FEATURING: MZU Varsity Miss 2019 - Ashley Lalremruati

Mizoram University (MZU) Kutpui Virthli 2019 hman zawh taka Varsity Miss 2019 atana thlan Ashley Lalremruati leh EXPLOREMIZORAM.COM Founder H. Zate inkawmna hi lo chhiar rawh le.

   

Nula fel, Hmeltha leh lehkhathiam hi exploremizoram.com chuan kan chhuang a, a hmalam hunah hlawhtlinna chang zel turin duhsakna kan hlan e.


Ashley emaw Ash emaw a a thianten an koh thin Ashley Lalremruati hi 1997 January ni 4 khan fam Zoliansanga leh Lalhmachhuani te fa upa ber dawttu niin a lo piang a. Ashley te hi Mission veng, Aizawl a khawsa leh cheng an ni.


Ashley te hi unau pali niin, mipa pakhat leh hmeichhe pathum an ni a, a upa ber dawttu a ni.




Ashley hi Miss Varsity 2019 atan thlan a ni a, tunah hian MZU ah M.A Economics a zir mek a ni.


Ashley chuan, "Ka naupan lai atang tawhin lehkhabu chhiar nuam ka ti a, tun thlengin ka hunawl ah chuan lehkha chhiar nuam ka ti ber." tiin a tui zawng a sawi.

 


Duhzawng leh ngainat zawng hrang hrangte:---
Lehkhabu: Lehkhabu hi tun hnaiah chuan fiction ka chhiar tlem tawh zawk a, autobiographies leh non - fiction ka chhiar deuh ber. Malcolm Gladwell a ziah hi ka chhiar nasa a, ka chhiar nawn peih reng bawk. Zirna lamah pawh ka hmang tangkai.
Actor/Actress: Actress ah chuan Emma Watson hi ka naupan lai atangin ka ngaisang. Harry potter ka duh mai bakah a personal life pawh a ngaihsanawm ka ti a. A acting career bakah hmeichhe dinhmun chawisang tura a hnathawh vang hian ka ngaisang zual.
Zaithiam: Zaithiam sawi bik tur em em ka nei lo. Genre hrang hrang ka ngaithla kual nasa.
Chawhmeh: Alu, engti ang pawh a siam a awm chuan  ka chaw ei a tui a ni mai.
Hla: Hla duh chu ka ngah a, mahse ka ngaihthlak ngun ber leh ka pan ber thin chu Casting Crowns- Who am I
Hmun: Hmun hrang hrang kalin zin kual ve tawh mah ila ka ngaih ber chu Mizoram a ni leh nge nge thin.
Ziaktu: Malcolm Galdwell, JK Rowling, Tolkien
Mizia: Mi rinawm, rilru puthmang tluangtlam tak bula awm nuam ka ti bera ka ngaina ber bawk.

  

Mize ngainat loh zawng:
Mi rilru puthmang leh dinhmun hriatthiam pui tum lo hi ngainat an har ka ti thin.


Kawppui tura duhzawng: 
Mi rinawm leh rilru tluangtlam, mi rilru puthmang hriatthiam pui thiam. Hlim ni leh harsat nia kawm theih tur.




Relationship status: Single

Aim in Life: Eng ang career pawh nei i la, hlim leh mi dang tana malsawmna nih ka duh a, ka tum fan.

  


Miss Varsity 2019 atan thlan i ni a, he dinhmun hi i luah i inring reng em?
- Tun Varsity competition ka tel dawn hian inrin tawklohna a tam ve lutuk a. Mahse ka chhungte leh ka thianten inrintawkna min pe reng a. He dinhmun hi luah turin ka inring pha loa, mahse mahni theih ang tawka thaa ka tih theih nan ka theihtawp ka chhuah ve tawp a ni.


 Miss Varsity 2019 atana thlan i nih a i rilru puthmang leh i awm dan?
-Pageant hrim hrima la tel ngai lo ka nih avangin keima tawka chuan ka huphurh tak meuh a. Ka tel dawn tih a chian atang khan ka rilru pawh ka siam fel a, ka thiltih leh telna reng rengah tichhe duhlo mi ka ni ve hrim hrima. Chuvang chuan zirlai lam emaw hetiang lam pawh ni se, ka theihtawp ka chhuah anga, a dinhmun luah lam ni loin keimahin ka hlawkpui phawt chuan ka lawm ang ka ti a. A result puan thleng pawh khan kei chuan awih harsa ka la ti.



Modelling lam hi i tui reng em?
- Ka la ngaihtuah ngai lo hrim hrim a, modelling career nei tur chuan tui tawk ka inti thei lo.


Miss Varsity hi thlan zel chiah i ngai em? A thlan danah te thurawn i nei em?
- A hmain lo hmu ve tawh thin mah ila ka tel atang khan he competition hi a nihna ka hrechiang ve chauh a. Keimah leh ka telpuite'n mimal tak pawhin kan hlawkpuiin ka hria. Stage ah chuan thil hrang hrang atan inlan ve fo tawh mah ila Varsity hi chu ka tan pawh thil danglam tak a ni a, mimal pawhin ka hlawkpui a, personal growth atan pawh min puiin ka hria.

