Sept 19, 2020: Delhi khawpuia awm hmun bengbel Chanchinbu mi pakhat chuan India ram chhung thil pawimawh bik ( sensitive informations) leh ram ri chungchanga India ral rel dan leh sipai dah leh chet vel dan te China enthlatute (Chinese intelligence) hnena sum tam tham taka hralh țhin chu man a ni. Ram pahnih te inkara boruak so san zual lai taka ram enthlatu man chhuah a ni mai hi fimkhurna dar khawn rik tharna atan hman a țul ngei ang.
Delhi Police te sawi dan chuan a thu rualpui Chinese hmeichhe pakhat leh a pasal Nepalese pakhat te man tel an ni. Hemi te sawi dan chuan freelance journalist Rajeev Sharma hnenah hian sum tam tham tak thu ruk pawimawh an hriat man hi an pe țhin a ni.
"Special Cell, Delhi Police te chuan freelance journalist, Rajeev Sharma chu thu pawimawh bik Chinese intelligence hnena a hlan chhawn țhin avangin an man a, a thu rualpui Chinese hmeichhe pakhat leh a pasal Nepalese mi pawh man tel an ni. Sum hi shell company (company lem - a tak hmuh tur awm lo, office leh thawktu pawh nei mumal lo, lehkha phek chiaha awm, Bank account te leh sum peipunna lama inhmang lawi si etc) te hnen ațangin sum pek tur hi an dawng țhin. Chinese intelligence te hian he journalist hi India ram chhung thu pawimawh bik an hnena a hriattir man atan hian sum tam tham tak an pe țhin ," tih thu Delhi Police te chuan an sawi a ni.
"Mobile number tam tak, laptop pawh engemaw zat leh hetiang tihna atan a hman țhin hmanraw dang te man a ni," tih police te chuan an sawi bawk.
Mr Sharma, journalist hi Press Information Bureau (PIB) hnuaia inziak lut, accredited journalist a ni a, Delhi khawpui Pitampura area a cheng a ni a , Delhi Police, Special Cell te hian an man ni tak chu tunkar Thawhțanni kha a nih thu vawiina chuan an sawi.
"Ram venhimna lama thu pawimawh bik (defence-related documents) pawh kawl la nei ngei tura ngaih a ni. Chhui chianna hi kalpui mek a la nih avangin thil dang te chu thil hmuh chhuah anih leh hunah puan a ni leh ang," tih senior police officer Sanjeev Kumar Yadav chuan a sawi.
Mr Sanjeev Sharma, Delhi Police thu puangtu sawi dan chuan thu pawimawh pakhat hlan chhawn man atan hian $1,000 zel a dawng țhin a, kum khat leh a chanve chhung hian Rs 30 lakh chuang a dawng tawh a ni. He Chanchinbu mi hian ram venhimna chungchang lam China ram Chanchinbu *Global Times* tan a ziak țhin a, Chinese agents te hian kum 2016 ațang khan an be țan tih thu, police te chuan an sawi.
(With inputs from PTI)
Source :
NDTV
September 19, 2020
@ 04:54 PM IST
====19==09==20==
Huna Kawlvawm
Post a Comment
He post chungchanga i ngaihdan lo sawi ve rawh: