Thla 11 chhungin Mizoram Health Care Scheme hnuaiah cheng vbch 32 chuang pe chhuak - report

Aizawl | Sept 9, 2020: MSHCS Governing Body vawiina thukhawm chuan nikum October ni 1 atanga kumin September ni 3,2020 thlenga Revised Mizoram Health Care Scheme hnuaia hamthatna pek dan an thlirho a. He scheme hian hospital a riaklutte bakah natna 26 OPD a inenkawlna a huam a. He thla 11 chhung hian a vaiin Rs. 32,59,88,780 pekchhuah a niin, heng zingah hian private hospital a inenkawl an tam zawk a (7435), sorkar hospital a inenkawl mi 4190 an ni.

AB PM-JAY hnuaia inenkawlna man bill peksak hi a vaiin Rs. 19,69,17,804 a ni a. Sawrkar hospital a inenkawl mi 16,906 niin private hospital a inenkawl chu 2084 an ni thung. State Referral Hospital Falkawn chu Covid-19 hrileng avanga covid veite enkawlna tur bik atana hman a nih tak avanga public hospital a inenkawl zat hi tlak hniam phah ta nia ngaih a ni.

Mizoram State Health Care Scheme Governing Body chu an Chairman Chief Minister Pu Zoramthanga hovin a vawi 23-na atan vawiin khan CM Conference Hall-ah an thukhawm a. Co-Chairman pahnih Health Minister Dr. R. Lalthangliana leh Dr. Z.R Thiamsanga; Vice-Chairman Pu Lalnunmawia Chuaungo, Chief Secretary; Member Secretary Pu H. Lalengmawia, Health Secretary leh member dangte an tel a ni.

Vawiin meeting-ah hian district tin a Health Care Scheme an hman dan a rualkhai loh thu sawi niin, inhrilhhriatna leh inzirtirna tha zawk neih pawimawh an ti a. Chutihrual chuan claim lut zawng zawng atanga natna hrang hrang an thliar chhuah atangin Cancer inenkawlna a langsar ber a. Nau neihna, thin, chuap, kal leh zun kawng natna, zu kaihhnawih natna, pneumonia leh adangte pawh natna tam ber zing a mi a ni.

Vawiin meeting-ah hian sawrkar in mipuite harsatna hrethiam a, state hrisel zawk kan nih theih nan a inenkawlna man tum sak a hma a lakna chu lawmawm an tih thu an sawi a. Amaherawhchu hrilselna tluan tling nei tur chuan hriselna lama tan kan lak thar a, kan theih chen chen a fimkhur theih dan inzirtir thar a pawimawh thu member ten an sawi a. Natna langsar ho en in invawn thianghlim nachang kan hriat thar a pawimawhzia a lang a ni, an ti.

Post a Comment

0 Comments