MANGTHA PASTOR ELSON!

September 14, 2020 a muol liem tah Pastor Elson J Thiek inthlana thuziek le thutawi hran hran, mi hran hranin an ziekhai hi post-ah hin sie a ni.

Pastor Elson hmu nuom German Tlangval Nicholas

- Paul B. ChonziK | 16-09-2020

June 7, 2019 khan, a zinga mani motora Manipur pan ding kan ni leiin, Dimapurah motor in check tirin kan fe a. Dimapura inthawka Diphu kan kir tieng chun, hi mingo (German) tlangvâl, Nicholas hi bag lien tawk tak a sira innghatin lamlien sirah a lo uma. Chu hmuna chun midang an re lai tak a ni bawk leh mak ti deu angrengin a bula chun kan chawla, a fe tumna kan indawna, Diphu pan tum a lo nia, kan phur tah a nih. German mi ni sienkhawm English a thiem khawpel.

Motora chun sap hla dang dang Pathien hla ni lo kan ngai malama. Kan hla ngaihai chu a lo hriet tawl khawpela, “ieng dinga hieng hla hi in ngai am a na?”, tiin kan motor khaltu, Daniel Chonzik (Dan) chu an dawna. Dan chun, “kei ka play an nawh”, tiin a hnunga a sang, Joseph Chonzik (Jojo) chu a zuk khika. [Dan le Jojo hi ka u, Dr. Chawngrolien a nauhai, keini ruola Manipura fe ding an nih]. A bula inṭhung Jojo chu, “Kristaa sukdanglamna (transformation) I la chang naw a ni?”, tiin an dawn ta a nih. Eini’n pawi ei lo sak bêklohai hi a lo pawi thei vieu el am maw!!

A hnung meta chun pen drive a phawra, a hla ditzawnghai Pathien hla thratak tak a mi ngai pui lem taa. Chuong hlahai phuoktu le saktu chu a ruolpa America rama Pastor a ni thuhai a hrilsa bawk. Chulai chun, hla pakhat a lungril tawk em em el, Yuotube-a a lo ngai fûk a hung hrilsuok tah a. Chu hla chu Pastor Elson J. Thiek a phuok, ‘Lalnau Ka Lo Nih’ ti kha a nih. Youtube a chun kan ngai ta peia, a hla umziehai dam a min dawna, kan thei ang angin kan hril pêka. A hla saklârtu, EFCI N. C. Hills Presbytery Choir hai hmu a nuom thu le a thei chun a phuoktupa hmu a nuom thu a hril tah a. A hmaa anni hmu tuma hung inthawk rêng khawm a lo ni el thei!

Diphu kan hung tlung tawm chun Haflong fe ding a ni chun, hotel tlungna ding kan hrilhmu thei thu le a zinga ding ticket khawm kan lakpui thei ding thu ka hril chun, “Hotelah ka tlung ngai nawh, ticket kan chawk ngai bawk nawh” a ti ta dai el! Mak kan ti khawpel. “Keini zinga inhmataka Manipur pan ding kan nih”, tia ka hril chun, “A pawi nawh, in tho pha pha ka fena ding tieng pan el ka tih”, a ti nawk ta peia. Kei chun chuong ringawt chu a sawl awm si, a hadam met thei dân ngaituo in kan Pastor Lalkhumvêlhai quarterah ka ṭhuoi ta lem a. A zinga chun Haflong pan chun dar 9 vêla suokin, motor fena ding chu Pathienin a remruot pêk nawk el ni awm a nih. Kan Pastorpa mi hril danin, Haflongah zantieng dar 2 vela tlungin,   “Lalnau Ka Lo Nih” ti hla saklartuhai chu a va hmua, Pastor Elson khawm chu zu hmuin a zingnawk nawk Diphuah an ina bawk a hung nawka, chutaka inthawk chun a fe pei tah a nih.

Hieng thilhai ka ngaituo vêl chun, hi hla mi lo mâksan pêktu Pastor Elson inpâm a umzie a min ngaituo tir. Chukhêlah hla hi Pathienin a hmang nuomhai chu ram hla tak tak chena mihai, a ṭawng hrelo chen lungril khawm sukhartuin a hmang thei zie hi a nih. Hla hi a thu ṭha vieu sienkhawm, a tlûk zirlo leia inlâr thei naw khawm a um bawk. A saklârtu khawm an pawimaw ve bawk ti hai ngaituona a um sa bawk! Hi hla hi Lalpa’n mal mi sawm zawm pêk pei sien mi tam tak chawm tlaitu la hung ni pei raw sen!

LAM ZAWL A NGEI CHUN

~ Jami Darngawn.

Sept 15, 2020

Vawituk ka tho charin Bible ka tiemzo thil dang uksak thei der lovin ka uma ka lungrila um ang ang chun Pastor Elson J Ṭhiek inthlana ti dim a nih thu ka hang ziek mawl mawl a chu ka thuziek ka hang tiem nawk chun kan sit em leiin ka sukbo (delete) nawk vawnga, amiruokchu lungril inhawi nawk lo chuh ka kut dam an thin char chara Lalpa'n ziek ding a remti ning a tih tiin ka la hung ziek nawk a nih.

Aw le, Lalpa Nau duot A thu leh hlaa a vur em em Pastor Elson J Ṭhiek chu eini Hmar Hnam ti tak lo khawm unau Hnam dang Ṭawng dang hmanghai chen khawmin an inro hle leh lunglai hluozotu chu inro hle inlakhawm a neitu Lalpa Pathien chun ama kuoma chawl hadam ta dinga rem a hung ruot el hi chu hnuoi mihriem ha'n hrietthiem harsa ei ti hle a chu Vân mipuihai chun hlim leh lawm takin lo lawmlut ngei an tih.

Pastor Elson J Ṭhiek hi a chanchin hril/ziek ding tamtak hrenaw lang khawm kan lo inhmelhriet dan chu hieng hi a niha a kum chie ka hriet chieng tanawh a chu 2012 or 2013 niin ka hrieta EFCI General Assembly inkhawmpuilien Sielmat  hmun Pu Chawnga Chapel hall a khan  kan va ṭhang ve a, kei khawm Lalpa inpakna hla sak huna chun lam zawl a chun Lalpa inpak dingin hma ṭhuoitu ang el khan kan ringnaw karin kan chawmdawk zawt hlaka kha kum bak kha chu tuchen hin EFCI  General Assembly inkhawmpuilien ka ṭhang phak tangai naw a nih asan chu hmun dang danga Assembly hi hmang ani hlak tak leiin a nih. Kha ṭum khan chu ka lo lam nasa bawk chu ning a tih ka hming hrenaw hai khawmin "inkhawmpuina lam nu kha i nih maw ? " an mi ti hlak a nih, khang hun lai khan chu  tu anghin internet khawvela ka la lut naw a nih.

Chuongchun kha kum bawk khan EFCI General Nuhmei inkhawmpuilien chu Saikawta a um nawka kei khawm ka va ṭhang nawka inkhawm ṭin chun Saikawt kan in ah mi iem a ni zat an uma kan inchibai tawla chutak a chun pasal pakhat chun a mi chibaia "U, Assembly lam zawla ka lo hriet che annawm, kei khawm ka lam vea  ka Haleluia nasa khatie !" A tiha, kei khawm chun "Ani ngei chutie lam zawla Haleluia tia hring em ema zaivawr kha tum a ni ding aw ka lo tia nang ngei hi i lo ni maw ?" Tiin ngaina tak leh piengpui unau ang ela inngaina in Lalpa zarin kan lo inhmelhriet ve a nih.

Lalpa'n thu leh hla tamtak a peka chulaia a hring bik ti el dim a nih mi tamtak thlarau chau leh nguia um lai sukhartu hla ropui tak "Lal nau ka lo nih" ti hla mawl kha a ropuiin a va hlu ngei de ! Hi hla hin kei khawm nasa takin malsawmna ka lo dawng hlak  leiin ka lawm ema lmphal kan kohrana Rawngbawla a hung khan kan in ngeia lawmthu hril nan Hmar Thangsuopuonbatte haikha ka lo inbattir ta nghe nghe a nih. Hi khawvel a hin Pastor Elson chu a taksa hmu dingin um tanaw sienkhawm a thu leh hla Lalpa'n ama fethlenga a hung pek hai hi chu bo ta ngai nawng a ta mitin lungrila a tharin thu hrilpei a tih. Pathien remruothai hi chu a changchun hrietthiem ava harsa hlak ngei de maw ! Sienkhawm Pathien remruotna a hin thuneina chite khawm ei nei sie nawh.

Lalpa Nau duot Krista Pasal Ṭha Pastor Elson J Ṭhiek inro hle inla khawm nang chu inhawi takin A Rawng l bawlpek Lalpa Pathien angsunga  chun hadam takin lo chawl tang i ta, i maksan i Nuhmei le i Naute hung pieng ding hi ngaituo ava um ngei de!!  Pa kuoma malsawmna tamtak dawng dingin hung hnipui mawl mawl hlak rawh, i Nuhmei leh i Nu le Pa i unauhai malsawmna leh thlamuongna maktak  an dawngna dingin Lalpa kuoma lo hni pek mawl mawl rawh. Keinihai khawm iengtik am a ni chu inlawina hmuna khan  kan la hung inlawi ve ding ana chutaka chun Lalpa Pathien inpak leh chawimawia ei lam der derna dingin hmun lo haulawk la, kan hung inlawi ve pha hlim leh lawm takin ei la lam tak tak ding a nih. Hi khawvel a hin chu Zion hla rem thei tak tak a la ninawh ie !!!

Sâm 116 :15

LALPA ngaia hlutak chu, A mi thienghlimhai thi chu a nih.

DAMTAKIN HMANGṬHA LE.

A HLUTZIE EI LA HUNG HRIET DING CHAU A NIH

A Tribute to Pastor Elson J. Țhiek, Child Evangelist.

(Promoted to Glory on September 14, 2020)

- Jessai L. Neitham

UBS, Pune

September 18, 2020

“Lalpa ngàia hlutak chu, A mi thienghlimhai thina chu a nih.” (Sâm 116:15)

September ni 14 a hung inhersuoka, mitin ei nitin khawsakna buoipui senga hun ei hmanglài, chawhnung a hung ni mêk làia Hmarkhawlien tieng a’nthawka ei thu dawng chun ama, Pastor Elson lo hrephâk chinhai khawvêl a hung de'ng dân chu a rî a na ngei el.

Chanchin ei hei hriet ei ti zo chau, hun sawtnawte hnunga Biekin țuonglaia a hliem tuor an buoipui lài thlalâk ei hei hmu zet chun mi a țhâwng nasa zuola, amiruokchu, beiseina a mi la siempèkna chin a um chu a ni kha. Iengtinam enkawl ni’ng a tà, ti le hung harsuok vat vat sien tia ei beisei le țawngțâi mup mup lai zing chun thina tûrin vân tieng a mi lo sawmkâi pek zing chu an ta mieu si a.

Hrietthiem a va’n tak ngei. Tuorthiem a va’n tak ngei. Muol mi hei liemsan el ding chun ei la phal naw seng ti chu hriethmai ruol an nawh. Amiruokchu, ama ta ding chun hi hnuoia a'n zinna chu lo tàwp tain Pa àngsûngah a mi lo chuongkài san dêr chu an tah.

Pastor Elson Jubilee Țhiek le hin kohran hmunkhata rawngbàwl tlâng ni inla khawm Biel khatah chu kan la thawk hmunkhat ngài naw a, hun tam khawm kan la thaw tlâng naw hrim hrim a ni tak. Hei hril thei ding ka neisun chu Tripura a ka umlài, kum 2017 October thlaa EFCI Darchawi Presbytery NSSD haiin Boitang khuo, Tripura-a Naupang Inkhàwmpui nei huna Speaker dinga kan fielna kha a nih. Khà țum khan rawngbàwlna hlâwktak hung neiin inkhàwmpui chîmtuhai chu Pathien  thu le hlaah a mi suk tlei hle a nih.

Khà zo kha chu, tuta thla liemtah, August ni 23 khan tuta kan um mèknaa kan inlàwina Hmar Christian Fellowship Pune (HCFP) Zoom Online Worship Service a Pathien thuhrilna a hung neina kha a rawngbàwlna ka tawng tâwp vèna a lo ni ta zing el. Hi ni khawm hin Pathienin hla thar a pêk, mipui hriet dinga a la tlàngzâr hman lo sakna a nei nghe nghe. Hi inkhàwmnaah hin October thlaa an nau hmasaktakna ding beiseia an um mèk thu hrilin, inrik deu țal taa naupâi a nuhmei, Pi Esther Lalruotmawi hmèl khawm a mi hei inhmùtir tàwl a, țawngțâinaa lo hre ve dingin a mi ngên seng bawk.

Hringmi tin hringna hi a hlut vawng lài zingin, mi țhenkhat hringnun le thina hin thu a hril râwn zuol châng a um a. La ni pei bawk a tih. Pastor Elson in muol a mi liemsan an tah ti hei hriet a ni a’nthawk khan, a nuhmei nau nei țèp țèpa um țhangsàin, abîkin, naupanghai làia a rawngbàwlna hnuhma le hmàtienga rawngbàwlna hmabâk ngaituona’n lunglài a suksip hnè hle a. Ka'n chûkna le inzawma assignment buoipuia lekha ka hei tiem ka ti khawmin chuong thil ngawt chun lungril a hluobit lem a, thil dang rèng a mi’n ngaituo tir thei nawh. Asanchu, sâpțawnga ‘GenNext’ an ti, naupang le țhangtharhai hi an hnu hmaa Pathien thutaka lo tù làwk hi a țulin a pawimaw tak zet lei a nih. Kristien sûngkuoa seilien inti senghai hi kum upat hnunga Pathien thutak ngai le zâwm hi intak ei ti ang reng tàwl khawp el a, chuleiin a nih naupanglaia lo tù làwk an pawimawna chu.

Pastor Elson kha hieng dinga Pathien bêlruot ti ding ni àwm tak, kohran tira UBS, Pune a’nthawka Children’s Ministry Training Course, _CCM an tì,_ zo ngat a nih. _A thiemna le hmathlîr a la phursuok hman tak tak nàw hi a va hei pawi lâwm lâwm ngei de âw._

Hrila lo um ta ang khan, Pastor Elson le kan inhmèlhrietna hi chuong bêka sàwt a la’n naw el khèlah biel khata rawngbàwl tlàng hman khawmin kan um naw a. Amiruokchu, ka hei hrietthei chinah chu amaah hin Krista a chêng ti le, lungril le titakzeta Pathien rawngbàwl nuom a nih ti hmutheiin a um. A thil thawnà taphawtah chawngpu nina changin, thil hrim hrim hlim sieuva thaw hlak mi ni’n an lang.

Tangka sum le pài thila harsatna tamtakin a buok puma Trinity College & Seminary (TCS), Sielmat, Manipur hmuna Pathien Thu a’nchûklài khan, Sielmat hmuna kohran inkhàwmpuilien nei chângin ama le a Bible inchûkpuihai kha Usher dàmin an țhang hlak a. Hieng hunah khawm hin mì hlim sieuva lo bie le ‘welcome’ hlaktu a ni zing tho. Hi hi ama ka hmèlhriet țanna le ka'n chik vèna ni’n ka hriet. A dawngsawngtu tà ding chun, sâpțawnga “First impression makes the Best impression,” ti hi a takin a phursuokna chin khawm a um. 

Mi hlim thei tak el, ‘artificial’ dèr lo ‘smiling face’ thienghlim tak nei a nina kha ama hmangaitu le ngàinatu suktamtu a nih ti inla ei hril suol bèk ring a um nawh.

Mihriem tin hin țhatna tamtak hril ding nei seng ei ta, chuonglài zing chun bàksamna khawm nei seng ngei ei tih. Tùkhawm famkim in um nghàl lo chu. Chuongang bawkin Pastor Elson khawm khan felhlelna chu nei nuol ngèi a ta, hi hi chu ama ngêi khawma inphat bîk kher naw nih. Chuong tieng thu chu hril tam ei tum naw a. Amiruokchu, kei a rawngbàwlpuipa hin a hringnuna inthawka inchûk ding le inchik tlâk ka lo hmu vè hai ka hung tàrlang ve chawt a ni lem.

A nunah hin Pastor (rawngbâwltu) miziè ding àwm hrim le rawngbàwlna thila hmangruo pawimaw iemanizàt hmu ding umhai hei tàrlang sap nuomna ka nei bawk a. Kei ngei khawma ama hi ka tluknawna tamtak a um a, rawngbàwltu danghai khawma ama nuna inthawk hin inchûk ding le a sin bàngkhài sunzawmnaah entawn ding a um nuol ti hi pawmin, mimal tin mamaw ang peia entawn thei a nina haiah entawn ngèi bawk inla chu ei rawngbàwlna khawm a hlâwk zuol pha el raw’m!

Pastor Elson hi hlasak mi chau ni lovin, hla phuok mi a ni sa bawk a. A hla phuok “Lal nau ka lo nih” ti kher lem hi chu hnam dang, sâphai chen țhangin, hmuntin ramtinah sak lârin a lo um an tah ti hretu vawng ei nih. Pathienin talent a pêk hi a phursuok hne hlè a nih ti chu tuipuirâl chen tlungphâk ringtu khawvèl hriet a hung ni ta pei a nih.

Hla a sak chau ni lovin hlasak malama ‘performance’ nei thiem êm êm el a ni a, chuong malam peia hmêl hlim sieuva hla a hei sak thei zing dàm kha mi nazawng thaw theilo a nih.

Shillong an zin lài le an tuok leia kum 2017 May thlaa NEICCYA Inkhàwmpuilien, Diwon (Nongpoh bul), Meghalaya a nei țuma kohran âiawa hlasak dinga ngên thut a ni khawm khan Sâpțawng thiemtakin thuhma hrila Vâi hla’n India hmarsak tienga kohran lien dang dang țhalai pawlhai a mi’n âwi tàwl el chau ni lovin mipui boruok thihul kha a chawktho hne hle a nih. Khà zân khan Mizoram tienga hlasak tienga inlâr (‘celebrity’) an um vê nuol kha nisienlakhawm a tlachawp thila ding khawm khan kohran âiaw dinga hei thawlawm kha thawsuol a um nawin insit a um naw hlè a nih. Ka va zuk inpâm ngei de âw.

Hlasak bâkah khan Pathien inpâka lâm mi tak khawm ni a hrietthei a nih. Naupang làia rawngbàwlna (Training, Seminar, VBS, Retreat, Speaker) thil le inzawma a lâm le naupanghai lâm a’nchûktirhai kha phûr taka thawin a thiem êm êm el a, amiruokchu, kha’ng kha chu thu dang la hei nisien.

Inkhâwmna hmuna Pathien inpâka bân phara lâm kha thil thaw inhawi a ti laia mi ni a ngai thei a nih. Inkhàwmpui châng khawma umhmuna lo lâm el lovin, Assembly, Presbytery le Țhalai inkhàwmpui chu hril lo, Nuhmei inkhàwmpui hài chenah khawm a hmasa pawla lâmzàwl pan ngam le pan thei a nina ringawt khawm khan mihai a chawkphùrin, amaa Krista um kha an zakpui nawh ti hrietthei a ni a, entawn tlàk tak a nih

Țawng tiengah khawm thilpêk țhatak a nei kha hmu khèl ding chì an nawh. A piengpui Hmar țawng a thiem zie chu a hlaphuok hai a’nthawk hrietthei a nih. Inchûkna le murna leia a hung thiem Sâpțawng (English), Vâi țawng (Hindi), Mizo țawng (Lusei) hai khawm a thiem êm êm a, mi sukhlim hrep thei khawpin a thiem a nih ti ei hung tàrlang ta kha.

Rawngbàwlna le inzawma a lo posting-na hmuna țawnghai khawm a hmang thei ve nghal pei a. Hièng, Hrangkhawl, Darlong, Debbarma, Tripuri, Reang țawnghaia Pathien Thu hril thei khawpin a thiem a nih. Hienghai po lai hin Hrangkhawl țawng hi a thiem zuol bîk niin ka hriet. Ama țhanga a lo khawsakna hmun Rangamura (Tangpui Presbytery), Tripura, kan zu fe țuma unau Hrangkhawl hai an țawnga a hei biek zet kha chu anni mi ang tho a nih. Hienglai hmunah hin hun sâwt um hman naw sienlakhawm an țawng chu a thiem khawp el. Chu bâkah chun, hieng țawnghai hi a hmang el ni lovin an țawnga hlàhai khawm en lovin a sak thei nuol ti chu a taka lo hmutuhai bâkah music video a siemhai hmanga hrietthei a nih.

Țawng a thiem ràwnna lei ringawt khawm khan hmun dang danga Pathien rawngbàwl dingin ‘zalênna chikhat’ (cultural acceptance) nei phain, kei anga rawngbàwlna hmunhai țawng hei hmang zung zung thei ve lo ang nêk hin chu, la hei dam sâwt met sienla chu țawng dang dang hmanghai lài Pathienin a va hmang nasa bîk àwm ngei de ti da’m a mi’n ngaituo tir chu ti. Ka va zuk inpâm zuol ngèi de.

Hieng anga Pathien hmangai le a Ram inkhâwkpuitu hi a hnuoi khuolzinna la hei sàwt deu sien nuom a va hei um ngèi de.

Pathien Ram el khèlah a piengpui Hnamah a chieng a, rawngbàwltu ni pum zing khawma Ram le Hnam hmangaitu le a țul huna pênsuok ngamtu a nina khawm hril ding a um nuol ni’n ka hriet.

Hieng bâkah hin, ruol pàwl a thiem êm êm a, dam rieuva țawng, bâu zâng êm êm el, iengtik lai khawma hmèl hlim sieuva mi danghai inpàwlpui thei, kohran le hnam indàidanna nei ve lo khawpa rawngbàwltu a nina khan mi ngainat a hlaw nasa zuol a nih.

Pathien rawngbàwltu le mipui hriet hlaw (public figure) ni dinga miziè pawimaw tamtak Pastor Elson ah hin hmù ding a lo va tam ngèi de.

Rawngbàwlna thlûr bîk deuva ei hung ziekhai a’nthawk hin a sûlhnung thlîrkìr le hril chau thaw lovin, a rawngbàwlna hmabàk sunzawm thei ding khawpa hmathlîr neiin Pathienin mi hei sersuok thar tàwl sienla ti hi ei duthusàm a nih. 'Lalpa mi țhangpui rawh,' ti chau el naw chu!

A nuhmei le nau pieng dinghai Lalpa’n thlàthlam naw sienla, eini khawma theiang anga an ta dinga țawngțâipuitu le ‘vântirko’ ni pèk tum ei tiu.
Rawngbàwlpui dittak, Krista zàra ka âihnaphàpui, Pastor Elson, i mâksanhai hin kan la thlâkhlà ngei el chè ie. Pathien Ram ta dinga i lo thaw hlâwkzie le i pawimawna hi kan la hung hriet ding chau a nih!!

PASTOR ELSON J THIEK SÛNNA THUSIM

- Mrs. Lienkhawtling Thiek, Guwahati.

Pastor Elson inpâm tak le inro tak pumin sûnna thusim ziek alo tûl nawk el ta a, mang ding khawma ei ditlo chu a tak ngeiin ei tuok an ta hi.

Mi inngaitlawm, Pathien rawngbawlna ngaipawimaw mi,  ka mi inzâ le ka mi ngaisang  zawng a nih.

Kum 2015 khan Rangamura, Tripura a rawngbawla ka fe in, ka kîr tieng Kisong chena mi va thak vang vang tu ana ka lawm hle a nih.

"LAL NAU KA LO NIH" ti hla a phuokna In ni ngei awm chu ka zu hmupui ve a. Chulai chun mikhuol a hau hlea, a khum khawm a chang nawh. A ina thil i dit tak inru rawh tihai sien chu inrûk ding vâng hlêng a tih.

Harsatna, tlâksamna,  hi  lo intlawnpui zing sienlakhawm, Lal Nau a ni an hrietchieng leiin taksa lungkhamnaah a chêng ve nawh.

Hilai huna inthawk hin kan lo inpawl nêl ve ta a.

Tlangval ala ni leiin kawppui nei ding thuah a hriet nuom le zawna hai amin dawn ve a.

A hnung chun a  ngaizawng nei thu le a hming khawm Lalruotmawi ana, a lunginsiet zawng tak le a hmangai êm êm a ni thu le a hmel tha a tizie hai khawm a mi hril hlak a nih.

Zuk innei el khawm a thlâkhla ta êm êma, amiruokchu an insung an harsat êm leia ala remchâng naw thu hai chu ami hril a.

Thil ip khîr khêr mi nilo, tlang ham el, (transparency)  nei mi ani chu ka lawma, ka ngaina pha nghe nghe bawk a nih.

Guwahati ah a hung châng kan inah a hung tlung zau zau hlak a. Vawikhat chu hienghin ami hrila, 'Nu',  in Inah ka hung tlung ding ana, hi a kum têl rawngbawlna leiin khuol kan zina, Lalruotmawi le kan inhmu nawna a sawt ta a, hmu ka châk êm êm a, ama hlak Guwahati Brahmaputra vadung râla hospitalah a thawka, hmu a awlâi  si naw a.  Rem in ti chun in Ina ka tlung lai hin zankhat a hung riek ve phal in ti? a ti a. Kei chun, Ê ... phal e â,  ni raw seh ka ti a.

Chuongchun phûr takin zantieng chun bus station ah Ruotmawi chu ava thuoi a.

Hi trum hi keikhawm Ruotmawi ka hmu phutna le kan inhmelhriet tanna a nih.

Thlai ami suong puia, zaksie hmel  tak put le inphalam tak ni'n ka hmua, inhawinaw ka ti letling vieu a nih. Sawt tak inhmu talo, inngai ve êm êm chu ei hriet phâk loa tîtî nuomna khawm nei an ta, kan inin a zir rak si nawh; In chung (terrace) a dam khin khuo hang thlîr inla ka ta chu, an pahni khan a fâlin an um nuom hrim hrim nawa, anfîmkhur hle a, an inthunun hne hle bawk in ka hrieta,  inpâk an um khawp el.

Ruotmawi chu kan naunu leh an riek a, Elson chu kan naupa leh room hranah an riek a, a zingah Ruotmawi chu stationah kan va thak nawk ta a nih.

July ni 3--6, 2017 khan Guwahati Hmar Christian Fellowship Naupang pawlin Sandamna Camp Umran, Meghalaya ah kan neia. Chu trum chun Pastor Elson hi Resource person in kan hmang a nih.

Pathienthu ami hrila, hla le lâm, thildang dang amin chûktira, kan hlawkpuiin inhawi kan tia, kan ngai hle bawk a nih.

November ni 17--19, 2017  kum mâ hin Chikhur Cachar  ah rawngbawlna ka neia. Hi sung po hin kan inthlawpa, thangpui ka tulna iengkimah ami thangpuia ka lawm hle a nih.

Nikum 2019 khan EFCI Pastor hai in Retreat an neina a khan a hung thang ve a. In inneini chun kan hung thang ve phâk naw ding ana tiin kan sungkuo lawmpuina chu a kutah kan hlân a.

Tuta thla September second week lai khan phone in ka zuk biek a.

Online Choreography Competition a huoihawtnaa  prize winner hai kha keini naupang online programme  a insuo ve phalna ka zuk hnia, lawmtakin ami hung phal pek a. Kan insuo sa ve ta ngei a nih.

September ni 13 Pathienni zan (a thi hma zan nuhnungtaka khan) kan programme link zuk thawnin ka zuk biek nawk a. In thaw tha ie, lawm a um, ami hung ti a. An nu a dam am? Iengtikam nau an nei ding, khawlai hospital am? ti ka zuk indawn chu ami hung hril pei  a.

Naupang rawngbawlnaa hmatieng hmadawm iem a nei ti kan dawn chu; Naupang ha'n Bible an tiem rawn theina dinga competition pakhat chu huoihawt nawk a tum thu a mi hung hril bawk a. Inbie zawm pei dingin kan in the a, chu chu hi khawvela kan inbiek tawpna tak alo ni ta zing el!!!

A zinga  chun muol amilo liemsan el ta a  nih. A thini hin sin rêng  rêng ka rêl pei nawh, ka zawi thla rawng rawng el a nih.

Iengleia mifel, mi tha, mi tangkai, Elson thangsain mi tamtak naupang te te'n muol an liem a,  kei mi tlâktlâilo vawisun chen chena ka la dam el hi ava mak de aw...ka ti a. Elson thina hin Hmar Nau Khawvel a nghawr hnînga, Lock down kârah ei umna chitah ami vuok tap ni'n ka hriet.

Tirko Paula chun, "Hringna leiin am anih, thina leiin am anih, ka taksa ahin Krista chu chawimawiin a um ding a nih. Ka ta ding chun hring hi Krista a ni sia, Thi khawm hlawkna a nih" alo ti a.

Philippi. 1: 20-21 thu hi Elson chunga hin a'ndik ka ti bêk bêk a nih.

Elson hla siem Pathienin a lo hmang nasat zie dam, a nunah mihan Pathien ropuizie an hmu thu dam,  Elsonin Pathien alo hmangai zie le Pathien chawimawi alo nuomzie dam, mihan hieng lawm lawma an nupaa, an sungkuoin,  an hmangai zie an lunginsiet zie hi, pawisa in a manzo lo ditsakna le ngainatna an dawng zozai hi  kei chu a damlai khan hienghi  nîng atih ti ka lo hriet ngai dêr nawh.  A thi hnungin ka hriet chau a nih.

"MI BÎk" nia,  special em em a Pathienin alo in duong ani ti hi a thi hnung ku hin ka hriet ve tak tak  chau a ni chu! Khânga Elson a tlâk zo a, khawmuol hrelo a a um nghal el kha mithenkhat chun piengthar sa, inpeisaa um a tulzie an  inhrietthara,  piengtharna inzawng dam an um a nih.

Chuleiin a thina hi pângpal chu ni naw tawp a tih; Pathienin hi thina ahin thiltum nei ngei a tih. Hi thina hi eini'n  vângduoinaa ei ngai, a hmangaina inlangtirtu ni ngei atih. Thina malsawmnaah inchang mawl raw se. Lalpan ama inchawimawinaa a hmang nuom si chun ama tieng thangin Lalpa chu Amen!  pe el ei tiu.

"Abel chun a ringna leiin thi hnungin thu ala hril ta rawp a nih"

Hebrai. 12: 4) ah a ti a nih.

Elson thina hin thu hril pei raw se.

"A mi thienghlim hai thina chu, Lalpa ngai chun hlutak a nih"

Sam. 116: 15

ah alo ti a nih.

A tawp na a ding in Pathienthu in a hmawr inbawk ka nuom a;

"Mi fel chu an bohmang hlak a, tukhawma an lungrilin an ngaituo ngai nawa, Pathien ngaisak mihai khawm lâkhmangin an um hlak a; mi fel chu thil thalo hung  tlung dinga inthawk lâkhmang an ni hlak ti tukhawma an ngaituo bawk nawa.

Lungmuongnaa chun an lut hlaka; an khum ahai chun an zal sawldam hlak, indiktaka fe taphawt hai chu"

(Isai. 57: 1--2).

a ti a nih. Mi an thi hin, "A pawi de aw", "Lungsiet a um de aw"!

ei ti hlak. Amiruokchu, Pathienin mifel le Pathien ngaisak mihai hi thil tha lo hung tlung dinga inthawk alo lakhmanga, a hmangaihai an zâl sâwldam tirna hmun chu "Thina khum" hi alo ni a nih.

Elson thina hin Lalpa sukropui pei sien, a thina hin thu hril pei raw se.

"A MI THIENGHLIM HAI THINA CHU, LALPA NGAIAH HLUTAK A NIH"

SAM. 116: 15

LALPA'N RÊL SUOL A NEI NGAI NAWH

(Pastor Elson J. Ṭhiek sûnna thucha)

~ John L. Pulamte

September 14, 2020 zântieng dâr 1:20 vêl khan whatsApp group pakhata ka hei lût chun, thu lungṭhâwng tak el pakhatin na takin a mi hung dêng dawt a. Chu chû thu chu ieng dang ni lovin, Pastor Elson chu Biek In chung an ṭhieknaah châng suol palin, a chunga inthawk chun tla thlain, na takin a lu a tet hliem thu hi a lo ni a. A mi ṭhâwng nat êm lei chun thâwklekhatin ngâi ka aw naw chawpchil ta nghâl a; ka  mit deu sul a, ka lu khawm a sukinhâi rum rum a. Ka mang ni sien la hi ka ti vawng vawng a; dik tak chun mang ding tak ngiel khawma ka idit lo thil a nih.

A tlâk thlâkna a'n sâng êm leiin, "A lo dam khawsuok a ni khawmin mihriem pângngâi a suok zo ta da'l âwm de aw!" ti'n ka pawitî luot chun ka'n chêk tlawk tlawk a. Chuongchun beidawng takin chung tieng petition inrang takin ka hei thawn kâi ta mawl mawl nghâl a. Sienkhawm chawmkhat lo chun, chung tienga inthawk chun ka petition  chu hnâwla a um thuin inrang takin a mi hung dêng kîr nâwk nghâl a. A dêng chu na tak a nih. Mitthli khawm a um ṭawk ṭawk thei ta bîk nawh, fûr tui lien angin a thî thu hre phâk taphawt chu mitthli dang zo hrim an um nawh. "Lei tinrêng Lalpa hmaah la'n puong an tih" tî ang elin, a thî ni hin mit tinrêngin sûnna mittui insûrtir ngei an tih.

A nuhmei chu nâu pâi lai a ni a, ni tâwite hnunga nâu zuk nei el ding ngîrhmuna um zing a nih tî thuin a mi hei dêng nâwk lem chu insûm a'n tak zuol a, mei chawk lai taka petrol bur khum sa ang hlawlin beidawngna a sukpunglun a, hmêl pângngâi hang put thei ruol ding ziezâng hi an' naw a, tu nu tu pa khawm a thi nî hin hmêl tlâi rawng rawng hmu ding an vâng hrim a nih. Thîna natzie hi a lo intem ta sa ka nî leiin, a natzie theinghil thei lo ding khawpa hre sa ka nîna khan, a nuhmei chan chu a zuk dâwn phâk a; amiruokchu a chan chu inchan ngam ruol an' nawh. Thîna hi tuok râwn ta leia tuor thiem thei a ni si naw a.

Nupa ṭângṭhe natzie an lo hril rawp hi Pastor Elson a nuhmeiin a tak ngeiin a hei hmêlhriet el ta chu ieng tak am a changpui ding? Nupa ṭângṭhe hi dâr khing sât phel ang tluka nain an hril hlak a, chû hliempui chu a nuhmeiin a tuor chu a ni ta si a, a tuor muolsuo zo di'm? "Di'm, di'm di'm...?" tî zâwna ngawt chu lungrilin a ngaituo a, dawn châk um naw hle sien khawm ngaituo naw thei hlak a ni si nawh. A rimsikthlâk ngei ie!

Chuonga a nuhmei chan hei rinum dingzie le thil ramtin ka ngaituo lai chun, a thupuia ei hmang "LALPA'N RÊL SUOL A NEI NGAI NAWH" ti thu hi ka lungrilah a hung inri ta vang vang a; chu ruol chun Lalpa'n taksa damna le khawvêl hlimna hi a lo ngai pawimaw nawzie dâm chu ka hriet ta sa khawm ni sien, thar takin mi hriltu um angin ka hung hriet suok ta uoi uoi a. Kei a ziektu ngei khawm hi, ka ûpa damna dinga nasa taka bu nghei hiela lo ṭawng khawm ni lang, Lalpa'n taksa damna a ngai pawimaw naw leiin a thlarâu chau sukdamin a khawvêl taksa hringna ruok chu a lo  lâk hmangpêk ta a ni kha. Khawvêl var kum 39 sûng chau a hmu a nih. Mihriem ngaia chu la hun naw hle sien khawm, Lalpa ngaia chu chuong chu a lo ni ve si nawh.

Mihriem chun ei taksa hringna hi thlâkhla hle inla khawm, Pathien ngaia chu pilvut ang chau ei ni leiin a ngai pawimaw ve naw a nih. Hnuoi silfên a ni tlat leiin Vânrama sawm tlâk an' nawh. Vânram chu a thienghlim a, khawvêl silfên ruok chu thil tirdakum tak a ni si a. Pathienin khawvêla ei um sûng chu iengkim ei tuor a phal a, iengkim hi ei tâ dinga a ruot sa hrim a nih. Natna dâm, lungngaina dâm, mangangna le ieng ang rimsikna khawm ei tuor a phal. Hieng ei tuornahai hi nakie phâta ei lawmman ding vawng an la ni a, tuor thlâwn naw'm ei nih.

Pastor Elson thî khawm hi mihriem ngaia chu a la hun naw hle, amiruokchu Lalpa tâ ding chun a'n hnûk a'n hmâ a um nawh. A tî hun hun kha a hun char a ni pei el.  A rorêlnaa hin tu thu khawm a lâk naw a, tu khawm a biekrâwn ngai bawk nawh.

Pastor Elson kha lo dam suok tê rêng sien khawm, ngai a aw chu ring a um ta kher nawh. Mihriem pângngâi tling ta lo dinga dam sûnga enkawl ngai rêng rênga a khawsak ding nêkin a thî kha Lalpa'n a ṭha a tî leia a kuom tieng a ṭhuoi khawm ni ngei a tih. Lu operation ta hai hrim hrim lem chu an zeng naw le vêk khawm, lungril pângngâi an put zo ta ngai nawh. Chuong ang ngîrhmuna a um ta chun a hlutna le a'n zâumna hung bo ta'ng a t'a, mîhai nuizatbûra khawm a la'n chang thei a nih. Tu am hril thei? Chuonga a um ding chu Lalpa'n a phal naw a, a hlut lai tak a kuom tieng a ṭhuoi ta khawm a ni thei. "Thisen suok lovin damna tluontling a um thei nawh" tî angin, tû nu tû pa damna dingin am a nih a thisen hi suok le a hringna hi inhlân khawm ni naw nih a ti thei ei um nawh. A thisen suok kha Krista hmêlthla a put theina dinga thisen ngeia inchikna siel nam kâia a umna khawm chu ni ngei a tih. Harsa le rinum loa Krista hnung hi zui thei a ni ngai si naw a. Chu lampui chu Pastor Elson-in a hung hraw ve a nih. Ka upa khawm kha damnawna leia na tuora khêk hlum ṭhak a nih; sienkhawm a tuorna râpthlâk tak el khan thil ropui tak a'n ra suoktir a, khawsâwtna le lungsietna mitthli cho a ko suok naw a, kan in sûnga setan kulpui chu ṭhiek darin a um pha a, thîna hlâwkah Lalpa'n a'n changtir ta lem hlau a nih. Mi pakhat mi pahni  bêk damna dinga a tuor kha a lo ni lem zing si.

Kan upa thîna khawm kha a hâihu lai khan chu hrietthiem harsa kan tih, na tuora a khêk lai ngawt kha mitthlaah a châm a, hlimthla angin a mi zui a, theinghil thei ruol an' nawh. Amiruokchu ra ditum tak a ra suok theina dinga kha natna kha Lalpa remruot a nih tî kan hung hriet suok hnung ruok chun, kan mitthli chu hrûk ngai lovin a hul ta a nih. Lalpa hmangaina kutin a mi hrûk fâipêk ta si a.

Iengkim hi Pathienin san neia a siem le a'n tlungtir vawng hi a lo ni hlak; Pastor Elson thî dân khawm hin san inril tak, Pathien remruot, mihriem sui suok phâk lo chu um ngei a tih. Iengtik huna am a ni chu, hî thîna hin ra ditum tak la'n suo'ng a t'a, chu pha chun a nuhmei le a sûnghai mitthli chun hul zâi rêl ta'ng a tih. Chû hun ding chu a tlung vat theina dingin ma lovin ṭawngṭâi mawl mawl ei tîu. Lalpa hmangaina le thlamuonna mak tak chu Pastor Elson a nuhmei le a sûnghai chungah inlangtirin um mawl raw se.

"...thina hlim ruom hraw lang khawm, Thil ṭha naw hrim hrim ṭi naw ni'ng; Nang ka kuomah i um si a..." ~ Sâm 23 : 4

CHUL LO DING SAKHMING THA 'ELSON'

- RT Hmar

Ngâi nî bâng lo Zalêng hringtin âwitû, chul lo ding sakhming ṭhâ Pastor Elson J. Ṭhiek. 

A tâwi ngêi mâw Pâr ang vul lâi hun lê Vân lal sin thâwâ i hring chang sûng.

Hriet thiem a'n tak hring dânin, dam nî um a ti'm i fam pûr dotu lâiril hi?

A dam thei nawh, a muong lul nawh lunglâi rûk hi, muong neitû chung Khuonû  kan ngâi ngêi dê!

I thâi duot lâi chan ding hi dâwn vê ta'm, kum sûl tam liem hman loâ fam rûn i'n lâwi san hi. Dam nî um a ti'm hring khuoâ nang nghil lo ding i thâi lung rûk hi.

A sakhmêl tawngkâr nghâkhlaâ ṭhâl tui ang i nghâk, khuonu malsâwm i hrai sakhmêl hmu loin maw vân khuo i'n lâwi. Khuonu zârâ Hringmî changin hnuoi rinum a hung intem vê phât chun, zuopâ sakhmêl hmû châkin suilung la phâng vê ngêi a ti'a, châwitû chûn lungmâwl di'n hril a hai âwm ngêi.

Sienkhawm Pâ tak âng sûng a'n thawkin hung thlîr i t'a, Pa nei lo hâi Pathien chun zâ ngâi ngêi a tih. 

Châwnbân vâwrâ i'n pâk hlak Vân lal IN tuoi thar nâ'n maw hliempui i tuor, i hliem rî thang vêlin hmun tin a hluo zo ie, Vân rêngpui kuomâ zângâina hnî rêng a châwl nawh. Sienkhawm hringmî dûthusâm tak chang zo sî lo, Khuonû remruot hrietthiem a'n tak ngêi.

I fam rî thang vêlin rûn tin hrût suokin, tuor thiem rêng um lo sûngtin lâi.

A nâ kan tih, tuor kan thiem nawh, tuor thiemna Lalpa kuoma mi hung hnipui raw âw.

I tâ dingâ kan thei tâwk lê an hril damna rûn hin, i tâ dingin damna an intlun zo sî naw maw! I tâ dingâ kan thei tâwk hi a va tlâwm de aw! Mi ngâidam mawl raw aw ruolpa Elson.

Hi hi chau hi kan thei tâwk a lo ni tah, Vân lal thu hrilâ zâi tin rema i'n âwi thlei hâi hin, i sakruong chul ding hi ṭap hla'n kan inâwi chê.

Khrista pasalṭha, hmêlma nuhnung hnêtu Pastor Elson J Ṭhiek. Lungril po poin a thâw thei insâng tak châwimâwina nopui sîngmit tui ka'n hlan chê â. Thlamuong takâ châwlâ HLIM LÊ LÂWM TAKÂ LÂM DÊR DÊR DINGIN, phal lo tak pumin MANGṬHA!

ELSON INTHLANA THUSAM

- Elbee Hmar | Haflong

Hieng ang mi ṭha, inngaitlâwm, taima si, mi inza thiem, tlâwm rawng rawng, mi lien le chîn angkhat a lâwm thiem, chapona nei hrim hrim lo, Lalpa siehlaw ringum hi hung pieng nâwk an ti'm maw?

