Aizawl | September 1, 2020: Mizo Students’ Union (MSU) General Headquarters, Aizawl Official Organ Kulva Chanchinbu buatsaih Inter College Miss Multimedia Contest 2020 lawmman semin, Mizoram Journalists' Association (MJA) president Zonunsanga Khiangte in Lalhlimzuali hnenah a hlan.
Lawmman semtu Pu Zonunsanga Khiangte, President MJA chuan, "Zirlai kan nih angin kan rama nuam sa taka MCS ni thei te chuan IAS nih tum ula. Sawrkar hna hi mi zawng zawng tan siam a nih loh avangin mahni thiamna haichhuahna kawngah thahnem ngai taka thawh a pawimawh a, lehkhabu chhiar tam hi hmasawn nan a pawimawh hle a ni." tiin zirlaite a fuih.
Lawmman semna hun hi vawiin chawhnu dar 2:30 khan Aizawl Press Club-ah buatsaih niin, MSU general secretaryn Samuel Zoramthanpuia a kaihruai.
Lawmman semna programme ah hian MSU Vice President J Lalmuanzuala, chuan, "MSU hian kumtin Zo Hnam Chhanni hi September thla zirtawpni vawihnihna lah a hmang thin a. Hnam dang laka Zofate himna tur kawng hrang hrang inzirtirna neih thin a ni. Kum 2020 hian zirlaite chu Hnamdang nupui pasal nei lo tur leh Mizo Hnam humhalh pawimawh zia inzirtirna neih leh tur a ni a. Mizo zirlaite leh ram tana hna kan thawhna kawng hrang hrangah Inter-College Miss Multimedia hi MSU Ambassador atan kan puang nghal a ni." a ti.
MSU Inter College Miss Multimedia contest 2020 ah hian Mizoram a zirna in hrang hrang College 16 an tel a. Vote hi Instagram a Kulva Magazine account kaltlanga lak ni in, pakhatna hian Vote tla zawng zawng 62,943 aṭangin Vote 11,234 a hmu a ni.
Lalhlimzuali hi Hrangbana College zirlai niin, HBC Lady of the year 2019-20 tan thlan a lo ni tawh bawk a ni.
Post a Comment
He post chungchanga i ngaihdan lo sawi ve rawh: