo thalaite hian taimakna leh tumruhna hi kan mamwh in ka hre thin. Hmun ralmuang takah kan piang hi kan vanneihna anih rual rualin, kan thil neihte hi a hlutzia kan hmu thiamlo in ka hre thina, taimakna hi kan zir theihnghilhin ka hre thin.
18. Mizo ṭhalaite hian ngaihsan tur dik an ngaisangin i hria em?
- Mizo thalaite hian TV personalities leh social media lama followers ngah te chanchin kan hriat viau rualin news te, khawvela danglamna siam tu tak tak te hi kan hre tlem hle in ka hria. Kan mi ngaihsante hian kan nun hman dan an hril ve thin avangin tuna kan ngaihsan leh an hnung kan zui te hi kan thatpui em tih leh kan entawnin kan nunah hma kan sawn phah em tih hi inzawh a pawimawh ka ti.
19. Ngaihsan tur dik nia i hriat:
- Eng dinhmun ah pawh ding se, eng hna pawh thawk se, mi rinawm leh thawkrim te hi ka ngaisang thin hle a. A tha tur lam zawng leh kan improve theih nana min inspire tu te chu tupawh ni se ngaihsan tlak an niin ka hria.
20. Hlawhtlinna tura pawimawh:
Thawhrimna leh inngaihtlawmna hi ka dah pawimawh ber thin.
21. hloh i hlauh ber:
Kan nunah engpawh thleng se, nitin thatlam kan pan zel thei ani tih rinna hi.
22. Hnam dang nupui pasal neih hi:
- Inneihna leh hmangaihna hi nihna leh hnam in a hril a niin kei chuan ka hrelo. Mahni hnampui kan nei emaw neilo emaw hi mahni zalenna nen ngeia thuthlukna kan siam turah ka ngai. Hemi thu ah phei chuan hmeichhiate hi diriamna leh sawichhiatna a tam thin hle a. An nun hre miahlo leh tawnpui miahloin an pasal neih tur an sawisak hi kei chuan tih turah ka ngai lo. Hnam boralna hi hnam dang neihah a niin ka hre lova, kei chuan Mizo nih awmzia kan theihnghilh te, eirukna te, thatchhiatna te, in duhsak aia in sawisel chin te hi hnam boralnaah ka ngai zawk a ni.
I thalaipuite tan fuihna---
- Kan thatlai nun hi kan nun kalhmang hril bertu a ni a, chuvang chuan kan hun neih angte hmang tangkai ila. Engpawh ti duh ila, taimakna leh rinawmna hi vawng zel ang u. Kan ram kalhmanga lungawi lohna kan neih chuan keimahni hi siamtha turin thawk ila, sawiselah I duhtawk lo ang u. Kan hma hun chu kan thu a ni a, chuvang chuan kan huam phawt chuan kan mimal nun theuh leh kan ram hi hma kan sawmpui thei ani.
EXPLOREMIZORAM.COM i hmuh dan:
- Tun ang khawvela news source pawimawh leh access awlsam tak a niin ka hria. Nikum atang tawhin ka follow a, an content pawh ka chhiar ve reng thin a. Belhchian a dawl a, hmasawn tur leh tang zel tur pawhin duhsakna sang tak ka hlan a ni.
Ashley Lalremruati Varsity Miss 2019 a nihnaa EXPLOREMIZORAM.COM in kan kawmna hetah hian a awm.
- H Zate
Founder/Editor
Explore Mizoram
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Twitter: https://twitter.com/exploremizoram
Instagram: https://www.instagram.com/explore.mizoram
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: