Zoram Thar-in Zofate Hnam Lungphun phun dawn

Aizawl | September 30, 2020: Zoram Thar Zofate Lairelna chuan khawvel pum huap “Zofate Haw Runpui leh Hnam Inkhawmpui Thianghlim” chu March 26-28, 2021 ah Zofate Pathian Biakinpui hmun Thenzawl Kanan Vengah neih an tum a,  He haw runpuiah hian Hnam Lungphun an tum niin Zoram Thar chuan vawiin khan thuthar thehdarhtute kawmin an sawi.

 

Zoram thar hruaitute sawi danin, he Hnam lungphun hi, khawvel puma Zova thlah Zofate chu thlah khat (one ancestor) hnam khat (one nation) leh unau vek kan ni tih puanna, nemnghehna leh hriattirna tura lungphun a ni ang.

Zofate hnam lungphun awmzia, phun chhan leh lungphun awm dan tur Dr. Zaichhawna Hlawndo-in Pathian hnen aṭanga a lo dawn dan chu hetiang hian a tarlang.

1. A san zawng Ft 70

Zofate hnam lungphun tur  san zawng hi feet 70 a ni dawn a, hei hian a entir chu: (1) Kum 70 chuang British in Zofate chu rorelna hrang hrang- India, Myanmar leh Bangladesh ah hnam hrang hrang anga min ṭhendarh hun kha a tawp tawh dawn tih a entir. (2) Republic of India rorelna hnuaia kum 70 (1950-2020) hnam hrang hranga ṭhendarh leh awpbehna ata zalenna dar leh hnam inpumkhatna jubilee dar vuak ṭan a ni dawn tih a entir. (3) Zofate chu Kristian kan ni a, Bible in ami Israelte sal tanna kum 70 a ral hnuah ka rawn kan leh ang che u a in awmna ngaiah ka dah ang che u a tih ang khan kan awmna hnam hming dik tak Zofa-te ah Lalpan min dah tawh dawn tih a entir. 

 

2.  A  chhipah Kross:

Zofate hnam lungphun chung berah Kross a awm ang. He Kross hian a entir chu (1) Zofate hnam nihna dik tak innghahna chu Pathian Thuthlung - Kalvari tlang Kross a Lal Isuan a rawn dinah khan a ni tih a entir. (2) Kross hian Pathian fa ni tlak tawhlo Zofate Pathian fate kan nih leh theihna kawng a rawn hawnna a entir. (3) Kross hian Zofate chenna rama Pathian Lal ram lo ding tur a entir a. Kross banah hian a chhuk zawngin ‘I lal ram lo thleng rawh se’  tih ziak a ni ang. Kross ban-ah English in (rawng varin) “Thy Kingdom Come” tih a in ziak bawk ang.

3.  Khawvel lem (globe):

Kross hnuaiah hian khawvel map (globe) a awm ang. Zofate chu Bible in khawvel tana rahchhuah tur hnam a tih kan nihna te, Pathian hnam thlan, hnam ropui Kristian hnam leh Kristian ram kan nih turte a en tir a. Khawvel map Globe chhungah hian Zofate kan nihna thar tur leh khawvel pum tana Zofate tih tur pathum in dawtin a in ziak ang : –  (1) Khawvel Eng (Light to the world)

(2) Hnamte Tana Eng (Light to the nations) leh 

(3) Khawvel Pum Tana Ṭawngtaina Inpui (House of prayer for all nations).  

  4. Lungthu Pathum: 

Khawvel map (globe) chu Zofaten kan pi leh pute hun atanga eirawngbawl nana thuk  kan hman Lungthu Pathumin do a ni ang. He lungthu pathum hian hnam hruihrual pathum atanga hnam hrui khat siam tur a entir a. Zofate chu kum tam tak hnamah kan bo a, tunah chuan hnam hruikhat kan vuan tawh dawn tih a entir ang. Chu hnam hruihrual ban pathumah chuan chhuk zawngin ZOFATE tih a in ziak ang, chu chuan khawvel pumpui hi Pathian Lal Ram Chanchintha hmanga dokang tura Zofate hi Lalpan mawhphurhna a pek hnam kan ni tih a entir. He lungthu Pathum hian Pathian thuthlung pathum- Lal thuthlung, Hnam thuthlung leh Ram thuthlung a entir bawk ang. 

 

5. Lung kil thum nei:

A lai takah lung kil thum nei a chhip zum  a ding ang. He lung kil thum nei inzawm hian Zofate chu tuma tih keh leh phelh theih tawh loh turin hnamah kan insuihin kan ding nghet tawh dawn a ni tih a entir ang. He lungah hian  Zofate hi thlahtu pakhat Zova aṭanga lo chhuak vek kan nih dan ziah a ni ang. Kil thum aṭangin chi zar peng hrang lo chhuahdan ziah a ni ang. 

6.  Zofate chi hming:

Lungthu pathum hnuaiah hian Zofate chi hming thlahtu bul Zova thlahte kan nih vek dan atanga chhuina ziah kual a ni ang. Khawvel puma Zofate chi hming zawng zawng ziah lan vek a ni ang. Lungphun tur Pu Zaichhawna Hlawndo in a dawn dan chuan chipeng 12 ah lung 12 phun tur a ni. Bible a Pathian hnam thlan hnam 12 te, Joshuan hnam lung 12 a phun leh Thuthlung Thar a zirtir 12 te hmanga hnam din thar lehna nen a in zawm ang. Zofate hi kan lo bo rei tawh avangin chi emaw hnam hming pawh miten min lo phuah sakin keimahni pawhin kan lo phuah hnem tawh hle. Mahse thahtu thuhmun leh hnam khat Zofa kan nihna hi a pawimawh ber chu a ni ang.  Tuna kan thlahtu bul Zova aṭanga kan in thlah chhawn dan kan han chhui theih dan chu a hnuaia mi ang hi a ni a, Lungphun hmain chiang leh zualin Hnam Lungphun Zirhona te la buatsaih a ni ang.