Justin Bieber Hla Thar 'Holy' Nen

 (Gospel Album Kailawn A Ni Thei Ang Em?)

Haflong | September 18, 2020: Canadian/American pop star lar tak mai Justin Bieber chuan a hla thar ber “Holy” chu September 18, 2020 khan a tichhuak. He hla-ah hian Chance the Rapper pawh a lang ve.

“Holy” tih hla hi rinna leh beiseina hla, “When you hold me, hold me, hold me / Feels so holy” tihte a awm nual mai.

He a music video hi Colin Tilley-a’n a direct a, zaithiam le lemchangthiam Ryan Destiny   chu Bieber-a bialnu lemah changin, Wilmer Valderrama pawh sipai lemah a chang bawk.  

A video ah hian Bieber  chu thautui siamna hmunah hnathawktu pakhat hrileng vanga an hnathawhna inkhar mahse beiseina leh thlarau nunin a vuan reng lem a chang a.

“The way you hold me, hold me, hold me, hold me, hold me/feels so holy, holy, holy, holy, holy on God,” 

tiin a thunawn-ah Bieber a rawn zai a.

 Bieber leh Destiny-te hna hloh avanga an awmna ṭanga hnawhchhuah tawk, an bag nen zanlaia kalna tur mumal pawh neih chuang lovin an chhuak chu Samari miṭha sipai Valderrama chuan kawngah hmuin, “Chaw lum tui tak awmna lamah ka phei dawn, induh chuan mi zui r’u” tiin an inah hruaiin a chhungte hnenah a hmelhriattira, Pathian hnenah ṭawngṭaiin chawei dawhkan kilhovin hlim takin an awm ho ta a.

“I know I ain’t leaving you, like I know he ain’t leaving us,” 

tiin Chance-a a rawn rap-a, a bul lawkah Bieber’n 

“I know we believe in God and I know God believe in us” 

tiin a rawn chhunzawm thung.

Tun ṭuma Justin Bieber zai pui Chance the Rapper hming tak chu Chancelor Johnathan Bennett a ni a, a ni hi sakhaw lam kaihhnawih message a hlaahte a hman ṭhin avanga hriat hlawh niin Christian rapper inti ngat a ni. Bieber nen hian Kanye West Pathianni Inkhawmna program ah anlo zai dun tawh bawk.

Bieber chuan twitter lamah “Holy” hian a tan kumbi thar “new era” a entir tiin a post-a. Hun rei tak ata a manager ni tawh Scooter Braun chuan a fans Belieber-te chu “thil ṭha tam tak la rawn chhuak zel tur a awm tih inhre lo” tiin twitter lamah a post bawk.

May thla khan Bieber hian Ariana Grande nen thawk dunin tunlai hrileng boruok lam hla “Stuck With U” an lo tichhuak tawh a. February thla khan a studio album pangana “Changes” a lo tichhuak tawh bawk a, hei hian Billboard 200 ah No.1 a thlenpui bawk a ni.

Justin Bieber leh a nupui Hailey Baldwin Bieber te hian tun September thla hian an inneih kum hnihna an lo lawm tawh bawk.

Beliebers (Justin Bieber fans-te kohna) niin nitin Bieber’n social media-a a thil post ṭhinte follow-in a chanchin chhiar reng lo mah la, he “Holy” hla leh music video a ṭang ringawt hian he zaithiam naupang te aṭanga rawn lar chho, mi tam tak ngaihsan a nih lai renga lehlama ‘haters’ ngah tak mai, a hringnunah mimal harsatna, ngaihzawng lam, ruihtheih lam leh thil dang tam tak paltlanga, nupui hial rawn neih ta hian danglamna engemawni amaah hian a nei tih I hre theih nghal ang. A music video-ah hian Isua Krawsa an khengbet lai lem leh a piah lawka a hla thupui leh a hming inziakna awm bawk.

Social media-a Pathian thu a post ṭhinte, Pathian hla (Worship song) a sak ṭhinte, inkhawm a kalnate, Baptisma a nupui nena an chan laite I hmuh chuan Bieber hian Thlarau lamah nasatakin a ṭhang chho a ni tih I hre thei ang.

“New era” tih hial-a he a music video thar “Holy” hi twitter lamah Bieber-an a post a ṭang ringawt pawh hian he single thar hi a fans tam tak ten gospel hla sa tawh tura an duhna leh ama nuna Thlarau lama inthlak danglamna nasatak awm tih puitlinna tura Gospel Album siam tumna kailawn “kumbi thar” chu a ni thei tawh mai ang em?

- Lawrence S Khawzawl

Columnist, EXPLORE MIZORAM