Aizawl | September 13, 2020: Vawiin September ni 13, 2020 (Pathianni) chawhma dar 11:30 khan Dr.ZR Thiamsanga MLA & Vice Chairman, Mizoram Health & Family Welfare Board chuan Venghnuai khawtlang hruaitute tlawhin COVID-19 veite enkawlna kawnga khawtlang mipuite inpekna a hmun ngeiah kal chilhin inkawmhona hun a hmanpui.
He inkawmhona hunah hian Venghnuai khawtlang hruaitute chuan COVID-19 veite kan pun chhoh tak zel avang leh a bikin Aizawl leh a chhehvelah CCC indaihlohna a nasat zel avangin Venghnuai Presbyterian Kohhran Biakin chu COVID-19 veite enkawl nana human an remtih thu an lo hrilh a. He thilah hian kohhran leh khawtlang mipuite pawh theih ang anga inrawnkhawm a nih thu leh thutlukna pawh hi lungrual taka siam tlan a nih thu an lo sawi.
Dr. ZR Thiamsanga MLA chuan Venghnuai khawtlang hruaitute hnenah lawmthu sawi a nghal a. "Sawrkar rilru hria a, hma hruaitu ni tura Venghnuai khawtlang mipui inpeknaah hian sawrkar aiawhin lawmthu ka sawi a, Kohhran hruaitute pawh Pathian malsawmna dawng tlaka in rawn pen chhuak thei mai hi ropui ka ti takzet a ni," tiin a theih anga ranga sawrkar pawhin Venghnuai Presbyterian Kohhran Biakin chu mi 50 len theihna Covid Care Centre atan a notify nghal tur thu a sawi.
MLA Dr. Thiamsanga tawiawmtu Pu H.Lalengmawia IAS, Health Secretary pawhin thu sawiin, " CCC indaihlohna hi a san chhoh tak zel avangin sawrkar tan pawh a luhai thlak chho ta viau a, chutih lai karah Venghnuai Kohhran leh khawtlang inpekna hi ram pumin kan entawn a, a tha lam hawia chona min petu a nih ka duh tak zet a ni" a ti a. Veng thenkhat, thinlung inhawng tak tak pawh an awm tan mek chu lawmawm a tih thu a sawi. Secretary chuan mipuite hnenah kum upa leh naupangte chu vulnerable group kan tihte zinga mi an nih avangin uluk lehzuala kan venhim an ngai a ni a ti bawk.
Venghnuai khawtlang hian tun dinhmunah COVID-19 vei mi 18 an nei tawh a. Tunah hian Kohhran Hall-a enkawl lai mi 14 an awm mek a. Heng COVID vei damlo te hi nimin September ni 12, 2020 (Inrinni) atanga dah tan te niin an ei leh in tur zawng zawng hi a tul angin LLTF ten an tumsak vek a ni.
Dr.ZR Thiamsanga MLA hi Pu H.Lalengmawia IAS, Health Secretary, Dr.H.Lalchungnunga Director Health Services, Dr.Eric Zomawia MD, NHM leh Health Department Official dang ten an tawiawm a ni.
Post a Comment
He post chungchanga i ngaihdan lo sawi ve rawh: