Cachar Driver Association an nuar; Mizoram chhungah lirthei luh an phal lo!

Aizawl | September 12, 2020: Mizoram thenawm state Assam chhunga Mizoram nghen ber district Cachar district chhunga Cachar Driver Association chu vawiin atang khan an nuar a, Mizoram chhungah lirthei luh an phal lo.

Thudawnnain a tarlan danin, Cachar Driver Association te hi Vairengte thlang lawk Lailapur-ah duty in , Lirthei an dang a, Mizoram chhungah bungraw phurhluh an phal lo.

Hetia an lungawi lohna lantira Mizoram pum hrek tum anga an beih lai hian, anmahni lam pawh an inhrek tel viau a ni. Bungraw chhe thei tam tak leh chhe mai thei lo thlenga Mizoram lo lut thei lova an dah hian Mizoram tawrh letin Assam sumdawng tam takin an tuar tel a ni.

Ni khata Mizoram mamawh lo lut thin zat chhut chuan, an din rei poh leh anmahni lam pawh Driver leh sumdawngte inkarah an thu a inhmu lo sawt viau dawn niin a lang a. An tangrual nep viau thei dawn niin thudawnna chuan a tarlang.

Mizorama test kalpui uluk a nih atangin Assam lam atanga lirthei rawn lut duh a ni telin an tlem tial tial a. Hei hi Vairengte Screening point a Rapid Antigen Test kalpui a nih hnua lirthei khalhtute rei tak tak COVID Care Center a an awm thin vang niin sawi a ni.

Hnam dang Driver leh handyman Vairengte Screening point pal tlang zo lo hi mi 125 zet an awm tawh a, CCC Thingdawl a an awm chhung hi a rei an tih avangin Mizoram-ah an rawn luh hreh phah tawh hle niin thudawn a ni bawk.

India ram State tam takin IMCR thuchhuah dan chuan, COVID-19 Positive te chu ni 10 chhunga symptom an neih loh chuan test ah la positive mahse Covid-19 vei tawh lo angin ngaih an ni tawh a, hetihlai a ni 30 zet te hriselna a harsatna nei loa khung an ni chu hriatthiam har an ti a, Mizoram-ah Driver leh handyman te hi an rawn luh hreh phah niin thudawn a ni bawk a ni.


- With Input From ZMP Tlau




Post a Comment

0 Comments