PM in Governor's Conference on NEP-ah thu a sawi

Sept 8, 2020: Prime Minister Pu Narendra Modi chuan nimin khan Governors' Conference on National Education Policy hawnna session ah thu a sawi a.  He conference hi India President pawhin hmanpuiin State hrang hrang leh UT a Governor & Lt.Governor te leh State University zawng zawng a Vice Chancellor-te an tel a ni.



He hunah hian thusawiin Prime Minister chuan Education policy leh education system te chu ram hmathlir tihlawhtling tura hmanraw pawimawh an ni a ti a. 

Prime Minister chuan zirna lama mawhphurhna hi Sorkar laipui,  State Sorkar leh tualchhung inrelbawlnate'n an inken sem rualin policy/kalphung siam kawngah erawh an inrawlh tam tur a nilo a ti a.  He education policy hi zirtirtu tam zawk,  nu leh pa leh zirlaite'n a taka an hman hunah chuan a thatna leh huang zau zia a lang chiang sawt dawn a ni tih thusawiin he Education Policy hi ram chhung khawpui te leh thingtlang khua leh education sector mi leh sa mi maktaduai engemawzat hnen atang a feedback dawn behchhan a duan a ni a ti a.  Zirtirtute leh educationist-te tiamin mi zawng zawngin a tih hlawhtlinna lamah mawh kan phur a ni a ti.

Prime Minister chuan he policy hian tha tih a hlawh thusawiin reform hi education policy hmasa zawkah khan lo kalpui tawh awm zawk tak titu pawh an tam a ni a ti a.  He policy kaihhnawihah hian inhnialna hrisel neih chhoh mek zel a nih thusawiin education system siamthatna chauh nilova  kum zabi 21-na a kan khawtlang leh ei leh bar zawnna thleng a kawng thar sialtu tur a nih avangin sawihona neih hi a pawimawh a ni a ti a.  He policy hian India ram intodelh/AatmaNirbhar a siam chu a tum a ni a ti bawk. 

Prime Minister chuan hun inthlak danglam chak tak kara thalaite hun lo kal zel tur atan a buatsaih chu he policy hian a tum anih thusawiin he policy hian nakin zel atan ramchhung thalaite chu hriatna/thiamna leh skill inkawp hmangin a buatsaih dawn a ni a ti.

He education policy hian zir mai nilovin zirthiamna a ngai pawimawh a,  Curriculum piahlamah Critical Thinking a ngai pawimawh tih thusawiin tuina,  a taka tih leh preformance te chu kalphung aiin ngaih pawimawh an ni ang a. Education policy thar hian learning outcome leh zirtirtute training leh zirlai zawng zawngte dinhmun chawikan a ngai pawimawh dawn a ni a ti.

He education policy thar hian kum zabi 21-naah hian India ram chu knowledge Economy a siam a tum tih thusawiin policy thar hnuaiah hian India ram chhungah khawvel a university thate'n offshore campus an din pawh a theih tawh dawn a,  hei hian 'Brain Drain' lama sawi awm thin pawh a ti reh dawn a ni a ti. 

PM chuan he policy thar hmang tur hian hmalakna kalpui mek a ni a. Hriatfuh loh awmte chingfel turin stakeholder zawng zawngte rawtna pawh in hawng taka ngaihthlak mek a ni tih thusawiin he education policy hi sorkar education policy a nilova,  ram education policy a ni a ti.

PM chuan National Eduction Policy hi hun inthlak danglam chak tak mil tura duan a ni a.  A ram bial ang a inthlauhna leh khawsak dinhmun inthlauin zirna lama nghawng a neih thin sukiang turin technology a hman tangkai theih a ni a ti. 

Higher education in a kaihhnawih zawng zawng academic,  technical, vocational leh a dangte an kalkawp theihna atan hmalak mek a ni a ti. 

Prime Minister chuan NEP 2020 hi a thu leh tihtakzet a kalpui tura hmalak tur a ni a ti. 

***

- PIB Aizawl

Post a Comment

0 Comments