Elson....suilung hi i va suklêng ngei!

Kan la tiem naw aw,

Kan la phal naw che!

Fam, zamuol liem ka la'n tiem nawh.....sienkhawm Lalpa'n a ṭhuoi ta si che!

Hnam ta ding khawma; rimawi khawvel sukbubittuZâikûngpui

Hmar Literature huonga ding khawma; ṭawng sukchangtlingtu, sukhringtu!

Kohran hai ta dinga; Hla a Lalpa thlarau thienghlim semdartu, mi lungngai hai hnemtu.

Van tieng ri hrie a, zâi vâwrtu, mi dang hai pe sâwngtu, thlarau hring kawl...Lal naupa kha e, i fam ta maw! I fam ta maw!

I hlu vang vang annawm!

Kan ngai che Elson!

SUNNA THUSAM

~ Rochunghnung Zate

Mihrâng huoisen, Krista Pasalṭha

Pastor Elson J. Ṭhiek

Krista grape huon ah sin thawin sik le sa khawm thlier hran nuom lova rinumna le harsatna tam tak i tuor hai kha Vân khin hre mawl raw se. Rawngbawlna lien lem i nei pei ding kan beisei laiin, zuol an hung ko "Krista pasalṭha a fam ta ie" tiin. Hril a hai in lung lam kan invai ruoi ie !

Thei chang sien zuolko thuthang hi zân tawnmang nisien kan ti vawng vawng. Ei khuolzinna ram mâksana ei chatuon In i mîn lawi san ni hin, luoithli nûl bâng zai reng kan rel thei nawh. Sienkhawm Vân mipui hai ta ding chun lawmna zaihla rimawi rema Krista Mo an lo lawm ni che a ni si maw !

Mihrâng a fam ta ie Vân khawpui sukmawitu dingin. Rimawi khawvel sukvultu kha khawla'm a um ta a? Zâihla rema lêng tin âwi tlai tu kha bungkau ang her tliek e. Ami za tam tawna chatuon hringna biethu inhlântu kha thina nunrawng simthlipui ieng hrângin rauthla vângkhuo her lût e. Tu am hrethiem le tuor thiem um an ta?

Sakruong dâiriel chang ding chun kan la phal naw che. I thai lungmawl chan ding hi i dawn ve naw maw? Thlumte ang i thlîr lai i hrai khaw êng hmu hun ding hi, pawm kan in zuom lul nawh hmangaitu zuopa i ṭhang naw chun. Hringmî za tam khuoi ang kâina chu bungzâr ang her thliek ta si maw. I chûn le zuo'n ṭap lai an bâng thei nawh. Luoithli nûl kan bâng nawh i û le nau haiin. I la hun nawh, kan la phal naw che...!!!

LAL RAMA sangawi i zawn pui hai di'n ṭapkhuo a sei vawng vawng. I sakruong hlimthla chau maw kan chantawk. I la hun naw ie piellei thuoriet hnuoia riekrûn rem el ding chun. Zuong tho di'n kan ko che, sienkhawm kîr rel di'n i mawi ta si naw maw...! I sakruong buonlei changin riel tui ang luong ral sien khawm, i sakhming sâm rêng hi bâng zâi rêl naw'ng kan tih hring dam sûng hin. Krista Chanchinṭha la hre lo sâng tam tak bo hmang mêk hai san suok tu dingin i la pawimaw de aw!

Vân Jerusalem thar ah Vân Thangsuopuon leh Serafîm haiin lo hmuok hai sien la che, I hmangai Krista ta dinga i rawngbawlna lawmman Lallukhum ropui tak leh chatuon hlimna hlamawi remin lân tuok khawm ngei ei tih. Kei ni khawm chu hun chu nghâkhla takin hi hnuoi rinum a hin Krista tading chauvin hringnun tluonglam hung hraw diem diem kan tih. LAL NAU hai chawl na Vângkhuo a chun mi lo tuok ngei dingin thlamuong takin lo chawl ta raw aw. Phallo te'n mangṭha. Kan ngai che Elson.

Khawvel mihriem ditsakna(Nepotism) ei ti le Pathien ditsakna danglam

- LH Shakum

Mihriem in hmathlir thra nei le beisei lien lem nei zing pumin a damsung hringnun chu khal thiem tumin kawng tamtak dapin hringnun a khal mek zinga. Dan hnuoia khawsa eini hrim angin,thuneina le khawsakna tieng ei chunga mihriem iengzam an um,ei hnuoia iengzam an um tin nun ei khal mek bok. Khawvela ei um sung damsung khawsak ngaituo loa khawvel nun hmang liem el hlak thil thei nilo. Ei pathien meu khawmin athaw naw tu chu fa naw raw se ti kha ani meu sia. Ei khawsakna le fak zawng dan ang peiin hotu,thruoitu,thunei in sang lem thu zawm alo ngai ta pei bawk si.hotu chunga le thruoitu chunga sinthaw thra le ringum hlak mi chun ditsakna le chawimawina hiel a dawng hlak.hotu le thruoitu ditsakna hlaw thei khawpa sinthaw le ringum mi chun a khawvel hma chu a eng hle ring a um.chuong khopa ringum le hotu thuawi chun iengkim deu thawa asi le thra kawnga khawm mi naran ringot nek chun thrangpui tu le bawi sawmtu thlasam ring aum kher nawh. Chuong khawpa khawvel khawsakna kawnga ringum le suokthra ditsak le hma tieng ni eng in a hmuok zing lai ei Pathien tadinga rawngbawl le suokthra le ringum, khawvela chanchin thra puongdar dinga inpe le aram tadinga asur asa khawm tiloa ama rawngbawl tuhai hin ditsakna an chang dan hi ava dang dai de maw...! Khawvel thil taka khawm kristien sakhuo bie seng senga khawm dem le hrilsietna ding neilo ni bawk, "khawvel pumpuia fe unla chanchinthra hril ro"tia athu tiem amaksan hlen dinga inpe le hring taka rawngbawl le mita dinga malsawmna in tluntu ni zing bok si hieng khawpa ditsakna piellei a chang el ta hi chu ditsakna vangduoi ti nuom rum2 el ani. Khawvel mihriem thlirna tukvera chun tinaw ruol an nawh. Sienkhawm siemtu le indin tu in ata ani zie asuk lang si. Thawthei hlak ei nei ta nawh. *Pastor Elson...* khawvela hin ditsakna chang zo nawla khawm Van Jerusalem ah Ditsakna le chawimawina insang lem khawvel in a thlir le pek phaklo ditsakna i hmu ta awm sia maw.. Khawvel ditsakna sira hnawl ngama i rawngbawl pek ei pathien in hun lo taka ditsakna vangduoi an khum el che hi chu hringmi tin lungril a ngui hle ani. Sienkhawm chatuon ditsakna chuoi thei talo ding alo ni bawk si. RIP

KHAWVEL ṬHENA RAM

~Lalṭhavel Lungṭau

Kan hlîmna sukzuoltu, kan lâwmna sukfamkimtu a herthlîek ta maw Elson J ṭhiek?

I hlamawi le zaimawi tak hân ni tin an mi’n awi kan ngai bang thei nawh.

Sienkhawm, hnêmtu I um si nawh, nang ngai sukzuoltu cho maw an chang tah.

kan la phal thei nawh che, kan hrietthiem thei nawh pîelrala riek rûn i rem hi.

I thina san an hril kha a na a nih. Kan dêm naw che,Damna rûn khawm i ta din damna a tlîng zo naw maw? A pawi vâwng vâwng ngei el😭Aw i fam ni anthawk khan kan hlîm laini i liempui ie, Ngaiin kan ko che!

Hlîm zai reng kan rel thei nawh, hang dawn ve tâm i thai mampui, nang ngaiin a ṭap huom hûom ie.

I hla mawi “Lal nau ka lo ni tah” tiin a'n thla che a ṭul ta si maw? A na a ni, hnem thiem rêng kan um nawh,tawnmang ah bek rauthla’n nang hung lengla, hung hnem rawh.

Aw vawikhat bek hringmi lai hin hung kir nawk la

👏kan hrietthiem thei lul nawh zamuol I liem el hi.

Fam chang bêk inruol sienla maw .

Kir rel din a rem naw maw? 

Aw Vân angêlhai kan dit ngawi ngawi,

kan la phal thei naw kha nêmten lo chawilien ro,

An hril râuthla vengkhuo kawtsuoa darang intawng in lan lawm nawk din.
Phal lo takin mangṭha tiin kan in thla che a ṭul ta sih.

Thlamuong takin chawl rawh aw (Adieu goodbye).👏

KAN LA PHAL NAW CHE

- Margreth Tuolor 

Chûn le zuo fanau  malsawmna rîla râ rochan dinga hringmi laia hung in siengin, ihring damlai Pathien kona dawn léta ahnung zuia a rawng ringum taka ibawl lai in. Thina nunrawng zâr hung thliek chun, I hring damlai pâr ang ahung her thliêk ta maw!.

