Supply Minister in Bairabi Screening point thar sakna tur tlawh; MTTA ten an harsatna thlen

Kolasib | September 26, 2020: Vawiin chawhma khan Pu K Lalrinliana, Minister of State, Food, Civil Supplies & Consumer Affairs Department chuan Covid-19 hrileng do nana hmalakna pakhat, Bairabia lirthei lolut khalhtute endikna, Screening point thar sakna tur hmun a enfiah a, bul tan nan Bairabi Village Level Task Force hruaitute hnenah Rs. 20,000 a hlan bawk.

Supply Minister Pu K Lalrinliana chuan Bairabi Medical team leh VLTF hruaitute kawmin an harsatnate a sawipui a, Covid-19 dona kawnga Bairabi khawtlang hruaitute leh thawktute thawhrimna leh inpeknaah lawmthu a sawi. Bairabi VLTF hruaituten anlo thlen tawh angin Screening point chu mihring chenna awm lohna hmunah sawn tur a hmalak a nih theih nan a bultan nan Rs. 20,000 a hlan nghal bawk a ni. Medical team ten thawktu indaihlohna an lo thlen te pawh Health Minister a sawipui tawh thu a sawi a, rang taka hmalak thuai a nih tur thu a sawi bawk a ni.

 

Bairabi Screening point a tlawhnaah hian Mizoram Timber Transporter Association hruaituten Supply Minister hnenah an harsatna an lo thlen a, tun a Bairabi a thing dah khawl sa thawnchhuah theih chhung chu September ni 30, 2020 thleng chauh hun a awm tawh thu an sawi a. Chutih lai chuan wagon 189 vel thing chhekkhawl sa a la awm thu te, Covid-19 vanga a hun taka thawn chhuah thin a nih loh avangin thing thawnchhuah tur tam tak hlutna a tlak hniam thu te leh labour chungchanga harsatnate anlo sawipui bawk a ni. Mizoram Timber Transporter Association hruaitute chuan tun a Bairabia thing chhekkhawl sa awm mekte thawn chhuah nan thla 2 tal a thawnchhuah hun pawhsei a tul thu an sawi a ni.

Dr. R.K. Lalthlamuana, SMO, Kolasib chuan Bairabi Screening point chungchang report pein Medical Officer 1 leh Laboratory Technician 2 duty an awm a, staff 4 dahbelh tur a ruahman mek a nih thu a sawi a. Bairabi Screening point kaltlangin mi 13813 endik tawh a ni a, September ni 12, 2020 atangin Rapid Antigen Test neih tan niin mi 446 endik tawh an ni bawk. SMO chuan Covid-19 kaihhnawiha hnuchhui kawnga hriattur tul leh hemi kawng a VLTF te mawhphurna inhrilhhriatna hun a hmang bawk a ni.

- DIPR