PRESIDENT XI JINPING-AN PAIHTHLAK A HLAU TIAL TIAL- CCP CHHUNGAH AMAH LEH A POLICY DUH LO AN TAM

Sep 13, 2020: China President Xi hi Mao ai khan 'thu neihna a nei  lian zawk'  tih thu Tahir Imin, founder of Uighur Times Agency, Washington DC, chuan London ațang chhuak Chanchinbu lar tak Express.co.uk a hrilh.  "Xi Jinping chiah hi ni hnuaia roreltu zingah  hian  mahni Sorkar hnuaia dinhmun pawimawh 11 luah awm chhun a ni" tih thu  Ms. Cai Xia, CCP Party  professor ni țhin mahse  Chinese Communist Party (CCP) leh President Xi a sawisel avanga CCP ațanga hnawh chhuah chuan thla hmasa lam tawh khan a sawi. "CCP chhungah hian Xi Jinping paih thlak duhna lian tak a awm a, chu chu amah pawh hi a hre chiang bertu zinga mi a ni ngei ang. US hian China ram sum leh pai țhan ti thuanawp tura a na taka a nawr leh beih chhunzawm chho zel anih ngat chuan CCP Central Committee hian thlak an duh ngei ang", Cai Xia chuan a ti. 

President Xi  Jinping hian ram chhung venhimna leh sipai chunga thu neihna hi a vaia pum hmawm vek a duh a, chu chu kum 2022 National Congress neih hma ngeia tih puitlin a duh a ni. 

China ram chhung inawpna zawng zawngah an hla thu nawn chu "Xi-a thu a kawi a ngilin kawng engkimah zawm tur a ni", 
tih hi a ni. 

Kumin July thla khan CCP chhunga  Xi Jinping lam țang ruh tak Chen Yixin chuan party chhungah "hmai hnih neite" țhuah fai an nih tur thu a puang a, heng mite hi party tan an rinawm lo a, party ațang hian an zung chawpa pawh phawi a pho ro tur an ni, a ti a. Hei hi Xi Jinping-an thu neihna sahuai thing vawn reng a duh vanga a remruatna a ni. 

Hetianga rorum taka an inhrosakna hian chhan a nei a,  Xi Jinping thu neihna leh rorel dan kalphung leh a policy a lungawi lo CCP chhungah hian hlawm lian tak an awm a, chung mi te chuan a policy tam tak avangin  lalna leh thu neihna ațanga paih thlak an duh a ni.  Ram chhung a enkawl dan hel beih dan ang maia hrohrang na taka  kalpui leh ram dang nen inlaichinna a ni tela chhe chho zel chuan chu chu a ti zual a ni. 

 Express.co.uk  hnena Andreas Fulda, University of Nottingham  sawi dan chuan: "China General Secretary Xi Jinping  hian thu neihna a hman dan hi a khawngin a vin hle a, Sorkar inawpna chhungah helho beih dan ang maia a khawsa țhin  hian party chhunga mi hrang hrang te ngainat leh lawm a hlawh lo tial tial a ni, " a ti. 
.

"Central Party School professor țhin Ms. Cai Xia chuan tunah zet chuan  CCP chu engmah ti thei lo leh   'political zombie' mai a ni a ti.

Ren Zhiqiang, mi hausa tawntaw property tycoon leh huhang ngah tak chuan President Xi Jinping chu "milem mai a ni, " tiin a ngaihsan loh hle thu a sawi. 

Mr Fulda, senior fellow Asia Research Institute, pawhin China President Xi Jinping rorelna ti derthawng thei hi, Chinese mi  China ram pawn a awm te ațang hian amah duh lohna a nasain a nih theih thu a sawi. A sawi zel dan chuan "Chinese Communist Party pawn lam ațang hian mi  ropui tak tak an rawn lang lo ang tih a sawi theih loh, a nihna takah chuan party chhungah hian mi hriam țha tumahin lawm an hlawh țhin loh avangin a ngaihna thlawt hi an awm lo ve bawk a ni", a ti. 