Kan phal theinaw che thlafam dairiel Chang ding chun.. I maksan I kawppui, ichûn le zuo, I u le nauhai le nangma ngainatu tamtak hai hi hang thlir ta, I thâi duotlaiin nau ang trap in ako che. I chûn le zuo i û le nau ha'n an ko che  dawn Dan kan thiemnaw ihung dawn naw ding maw? Nang chu hlim ten Pâ ângsûnga chun hlim le lawm taka lalnau Nina changa lâm dêr dêr inuomna hmun Chung van Jerusalem thara chun Zâi lo vawr ta la. Hring chang sûng hin i sakhming hi theinghil ni um ta naw ni a. I vul hun sûnga rohlu tam tak imi maksan pek hi lungrila vawngin I sulhnung ahin inchuk ding tam tak kan nei a nih ti hi thrangthar haiin la hung hre pei an tih.

Rev Kh Thang Dailo:
"Khawvelin an hrietlo nun ka nei........" ti phuoka a lo khêkpui chu hi hi a lo ni ta maw? Ngaiin inro hle inla khom a nun hlu lem le ropui lema hring dingin a lo fe tah, tiin ei inhnêm a ṭul an ta hi. A hringnun tawite sunga a rongbawlna râ hai le a hla hai hi lâwm (celebrate) a ei lâm hi a hung dit dan chu ni lem ta ngei a tih.

Nienglawmkim Sungte:

Aw ana..hril ahai lung kan vai..Khawtlang angui ṭap kan bang thei nawh enchimlo Salem zuopa runrem ah Angel ieng hringnun i pham ta maw..I nungthulin ṭap puon bang thei kan ti'm.

Vincent Hekte Hmar:

'Hnuoi dânin mangṭha'

Hringmî ka chang sûng hin hrietthiemnaw tam tak ka nei. A ṭhen hrietthiemthei ding âwm chu hrethiem tumin ngaituona tamtak ka sêng hlak. Hnuoi taksa hlîpthlaa vân taksa inbelna chungchânga ruok hin chu a tam lemah hrietthiem tumna ka nei nawh; ka hring hrietna'n a phâkthei ding âwma ka hrietnaw leiin. A lo fe hmasahai chunga hin chu lungkham ding a um tanawa, hnuoi taksa inbela hring la changhai hi a nih ngaituo um lem chuh!  Ka'n siengna chûn-le-zuo le ka insiengpuihai chunga a la tlungnaw leia ngâisamah mi ngai naw unla. Ka tuok ve phâ chu matheiloin luoithli la nûl ve ngêi ka tih ti hi ka kutpâr um zât ka hrietchieng angin ka hrietchieng bal.Hnuoi nun hi a tâwpna nisien chu ei inṭhena thu ngaituo leiin mihringah ka suoknaw hiel âwm. Sienkhawm, âw sienkhawm, lei nun tâwpna hi vân nun inṭanna, hnuoi thina chu vân hlâwkna a nih ti ka ringnaa chau hin ka muong lem a nih. Eini hai khawm ei silfên thara ei inthuom ve pha, a chun la hrethiem ve ngei ei tih.

Vânmihai, in chipui in inlawi lo lâwm ro!

A mâksan a kawplai le a hrai khaw êng hung hmu ding mêk chungah zângaina, lunginsietna le hmangaina tâwp inlangtir dingin Pa ke bulah mi lo hnipêk ro.

Nghilni umlo ding, i sakhming sâwttak hrietzinga um ding. Lo in hmasa, thonawkna nia kan thoruolpui ding, Lalpa rawngbawltu ringum, ka Pute Pastor Elson J Thiek, intawng nâwk hun hmapoa dingin ngâihle pumin 'Hnuoi dânin mangṭha' tiin ka'n thla phawt che.

A hminga khawm i ko phal ngailo                              -Nau-a(Vincent Hekte)

Zatea HN Zate:

Elson J. Ṭhiek - Hieng ela imi hang maksan thut el hi chu ava na vawng vawng de awwwww... Ka tuor hi i tuor ni ve sien chu intithei bik naw tawp i tih!! Ka ṭawngṭaina suk tamtu i hung inchang taa,  Pathien hmabula bawkkhup rawn dan min chuktirtu i hung ni taa, Pathien hring chu i mi'n hnaizuol tir bawka; chu kawnga chun ka lawm em em che ka Tupa... I thi dan hi a ropui ka tia; hienga thi tak hi i tum reng chu ni naw lakhawm; Krista ta dinga Martyr chang hi i rin nawh ti ka hriet, chu chu Lalpa'n hriein hun zalen lem ah i lungril a suk puitling pek che ah ka ngai ta lema, chu kawnga chun ka lung a dam, I nuhmei I sung le kuo unau hai le i nau la hung pieng ding ngaituo hin Zan khawm ka in thei ta ngai nawha; ka mumal bek bek thei ngai nawh, Ka pangai naw zie chu ngaituo nuom naw ti nih. Hieng em em a ka hung ngainat che hi ka thu an nawha, tirtu mi tir ah ka'n ngai... Ei pahni hin nuhmei ei nei intak ta maw Pute i mi tia, Nuhmei i nei ve a, kum khat khawm nei hman lovin i thre nawk nghala, Iengtinam ning ata Lalpa? I rorel dan hi indik I ti vawng di'm ani ka ti nuom chang che a um hlaka, Nangin ṭha I ti chun thil ṭhalem kan tadingin I sie a nih ti mi'n hriettir la, mi sukpuitling pek ngei rawh.

Samuel L Songate | Pune:

Pune-a Children Ministry Course i hung inchuk laia Pathien rawngbawl le Pathien inpâk inhawi i ti thei zie le, Sunday vai laia practical ministry sawl taka i va hmang zoa Hmar Christian Fellowship Pune inkhâwm thlâkhla leia lunch khawm fa hman loa i hung hnawt ṭâwk ṭâwkhai kha a lo va ropui de aw! Pathien thu le hlaa kohranhai i mi'n awi hai kha kan la va ditkhawp naw ngei!

Pathien ram a ni phawt chun tu pawl kha pawl ti loa ṭhahnem i ngai em em el dam hi entawn tlâk chu i lo va ni ngei!

Hienga I mi mâksan ding hi I hrietlâwk lei mani ding August 16 & 23, 2020 haia Hmar Christian Fellowship Pune Online Zoom Worship Service a, thu le hlaa rawngbawlna i hung nei kha. I sermon le hlasakhai khawm naah an la châm zing an sawn naw!

Hienga i mi hei maksan el hi keini chun kan la phal lul naw che ie! Nang ruok chu hlim le lawmtakin hnena hlamawi remin Lalpa inpâkin i lo lâm dêr dêr ta ding a na! Ngai i um vawng vawng ie! Hringmi tiem dana chu muol mi liemsan el ding hin kan la phal thei naw che a nih ie! Ralkhing tienga ei inhmu nawk hma poa dingin mangṭha!!

Joseph Thanzam Pakhuongte:

Thilsiem in a siemtu remruot dan hai iengleiin am sêl thei ata!? I vul ding chau am ani ka ti laiin i hun a lo tlung ta si! I hmulo ringumtaka a rawng i bawl pek, malsawmna le thlamuongna petu che Pathien ropuitak chu i mit ngeiin i hmu ta maw!? Lungawina famkim le hlim takin chawlhadam vawng vawng ta rawh.

Vanlal Hmar Tuolor:

Unaupa Elson, fam i chang dân reng hi Hringmi ditdana chun ala hun nawh ti bâk chu hril a hai. Sienkhawm fam i chang ni hin Vâna Serafîm lêng vêl hai khawma thikna ṭhaa an thik thei rau ding khawpa A rawng i bawl pêk i Pathien ngei chun Hmawn theia siem i maksan i hnuoi taksa ngei hi Lal nau tak ngei ini na hi Mi po po hrieta a puong pek takzet che a nih.

Thina leia i maksan u le nau ruoltha hai hin chu kan la ngai takzet che a nih.

Pa angsunga muongtakin lo chawl ta raw le!

Lalramsan Hekte Hmar:

Krista Pasaltha Pastor Elson J. Ṭhiek.

Fam chang dingin kan la phalnaw che ti chu ami hrepuitu chung Pathien a nih. Amiruokchu, chu Pathien ngei chun hun ruot a neia, A hun ruot chu mihriemhai kal/sêl ruol a ni nawh. I famchangna hin lunglai a ṭhawngin luoithli nul naw thei kan ni nawh. Ringumtaka a rawng i bawl Pathien ngei kuoma chun hadam takin lo chawl ta rawh.

Jonathan L Joute:

Buonlei changa famkhuo I pan dán hin, pawmlai nau ang ṭapin I sakruong luoithli leh kan chûl.

Tawnlairang tawna pielral I tlung pha ngai vêng I ti'm maw; I ṭhen le ruol hai...!

Rauthla khawpuia intuok dingin, Mangṭha ti I lo ṭûl ta maw.....!!

Mangtha le....!

Julius Infimate:

I sangpa hin ka la phal naw che U_El. Sienkhawm Lal Remruot hi dang ruol ani si naw maw.

Thlarau bohmang zawnga, sansuok dinga, Ramthim i hung pan lai kha, ka mithla a hin a hung inlang vawng vawng ani ie.

Hmar Rimawi khawvel a hin Bul ka ṭanna ding tiin nasatakin hma imi lak puia, sienkhawm zo hman talo in maw, imi liemsan tah.

U_El ka ngai taluo che.

Hlim le Lawm tak in Vankhawpui thar a khin lo lâm der der ta raw aw.

I sakruong bek hmu hman tumin ka hung pan che.

I Sangpa, Julius Infimate

B Lalsanglien Inbuon:

Taksa ramah rimawi khawvela ka lung inruolpui, thlarau ramah lampui indik mi kâwkhmutu Pastor Elson J.Ṭhiek, nat lâwk khawm um derlo a fam i zuk chang el hi tuorthiem a'ntakin lunglâi a ṭhâwng ngei el, hnuoi dan ah kiemna nisienlakhawm Van tieng hlawkna ani meu sia, i maksan i ditlai i nuhmei chan ding ka hang ngaituo in chellui thei chang la ka nuom ngawt el.. I damlai hun tawite sunga ringumtaka i Pathien rawng i bawlna ah A thlazâr hnuoiah thlamuongtakin lo inchawl hadam tir mawl rawsen che. R.I.P

Lalzosang (Changsan) Vairengte IOC veng:

Suongtuona ram le tawnmang ram akhawm kanla mang ngai lo-Pastor elson j thiek-Fam thlipui nunrawngin maw ituoi dawnglai lo herthliek in,raltieng rammawiah khawvel ruolhai leh the-na biethu imi lo tiem el tak hi-i zamsan i chun le zuo hraileng hai hin dawntu nei lo khawlai nau ang el in, i sulhnunga hin taplai nau ang banzai rel kan bang thei nawh,

Hringmi changzo lo a, muol i liemsan i rawngbawl-pui hai hin ngai hle inlang che khawm thlarau thil le tisa thil hi in chelrem  a remchang tak naw leiin, Van Jerusalem-ah Angel var leh Serafim hla mawi saka, nau anga inlawm nawka intawng nawk ngei dingin phal lo te'n mangtha.

Lalthangtlei zote | Saiphai:

Ka School naupang fel lê taima êm êm lo ni hlak.

Ṭhena rama hin ṭhenaw biethu ei tiema.

Ṭapna rama hin ṭapin luoithli ei nul bawk hlak.

Lungngaina ramah hlimin innuiin ei lêng hlak kha.

A rawng i bawl hlak ei Pathien kuomah ṭap le lungngaina um ta lo ramah i min lawisan el hi chu tuor nêm antak ngei el.

Serafim hai leh zai vawra, hnuoi rinum hnung sawn ram ngai lovin muongten lêngin lo chawl la. I suhnung ram rê ahin i sienglawina van hmun thlirin damlai ni hung hmang kan tih.

Elson. Mitthli leh hi thu ziek hi i ta din kan hlan che. KA NGAI CHE

SK Hrangate | Dimahasao Tuolpui:

Kan ngai emem Pastor Elson J thiek famthlipui nunrawngin i sakruong lo her tliek sienkhawm I thlarau ruok chu suksiet thei ta lo ding, vankhawpui thar ah, muongte'n lo chawl ta rawh.
Krista hming a i Martar  changna hi Vanmi ha'n lo hre mawl raw hai seh.
Aw van mi hai, pastor Elson hi ropuina ram a hung lut ni khan van thangsuopuon ropui lo in sil tir ro.
I rawngbawlna hai, i hla phuok-hai hin, hnuoi kohran hai lai rawngbawl zing dingin van Pathienin malsawm zing raw seh, hlim tak in van-a khin intuok ei tih. Ei Lal Isu thutiem angin i taksa hi thi sienkhawm thlarau ruok chu hring zing a tih

Buonneitling Inbuon:

Pastor Elson J Ṭhiek 14/09/20 hi nia U..i fam chang dân rêng dâwnin, lung a ṭhawng ngei ie, Pathien Biekin le, Ama inpâkna lâmzâwllai tak ngîel khawm suoksan lova fam i hang chang el hin thil tum chu a nei ngei âwm ie, nang a hrephâk ta phawt hai che lunglainat chun, tûm a mitthli tla râwn tak ti inruolsiek ang elin, bienga mittui a luong zûoi zûoi, lairil ana, lung lam kan invai, hril kan va hei ngei de. I thai duotlai ka u Esther le i vân malsawmna rîllara chan ding hrim khawm indâwn tir theilo khawp hîel che hlîempui chun a hertliek el ta che chu ana maw. Lalpa pêk che "Lal nau kalo nih" tiin ei Pathien chibai hung bûk pei kan tih. I hringna hlutak kan chânna a hin, mi tamtak hringna thar neina hung inchang mawl sien, I maksan i nuhmei, i sûnghai le nang lainatu hai popo che hi, i sulhnung po pova hin, Lalpa'n a thlamuongna ditum tak chu intlungtir mawl sien, natna le hlîem hrim um nawna hmuna chun, nakie le intuok nawk ngei dingin, phallo takin ka u mangṭha.


Josephine Hmar:

U Elson, hi khawvela in zin hun sûng tâwite chau nisien khawm Lalpa'n nang le rawngbawl kawp theina hun tâwite ami lo buotsai pêk hai kha a hlu in lawmum ka ti ngawt el.
I nuna hin entawn ding le inchûk ding ka va hau ngei.

I ṭhatlai hun, i hun tam lem Lalpa ta dinga in pêkna hi ava hlu in entawn thlak ava ni ngei!
I nuhmei le i naute ala hung pieng ding mêk hi LALPA'N ngaituo ngei a tih.
Lalpa ângsuongah thlamuong takin, chawng ang chênin, hlim takin i lam dêr dêr an ta maw.

Upa C Zathang | Sielmat:
Pastor Elson J. THiek, Lalpa rawngbwla a'n pum pekna hi a van thuk de aw..!  Krista hnung zuia, a khuolzin kong a hraw tawp dan hi! 
A theina tawp tak Biekinah!
A trawng tawp tak Biekinah!
A mithmu tawp tak Biekinah!
A hriet theina tawp tak Biekinah!
Nakawr hriet theina tawp tak Biekinah,
        A rawngbawlna vawrtawp ni hung thlungin, krista ta dinga martar changin, thisen tam tak senga, Biekin chung sang a'n thawk lamzawlah ngei a ta din vanleilak a hung in daw el hi chu, ka va ngaisang ngei de aw..! chu chu Lapa ngaiah thil hlu tak a ni bawk si a. 
           Saiphai thlanmuol neka, Lalpa rawng a bawlna hmun, Hmarkhawlien thlanmuol, Lalram a thichilna hmun ngei ah, sammang zala,  A rawng a bawl pek Lalpa Isu le intuokna hmun ding a (tuorem) hung ni lem tah hi, kei chun a mawi ka ti a,  chu hmun chu, a ngurthi angela, Lalpa'n A mi thienghlim tam tak ko khawma, Pastor ruong hmanga Isu ropui taka a hungin chawimawina a ni si a.

Dr. Chaltonlien Amo:
[ MLA (Manipur), Gen.President, HNU ]
Pastor Elson Jubilee Thiek hi Pathien rama a rawngbawlna le a chanchinhai ka hriet hin ka mi ngaisanghai laia mi pakhat chu a ni ve a nih. September ni 14, 2020 program ah a ruong bula khan um phak ve lang ka nuom ngawt el.

Hi khawvel a hin thil thaw tul le thaw nuom tam tak a la nei ka ring. Amiruokchu, a rawng a bawlpek Pathienin hun a ti ta ning a tih Ama kuom ah a lo œhuoi tah a nih.

Pastor Elson J Thiek, Pathien œi mi, personality nei tha em em, hnam ta dinga mi tangkai, ei literature suk hausatuin fam a lo chang ta hi a nuhmei, a sung-le-kuo le rawng a bawlna EFCI kohran chau nilovin ei hnam ta dinga channa nasa  tak a nih. Inpam a um tak zet a nih.

A maksan a nuhmei le sung-le-kuohai Pa neilohai Pa, Pathienin umpui tlat sien ti hi ka tawngtaina a nih.

Elson inthlana post siem ding le inzawma dagundaz@gmail.com a inthawka kan dawng ruok chu kan hung sie sa naw a nih.