Vawk pul hri hlauhawm African Swine Fever laka himna tur ngaihtuah

Aizawl | September 8, 2020: Vawk pul hri hlauhawm tak African Swine Fever a lo luh lohnana hma la tura din District Level Coordination Committee on African Swine Fever chu vawiin khan an Chairman, Aizawl DC Pu R.Lalramnghaka hovin Aizawl DC Conference Hall-ah an thukhawm.

Khawvel hmun hrang hrang tibuai mektu African Swine Fever chu India rama a lo luh ve tak avang leh thenawm state-ah pawh vawk tam tak a suat tawh avangin Mizoram a luh lohna turin theihtawp a tan lak a ngai, Aizawl DC chuan a ti a. He natna hian China ramah vawk maktaduai 40 a suat tawh a, India ramah lo lut tan mekin hmarchhakah Assam leh Arunachal Pradesh ah vawk 20,000 chuang a suat tawh a, Meghalaya-ah pawh kumin August khan ASF vang ni ngei tura ngaihin vawk an thi nual tawh, tih a sawi.

Member Secretary Dr Lalnghinglova chuan African Swine Fever chungchang sawifiahin he natna kai vawkte chu an thi ngei ngei a, a enkawlna damdawi leh hri venna vaccine a awm loh avangin he natna tihbaiawm tak hi Mizoramah a lo luh loh nan inven a pawimawh takzet a ni, a ti.

AFS natna hrik hi vawk thi tawh leh vawksaah thla 3 atanga thla 6 aia rei mah a nung thei a. ASF vanga vawk thite hi halral emaw thuk taka phumbo an nih loh chuan an ruang emaw saah rei tak chhung a nung a ni. Tunlaia Mizoram hmun hrang hranga kan ei uar em em, frozen meat/ processed meat ah pawh rei tak chhung a dam thei a. Mihringah natna thlen lo mahse vawk vulhtu mihring te hi a thehdarhtuah an tang thei. Vawk leh vawk in contact (in ngheng tawn) atanga inkaichhawn a ni ber a. Vawk chaw (pork feed) hmangin a darh thei a, saphihrik (tick) pawhin a thehdarh. Sanghal te pawhin he natna hi an kaiin an thehdarh thei bawk a ni.

He natna hian Mizoram a lo luh lohna turin tanrual a ngai hle, tih meeting-ah hian uar taka sawilan a ni a. Mizoram hmun hrang hranga vawkvulha eizawngtute tan chhiatna nasa tak a thlen dawn avangin frozen pork la luta ei zawng thin te, a leitute leh pawn lam atanga vawk leh vawksa atanga thil siam laluta, zuar leh lei thinte zawng zawng hnenah Committee chuan Mizoram himna tura ti tawh lo turin a ngen tak meuh a. Vawk, vawksa leh vawk atanga thil siam lakluh khapna dan, State sawrkar leh DC ten an tihchhuah chu ram tan a nih hriaa zawm theuh turin mitinte an ngen a ni.

- DIPR

Post a Comment

0 Comments