  

Tuna MZU dinhmun, i hmuh dan?
- MZU hi a la naupan ang aiin a ropuiin ka hria. Student han nih ve meuh chuan a university life hi belhchian a dawlin ka hria a, kei ngei pawhin ka rin phak bakin zirlai leh mimal nunah ka hlawkpui.

  

Kohhran, Khawtlang leh nangmah?
-Kohhran leh khawtlangah hian zirlai ka nihna ka dah pawimawh hrih avangin ka tel tam lutuk lo. Hunawl leh chawlh ah te chuan theih ang angin inhmang mah ila, semester laklawhah chuan inkhawm leh tul zual bakah ka kal vak lo.


  


Social media leh nangmah?
-Social media ah hian WhatsApp, Instagram leh Snapchat bak ka hmang lem lo. A khawih tlem pawl tak ka nih ka ring. Account te pawh nei mah ila ka active vak lova, ka hunawl hnawh khah nan ka hman bak hi chu social media ka dah pawimawh vak lo.


  

Mizo hnam ṭhanmawh bawk nia i hriat?
- Kan working hours tlem lutuk leh nawmsak kan dah pawimawh lutuk hi kei chuan ka vei a. Eng line mah sawisel thei ka ni loa, thawkrim tak tak eng line ah pawh an awm. Mahse ni tina darkar 24 ah hian kan hun hi a tha thei ang ber leh hlawk thei ang bera hman tum teuh ila chuan hma kan sawn chak zawk ngawtin ka ring.

Mizo hnam damna atana  kawng awm nia i hriat?
- Ka sawi ang khian mahni theuhin nun duh dan leh ngaih pawimawh hran theuh nei mah ila, kan hun neih angah hian kan thiamna leh tuina hi hmasawnpui tum theuh ila, nawmsak ni pawh awm mah se, thawhrim leh taimak hmasak ila, keimahni nih theih ang sang ber leh tha ber nih tum theuh ila. Chumi hre renga nun hman chu kei pawhin ka zir mek a ni.


Hnam chhan nana Hmeichhiate ṭangkaina leh mawhphurna?
Hmeichhiate hi Mizo society ah chuan in leh naupang enkawl tu ber an nihna ah hian mawhphurhna an nei sang hle a. Hnam chhan nana pawimawh ka tih chu naupang leh chhungkua kan inzirtirna hi a ni a. Mizo in kan ngaihhlut te, kan thawnthu te, kan hla te hi chhungkuaah hian inhrilh nasa in uar thei ila. Mizo incheina te hi occassion chauh loa uar turin inzirtir thei ila. Zirlai ang zawng niloa ina kan nunpui chuan kan hnam nihna mimal, chhungkua leh khawtlang in kan chhawm nung zel turah ka ngai. Hemi kawngah hian hmeichhia te an pawimawh zualin ka hria.

Naupang Ashley leh a laizawnnu

Zofate inpumkhatna  hi a thlen theih i ring em? Thleng thei turin engnge pawimawh nia i hriat?
- Ring lutuk e. A tul hunah chuan kan inpumkhat pawhin ka hria. Hnam anga kan dinhmun a derthawng nia kan hriat chuan kan inpumkhat tha hle a, hemi zia hi kan buai lai ringawt ni loin kan ralmuan lai pawhin pu chhunzawm thei ila ka ti. 
Mizo theuh kan ni a, chumi hre renga inthliarna leh inen hranna tel loa kan thawh ho a, kan nun ho theih phawt chuan hnam inpumkhat leh tangrual kan ni mai ah ka ngai.


MZP in ZOFEST a buatsaih ṭhin hian Zofate inunauna kawngah a thawhhlawkin i hria em?
- Mizo hmun hrang hrang ami kal khawm tir theia, kan hnam chawisang leh hlut tura kalkhawm tir thei apiang chuan Zofate inunauna kawngah hma a la niin ka ngaia, chutiang chiah chuan ZOFEST pawhin a thawh hlawkin ka hria a ni.


I thalaipuite tan
- Tun ang khawvelah chuan engpawh ti duh ila, engpawh ni duh ila, a hma zawng aiin kawng a tha in a awlsam tawh zawk. Chumi hre renga keimahni teuh leh kan ram tana kan nih theih tha ber, eng dinhmunah pawh nih kan tum teuh chuan, tun atanga kum 20/30 lekah pawh kan ram dinhmun chu inthlak hlawk thei ani. Chumi atan chuan inpui tawnin hma la tlang ang u.


 

www.exploremizoram.com i hmuh dan:-
- Mizote in kan mamawh tak outlet niin ka hria a, kan tan chauh ni lovin hnam dang tan pawh thil hlawkthlak tak a niin ka hria. Belhchian a dawl a, hmasawn turin duhsakna ka hlan a, hmasawn turin ka beisei bawk.


  

Photographer: Ricky Chawngthu

( He website hi a kal zel theihna fakna awm hi lo click ve thin la. Post hi lo share ve thin ta che.)




_________________

TT Arts, Chanmari Aizawl-ah T Shirt print hrang hrang an ti thei.


Call/ WhatsApp +919615332721




Post a Comment

0 Comments