SPORTS: JUSTICE FOR JEJE!

#JusticeForJeje

- Lalnghinghlova Hmar

Lawmman dawng thei turin a zâwnin vawi thum i hming chhawp chhuak se, mahni aia dawng âwm loa i ngaih zawkin kum tin mai dawn khalh ziah ta che se la, i lungawi hauh lo ang - Jeje Lalpekhlua chunga thil thleng hi hriatthiam a harsa khawp mai.

India sorkar laipuia Ministry of Youth Affairs and Sports-in infiammite chawimawina a pek thin Arjuna Award-in a ken tel cheng nuai 15 dawn loh avanga vuipui kan ni lo a, a phu zawk hnena ta chawimawina laksak a, a phu lo zawk kuta hlan hi kan duh loh chu a ni.

Bûkna dik lo!

Mizo footballer langsar, vawi tam tak Mizoram leh India ram tihmingthatu Jeje hi sorkar laipuiin infiammite chawimawina a pek thin Arjuna Award dawng turin vawi thum a hming an chhawp chhuak tawh. He chawimawina dawn phû khawpa record a neih that avanga a hming pawh hi a zawna vawi thum ngawt lang thei a ni a, a zawnin vawi thum hnawl a ni.

Kum 2017 khan Bembem Devi, Gurpreet Singh Sandhu leh Jeje-te hming chhawp chhuah a ni a, hmeichhe footballer ropui Bembem Devi hi award hlan a ni a, hei hi chu Jeje-a tan vui tur a ni lo ang.

Kum 2019-ah Gurpreet Singh Sandhu leh Jeje-te chu Arjuna Award dawng thei turin AIFF-in a chhawp chhuak leh a, Jeje aia India tana khel tlem zawk leh mimal chawimawina dawng tlem zawk goalkeeper Gurpreet chu Arjuna Award pek a ni - hei hi Jeje-a tan leh Mizo tan thik ngei chi a ni tawh - mimal, club leh ram tana an khelh dan tehna awm thei hrang hrangah Jeje hi a sang zawk vek a ni.

 

Kum 2020 a inher chhuak a, Jeje hi Arjuna Award dawng thei tur zingah Sandesh Jhingan leh Bala Devi nen AIFF chuan a thlang leh a, a hmaa nomination-a hming lang phak awm chhun (vawi hnih a lang tawh) Jeje hi dawng ngei tur niin a lang tawh.  Ministry of Youth Affairs and Sports chuan Arjune Award dawng tur an puang ta a, Jeje aia India tana game 20-a khel tlem zawk, mimal chawimawina leh club leh ram tana chawimawina lak kawnga engti kawng maha Jeje el phak lo, Sandesh Jhingan hnenah he chawimawina hlu tak hi hlan a ni leh ta a ni.

Chawimawina a awm em?

Mizoram Football Association chuan Mizo footballer chunga thil thleng hi ngawih bopui chi niin a hre lo. Mimal thil mah ni se hnam thil a ni tel tlat a, MFA pûm chhuak footballer-in a phu ang chawimawina a hmu lo hi a vuipui a, Union Sports Minister hnenah lehkha a thawn. Hei mai hi ni loin All India Football Federation President leh General Secretary hnenah pawh lehkha hi a pe tel bawk (Lehkhathawn Mizo tawnga lehlin a tawpah dah a ni).

India Junior team lama Jeje-a bul tanna hi MFA kal tlangin a ni. MFA-in India tana khel thei tura 'beiseiawm' junior player a tirh zinga mi a ni a, coach-te duhzawng lo niin an lo thlang nalh a, Indian Arrows-ah awm chhoin a bak chu sawi zui a ngai lo - Arjuna Award dawng thei turin a zawnin tum thum an thlang hial a nih hi.

Hnahthial tlangval hian India rama footballer chawimawina sang a hui kim tawh a tih theih. AIFF Player of the Year hial pawh a ni tawh a, tun hnaia an thlan tak pahnih Gurpreet leh Sandesh-te hian he chawimawina hi an la dawng lo hrim hrim a; Indian footballer-te player tha tih ber FPAI Indian Player of the Year pawh an la ni ve ngai lo - Mizo tlangval hi chuan he chawimawina hlu hi a dawng tawh.

Aw India, ingaihtuah rawh!

Jeje hi pa chhel tak mai a ni a, ka hriat chinah harsatna a neih pawhin chhel takin a tuar a, vui zawngin thil a la ngai lo. A vawi thumna atana award dawng tura chhawp chhuah ni chunga paih a ni chu a la na ve khawp mai a, "India tana theihtawp ka chhuahna leh ka record hrang hrangte an hre duh lo zel a nih chuan ram tana khelh tawh loh tawp mai tur em ni ang?' a rawn ti hman hial.

Jeje hian chawimawina beisei vanga inkhel a nih loh rualin chawimawina dawng thei tura an thlang ve ziah chunga a chhan hriat si loha an paih chu hrehawm a tih thu a sawi a, hetiang taka a chunga thleng hi player dang chungah thleng ve tawh lo se a duh thute a sawi - keiin thiam ang angin ka lo hnem ve.

Dik tak chuan Indian footballer piang tawh zingah goal thun hnem lama parukna a ni tawh a, mimal leh club lama a record ang hi amah aia an thlante hian an phak lo mai ni loin a hnaih pawh an hnaih phak lo - India tana inkhelh tam lamah pawh an phak hek lo.

Ka vui phakna apiangah ka vui thu ka zuk sawi ve a, AIFF lamah phei chuan ka vui kim deuh vek a ni ber a, "AIFF-in Player of the Year atana a la thlan loh pahnih hnenah Arjuna Award pek a ni a, AIFF award pek hi tehna atana an hmang duh lo a nih pawhin ram tana a khelh zat tal hi tehnaah hmang rawh se. Mimal chawimawina a dawn zozai atang pawh hian teh se, khawi kil atanga teh pawhin Jeje aia an thlan pahnihte hian an phak thei lo hrim hrim," tiin ka zuk âng ve nasa hle.

#JusticeForJeje

Dik tak chuan mimal chawimawina dawn leh dawn loh hi a state anga lo vuipui chiam a mawi leh mawi lohte ngaihtuah a ngai a, MFA lama kan hotute erawh chuan, "MFA atanga chhuak player a ni a, keiniin a thlavang kan hauhsak lohin tunge hauhsak ang?" tiin Sports Ministry lama lehkha thawn kha kan rel a ni - Jeje hian a phû ang chawimawina hi dawng ngei rawh se.

MFA berin lehkha kan thawn tawh a, chumi baka hetianga mimal taka au chhuak zui tur ka nih leh nih loh pawh ka inngaihtuah ve tho a, MFA zara AIFF lama kan nihnate ngaihtuah chung pawhin player pakhat thlavang hauha hetia au chhuah hi a mawi ber lo thei a, a tul lem lo thei tihte ngaihtuah tel mah ila, 'Hetiang huna lo polite ve em em ringawta ngawih reng hi a dik lo," tih chu ka ngaihdan a ni - Jeje hnena chawimawina an hlan loh chhan tal hi zawh fiah a ngai tlat a ni.

MFA-in Sports Ministry lama lehkha a thawnte chu vairam media lamin an lo hre zau zel a, a khât tawkin phone kan dawng ve reng a, kan hnam dang thianten a thehdarh lamah min lo pui bawk nen, India ram media lian zawng zawng deuhthawin Arjuna Award dawng tura Jeje an thlan loh thu leh kan lehkha thawnte pawh chu min put darhsak ta a ni.

Tunah hian Jeje-a tan dikna kan phût a ni mai lo a, amah ang bawka footballer leh infiammi tu pawhin an phu anga chawimawina an dawn hi kan duh - a phu lo zawk hnena chawimawina hlan hi ka duh loin kan do tel bawk a ni.

Hei vang hian social media lamah #JusticeForJeje tia campaign ka rawt a, a tidik lotu lamin lo hria se, tun hnuah infiamna khawvelah diknain ro rel tawh rawh se - #JusticeForJeje .

========================================

MFA-IN UNION SPORTS MINISTER HNENA LEHKHA A THAWN MIZO TAWNGA LEHLIN

To,

Mr Kiren Rijiju

Honourable Minister

Ministry of Youth Affairs and Sports

Subject: Arjuna Award dawng tura Jeje Lalpekhlua hnawl a nih chhan

Ka Pu,

Mizoram Football Association (MFA) hmingin chibai ka buk a che.

Mizoram Football Association chuan tun hnaia India infiammi National Sports Day-a chawimawina dang zawng zawngte thinlung takin a lawmpui a, hetihlai hian Mizo footballer chhuanvawr Jeje Lalpekhlua chu Ajuna Award dawng thei tura chhap chhuah zinga vawi thum a tel tawh chunga he award a dawng lo zel hi a chhan kan hre duh a, an thlan dan kimchangte min hrilhfiah theih chuan kan lawm hle ang.

Jeje Lalpekhlua hi Arjuna Award dawng thei tur zingah All India Football Federation chuan a hming vawi thum a chhawp chhuak tawh:

Kum 2017 khan Bembem Devi, Gurpreet Singh Sandhu leh Jeje Lalpekhlua-te hming chhawp chhuah a ni a, hmeichhe footballer Bembem Devi hi award hlan a ni.

Kum 2019-ah Gurpreet Singh Sandhu leh Jeje-te hi Arjuna Award dawng thei turah an thlang leh a, Jeje aia India tana khel tlem zawk leh mimal chawimawina dawng tlem zawk Gurpreet Singh Sandhu chu Arjuna Award pek a ni.

Kum 2020-ah Jeje hi Arjuna Award dawng thei tur zingah Sandesh Jhingan leh Bala Devi nen AIFF chuan a thlang leh a, Jeje aia India tana khel tlem zawk leh mimal chawimawina dawng tlem zawk Sandesh Jhingan hnenah he chawimawina hlu tak hi hlan a ni leh ta a ni.

MFA hian Indian footballer dang chawimawina dawngtute hi a thik a ni lo a; nimahsela Arjuna Award dawng thei tura a thlan dan (criteria) hi a hre chiang duh a, 'Engvangin nge Jeje hi vawi thum lai a hming chhawp chhuah a nih hnuah an thlan loh?' tih hi hriat a phût tlat a ni.

Jeje hian India tan vawi 56 khel tawhin goal 23 a thun tawh a, tuna active player zingah Sunil Chhetri tih lohah India tana goal khung hnem ber a ni a, India tana football khel tawh zinga goal khung tam ber parukna a ni mek.

Jeje aia Arjuna Award dawng ta Gurpreet Singh Sandhu hian India tan vawi 38 chiah a khel tawh a, Sandesh Jhingan  hian vawi 36 a khel tawh a ni. Mimal chawimawina lam en ila hengte hi Jeje hian dawng tawhin tun hnaia mipa footballer Arjuna Award dawngtute hian an phak lo hle a ni:

FPAI Best Young Player Award: 2010–11

I-League Top Indian Goalscorer: 2010-11

AIFF Emerging Player of the Year: 2013

Indian Super League Top Indian Goalscorer: 2014

Indian Super League Emerging Player of the League: 2015

Top Indian Goalscorer in SAFF Championship 2015 (Tied with Sunil Chhetri)

Federation Cup Top Goalscorer: 2015–16

Federation Cup Best Player: 2015–16

FPAI Indian Player of the Year: 2015–16

AIFF Player of the Year: 2016

Ram leh club tana a hlawhtlinna lam hi enin India footballer hlawhtling ber zinga mi a ni a:

I-League: 2014-15

Federation Cup: 2015-16

Indian Super League: 2015, 2017-18

SAFF Championship: 2009, 2011, 2015

Inter Continental Cup: 2018

Hengte hi Jeje Lalpekhlua football zin kawnga a thil tawnte a ni a, India tana a hnathawhte en hian Arjuna Award hlan hi a phu hle niin MFA chuan kan hria a, Arjuna Award dawng thei tura vawi thum lai a hming chhawp chhuah a nih hnua a chawimawina hlan a nih loh chhan hi kan hre duh a, a tehfung dik tak min hrilh a, Jeje Lalpekhlua hnena award pek a nih loh chhan pawh min hrilhfiah nghal turin kan ngen a che.

Sports hmasawnna tura i thawhpui,

(LALNGHINGLOVA HMAR)

Honorary Secretary

Mizoram Football Association