"Xi Jinping hian thu neihna a pum hmawm hnu hian  Chinese Communist Party pawh hi an inherrem hlei thei tawh loh avangin an hman tlak lohin  thil an ti thei lo ta tial tial a ni. 

"Hmai hnih nei" nia an hriat te CCP ațanga nek chhuah an tum danah hian rorelna hniam ber tualchhung ațanga sipai leh sorkar hna thawk zawng zawng te chu Xi Jinping lam țang te chauhin thu neihna pum hmawm tumna leh a lam țang lo lam te ngaih theih lohna chuan CCP chhungah hian eng boruak nge a thlen dawn tih leh eng anga thukin nge CCP chhunga pawl pahnih (two factions) te innekna thuk leh nat dan hi thil zawng zawng puan hnuai leh zep tlat duh an nih avangin ram dang ațang mai ni lo an ram chhungah ngei pawh hre ril thei fe tan lo chuan hriat mai a harsa khawp ang. 

"Hetiang thil lo thleng hian China ram pumpui chu politics thilah chìrîna, hnung tawlhna  leh ngelngheh lohna nasa tak a thlen a ni".

Chinese Communist Party chhungah hian țhuang hnih (two factions)  an awm a. Kum 2012 kuma Xi Jinping rawn lal dawn țum pawha nasa taka duh loa dodal  lam pawl hi Jiang coalition an ni a, President Jiang Zemin duh dan chawi sang pawl an ni a. An ni lam hi CCP chhungah chuan a fing leh țha hlang thlan chhuah (elite group) nia ngaih an ni.

Dam chhung atan emaw rorelna a tlan chhiatsan thleng emaw a Xi Jinping President atan duhtu lam  hi "populist coalition" lam an ni. 

Business Insider hnenah Larry Ong, senior Chinese analyst sawi dan chuan, "heng  pawl pahnih te inkarah hian kum 2012 kuma Xi Jinping thu neihna a rawn chan ațang khan boruak chhe tak a awm nghal a, kha mi țum khan Zemin politics kawng sial sa zawh duhtu lam nen hian thih huam tak meuhin an inbei tawh a ni," tiin a sawi. 

Naktuk September 14, 2020 hian European Union hruaituten Chinese President Xi Jinping hi sumdawnna chungchang leh Chinese tech company țhenkhat Huawei te angin ram venhimna pawi an khawih dan chungchang lang biakna (video conference) hmangin an sawipui ang. 

GERMAN TUI ANG AN NEM
Europe ram hruaitu țhenkhat te hi China nena insumdawn tawn duh luatna avangin China laka nem ru tlat an awm, chung zinga langsar tak chu Germany Chancellor Angela Merkel-i hi a ni. Merkel-i hi China tana nem lutuk leh Khawthlang ram hruaitu dang leh khaw eng pawh hmu lek lo khawpa China ram nena insumdawn tawnnaa hlawkna um lutuk leh mipui thlan rorelna thu thlung zahawmna pawh Beijing nena insumdawn tawnna duh luat vanga hum him ngam lo leh thang tlawm khawpa inphahhniam luih tlat duh zawk nia puh leh hriat a ni mek a ni. 

Xi Jinping kum 2012 kuma a rawn lal hnu khan policy an neih ngai loh rawn duang chhuak tharin țhenawm ramte chu a mal mala tih thuanawp leh tih buai thu puiah an rawn nei thar a, hemi avang hian a ram țhenawm ram 21 te nen chuan an tual thu a chhe mek a. India nena ramri LAC ah buaina vahchap chhah țang țha tak mai alh phut thei ang reng a ni a, South China Sea lamah indo bul țan mai thei khawpin boruak a sosang bawk a ni. 

Source :

EXPRESS
express.co.uk
September 12, 2020 
@ 06:15 GMT

===13==09==20==
Huna Kawlvawm

Post a Comment

0 Comments