Aizawl | September 26, 2020: Health & Family Welfare Minister, Dr R.Lalthangliana chuan vawiin khan ZMC COVID-19 Labaratory-a sample test hna thawktute hnenah Lakhuihthei, Thingfanghma, Apple, Valencia, Dragonfruit, Balhla, Cake leh Frooti engemaw zat a hlan a, Health Minister-in a aiawh a a mi tirhte kaltlangin ZMC-a thawk Amanda Lalremmawii Varte leh Lalparmawii, Ward Superintendent-ten thilpek hi an lo dawng a ni.
Health Minister chuan COVID-19 hripui leng mek karah ZMC Laboratory-a hnathawk ten hri zawn chhuah hna a thim a var pawh thlu lova chhun zan zawma rim taka swab sample test hna an thawk chu an chhuanawm a tih thu a sawi a. ZMC laboratory-a thawkte inpekna hian hripui leng karah 'zonun zemawi' hmuhtheihin a rawn par chhuah tir hi a ropui hle a ni, a ti a. Chutiang bawkin sample lakhawmtute leh contact tracing team te thawhrimna leh inpekna hi a hlu in Zofate rohlu 'Tlawmngaihna' tak tak thinlung pu chung lo chuan mi nazawng tan tlin chi a ni pawhin a lang lo, a ti.
Health Minister chuan Swab sample lak tawh, test result chhuak mai theilo, hun engemaw chen nghah ngai thinte chu lo hrethiam hram hram turin a ngen a. Swab sample lak tur a tam a, thawktute an indaih lovin chhun zan zawmin an thawk char char reng a, theihtawp an chhuah tak meuh a ni tih i hrethiam hram hram ang u, a ti a. Ni reilote chhungin lakkhawm sa (backlog) zawng zawng hi test zawh kan in beisei tawh a ni, a ti a. Dawhthei taka an nghah thin avangin lawmthu a sawi bawk a ni.
Tun dinhmunah ZMC (Dedicated Covid Hospital) ah hian Covid-19 Confirmed Case 33, suspected case 4 leh nausen piang hlim 3 enkawl mek an ni.
Post a Comment
He post chungchanga i ngaihdan lo sawi ve rawh: