Huaisen lawmman Jeevan Raksha Padak 2019 dawngtu 3 te hnenah lawmman hlan

Aizawl | September 24, 2020: Nimin khan Home Department buatsaihin SAD Conference Hall-ah huaisen lawmman Jeevan Raksha Padak 2019 dawngtu 3 te hnenah lawmman semna hun tawite neih a ni a, Home Secretary Pi Lalbiaksangi’n he lawmmanin a ken tel Medal, Certificate leh cheque a hlan a ni.


Home Secretary Pi Lalbiaksangi chuan huaisen lawmman Jeevan Raksha Padak 2019 dawngtu mi 3 te inpekna leh midangte nun chhanhim nana an nunna thapa, mahni nunna chan hial an awm chu lungchhiattlak mahse an thil tih hi mihringin kan mihringpuite tana thil kan tih theih ropui ber a ni awm e, tiin an thil tih chu hriatreng tlak a nih thu a sawi.

Program kaihruaitu Pi Ramdinliani, Additional Secretary, Home Department chuan lawmman semna hun chu ropui taka buatsaih phu hle mah se tunlai hripui leng boruakah puipunna ang chi tih a rem loh avangin he lawmman dawngtu leh an chhungte sawmin programme tawi fel neih a nih thu a sawi a. Jeevan Raksha Padak chungchang leh he lawmman in a ken tel te a sawifiah bawk a ni.

Pu Lalthiamsanga Sailo, Joint Secretary, Home Department chuan heng mi pathum te chanchin leh lawmman an dawn nachhan te sawi fiahna hun a hmang a ni.

Jeevan Raksha Padak hrang hrang zinga sangber Sarvottam Jeevan Raksha Padak 2019 dawngtu hi Pu Lalrempuia (L) Armed Veng, Aizawl niin vawiin khan he Award hi a nupui Pi Lalhmachhuani’n a dawng a. April ni 5, 2019 khan Pu Lalrempuia (L) chu balu lain Sairang luiah hna thawkin a kal a, lui kamah a fapa kum 10 mi Samuel Lalrinsanga chengkawl zawng chu a chesual a, luiah a tla a. Pu Lalrempuia hi tui hleuh thiam lo nichungin a fapa tui tla nun chhanhim nan luiah zuang lutin a fapa chu a chhanhim thei a, mahse amah zawk chu tui a tlain, a boral ta a ni. Sarvottam Jeevan Raksha Padak hian Medal, Certificate leh pawisa fai cheng nuai 2 a keng tel a ni.

Jeevan Raksha Padak dang Uttam Jeevan Raksha Padak 2019 dawngtu hi Pu Lianhawla, Tuidam khua, Mamit District a ni a. May ni 15, 2018 khan Pu Lianhawla leh a nupui Pi Lalnunthari lo lama feh turin an kal a. Chawhmeh zawnga a nupui a kalsan zawk hlanin savawmin a nupui hi lo bei a, a nupui mangang au thawm chu a hre ta a. Mahni sahimna ngaihtuah miah lovin a chem ken lai chuan savawm chu a bei let ta a. A nupui hliam na tak tuar chu kawng lamah vak chhoin, tanpui turin a au a, a au ri chu motor a chuang ten lo hriain an tanpui ta a ni. Pu Lianhawla hi a bekah te, a khupah te leh a pumah te hliam na tak a tuar a, a nupui pawh hi a lu vun hikin, a taksa peng hrang hrangah hliam na tak tak a tuar bawk a ni. Uttam Jeevan Raksha Padak hian Medal, Certificate leh pawisa fai cheng nuai 1.5 a keng tel a ni.

Jeevan Raksha Padak dang Jeevan Raksha Padak 2019 dawngtu hi Pu Lalawmpuia, North Serzawl khua, Aizawl District a ni a. June ni 26, 2019 khan an chenna in a kang a, choka a gas cylinder chu kang kaiin nasa takin a kang ta a. Gas cylinder alh lai chu pu chhuakin pawn lamah a theh chhuak a. A nu, a nupui leh a fate 5 nun a chanhim thei ta a ni. Jeevan Raksha Padak hian Medal, Certificate leh pawisa fai cheng nuai 1 a keng tel a ni.

Kumina Independence Day lawmnaah huaisen lawmman Jeevan Raksha Padak 2019 dawngtu 3 te hming hi puan a lo ni tawh a. Hripui vangin a hunah tak Medal te hi Ministry of Home Affairs chuan an lo thawn thei lova. Tunhnai mai khan Medal, Certificate leh cheque te hi a lo thleng a. Vawiin khan a dawngtute hnenah hlan a ni.

Post a Comment

0 Comments