ZNP a ding leh ta; Party hruaitu tur la inruat rih lo

Aizawl | September 5, 2020: ZPM kalphung duh tawklo ten nimin piah khan Aizawl Press Club-ah thuthar lakhawmtute kawmin ZPM kalphung duh tâwk loin ZNP an din thar leh thu an tarlang a, Party hruaitu tur Office Bearer erawh an la inruat rih lo nii  an sawi.



Press Conf thu hla
ZPM Elected Office Bearer-te Interim Period a lo tawp tak avangin ZPM Gen. Hqrs Political Affairs Committee(PAC) Extended, ZPM Office-ah July 15th 2020 khan Meeting neih a ni a. PAC-ah hian  VUC kuta thutawp siam tir duh aiin Party Constitution anga Executive Committee kutah thutawp siam tura thlen nise tih duh lam hi kan tam zawk a. Tuna hruaitu dinglaite chuan ‘Interim hruaitute term hi kum 2023 General Election hmang thleng se’ ti a Val Upa Council-ah in ruattir an duh thung. 

 Chutih laiin keini lam chuan Constitutionaly a Executive kut a dah a, thutawp siam tir kan duh ve thung. (Party Constitution-ah chuan “Executive-in thutawp a siam thei lo or a duh vang rengin VUC kutah thutawp siam turin a dah thei ang” tih a ni). 
 Hemi ni a kan meeting ah hian Chair lam atangin, “Opposition laiin Congress leh MNF-te pawh an inthlang ngai lova, ZPM pawh inthlang lovin, interim period chhunga hruaitu (Elected OB) - te hian Full Term - 2023 thlenga hmang turin VUC kut-ah thuneihna pek a in ruattir mai ni rawh se”, tiin  rawtna a siam a, nasa takin member te min nawr a ni.
 Keini lam chuan, “Constitutionaly-in Executive committee kutah dah nise, Executive committee chuan tha an tih angin rel sela, Party chuan a pawm tur chu a ni” tiin kan tang ve thung.
 Nasa taka thu kan inchuh hnuah meeting chuan hetiang hian thutlukna a siam ta a ni. “September 2020 thla ral hmain Executive Meeting koh nise, rel ni rawh se. Hrileng avanga meeting koh a theih loh chuan PAC Committee-in thlir hmasa leh phawt rawh se” tia thu dah a ni.
 July 15th 2020 leh August 7th. 2020 chhung hian ZPM Party chhungah thil danglam tak lo thleng a awm ta a ni.
 Executive Committee koh hun nghah a nih chhung hian PAC Extended Meeting-in thu a lo dah tawh chu an puangzar duh lova, Executive Committee an ko duh  bawk lova.  chumi karah chuan Pu Lalduhoma’n inleng a nei a, a inlengte hi ZPM hruaitute an ni. Heng a inlengte hi Group thum-ah an insiam a, hetiang hian :
Group 1 -na : ZPM MLA - 5(panga). 
Group 2 -na :  ZPM Legal Cell member-te.
Group 3 -na :  ZPM Elected OB leh Secretary General.
 Pu Lalduhoma MLA inlengte hian thu thuhmun, thu ken in ang vek, a hrang theuhvin, ni hran theuhvah an zuk sawi pui a. Heta an thu ken tlangpui chu hei hi a ni :
 “President hi chuh lo turin. Party President a nih chuan MLA atangin an disqualified ang. MLA Fund te, MLA te hamthatna a dawn ve zawng zawng a chan bawk ang. Tin, Assembly House-a a perfomance tha tak tak te chu an zingah amah ang tumah kan awm lo, chu chu Party tan hlohna nasa tak a ni a, MLA a nih loh chuan Party tan channa a ni ang a, kan thatpui loh zawk ang” tih hi a ni.
 Pu Lalduhoma hnenah hian Elected OB, Secy.Gen. telin a hranpain an leng a, anni hian Chief Minister Candidate-ah an dah tur thu leh, Party chhungkuaa a hnungzuitu ZNP mi leh sate appointment chung changa a mi duhsak zawngte inthlahrung hauh lova an hnena theh tur leh lo ngaihtuahsak leh pawm sak an tiam bawk a ni.
 Committee-naa chair lam duh dan - Interim Term VUC kuta dah chu a lo hnial ngar ngar thin ni mah se, thiam tak leh mawi tak leh duhsak tak anga thlemna chu hnial ngam lovin, an barhluih thu chu a lo Amen sak ta a ni.
 Pu Lalduhoma hian a hnungzuitute, ama tana kumkhua a rinawm tak leh a dinchhuah hun nghakhlel em em a lo thlirtute pawh tumah rawn hman lova, a chhanna hriat nghal an duh bawk si avangin an rawtna a lo pawm sak chung changah hian, ZNP mipuite hnenah hriatthiamna leh ngaihdamna kan dil sak tak meuh meuh a, Pu Lalduhoma Politic zin kawng hi a bum bohvin kan lainat takzet a ni.
 Tin, August 12, 2020-ah PAC Extended Committee neih a ni leh a, he committee-ah hian member tam zawkten Constitutionaly a Executive Committee kuta Interim period dah kan duh thu leh Executive member-te an zahawm em avanga palzut lo hram tura kan ngen laiin, “Ngaihdan ka nei, sawi tawh suh u” tiin memberte thu sawi lai chu a kutin a hui thu a, a Veto ta hmiah a, Secretary hnenah chuan, “Ti hian ziak rawh”, tiin,  “ZPM General Headquarter hruaitute Term tawp chung chang ngaihtuah turin Executive Committee hi Sept. 2020 ral hmain kan ko thei dawn ta lo niin kan hria a. Chuvangin, Val Upa Council- kutah Gen.Hqrs hruaitu thar ruat tura ngen nise kan ti. Unconditional-in Val Upa Council kutah i dah ang u” tiin a minute tir ta nghal a ni.
 Thingbul lung bul be thin Missionary-te kaltlang a chanchin tha hmanga a zawhchhuah Zofate hi Lalpa chhiahhlawh Pastor Chhawna hmangin kan kawng tur hi sawi lawk a ni tawh a. Pastor Chhawna hnena Inlarna Bu, chhut 9-na, page 106-naah chiang takin a lo lang a, “Varparh Neitu khan ‘Arsi hnuhnung ber ka ni a, ka eng hi Niin a rawn thlak dawn a ni. En rawh’”a ti a. Ni a lo chhuak eng tuih mai a. Hnam hruai turin mihlimho chu Ni engah chuan an lam mup mup mai a, kan ram chu pan lam neiin a kal a, a eng ruih mai a. Malsawmna Maicham pawh kan hnaih ta hle a....” tih kan hmuh kha. Heng kan rama Political Party-te rorelna an kuta pek a nih turah hian, Party hming a lang ngai lo, symbol chiah a lang thin. Pastor Chhawna Inlarna hmuhah hian Lukhum a lang lo. Kan rama roreltu turte symbol chu Sai, Ar, Kutphah, Arsi leh Ni chiah a lang. Inlarna ang zelin a lo lan hun a awm. Keini Zoram Nationalist Party-te hi Ni symbol a hmangtu, Election Commission of India pawhin a recognise leh a register thlap kan ni.
 Keiniho hi mei mit mai tur lo chhawm nung tura kal hmasa mai kan ni a, Ni hnuai a ram rorelna kan kuta a awm theihna turin, ‘hawh u, i din thar leh ang u’ tiin kan han in sawm tak meuh meuh a ni.

Post a Comment

0 Comments