COVID-19 hripui darh chak chhan chu

Mizoram ah Covid-19 hri vei  hmuhchhuah zat a ni telin an pung thur thur a, mawhpuh tur kan zawng a, thenkhatin VC/LC inthlanna buatsaih vang a ni an ti a, eptu lamin sorkar beihna atan an hmang chho mek a, Inthlang ramah mipui rilru hneh hi Political Party ten an tih tur a nih avangin hripui lo darh chak deuh chu sorkar beihna atan an hmang a nih pawhin Political Party te chuan an tihawm tak an ti ah ngai ila.Hetihlai hian Aizawl tualchhung chanchinbu pakhat chuan September ni  9-a Aizawla Covid-19 possitive hmuhchhuah zinga mi 70 chu Local Council inthlanna a duty an ni, tih a puang a, Inthlanna atanga hri chu rawn darh ta angin a ngaih theih viau reng a ni.


 Inthlan hma hauh khan Aizawlah chuan hri hi a lo taidarh tawh tih a lanna chu Local Council engemaw zatah an inthlang thei lova, Aizawl Dist. a VC engemaw zat an inthlang thei lova, Ramhlun South LC phei chu Sept.10 ah chauh an inthlang thei a. Inthlan hma hauhin veng tam takah chuan an lo buaipui tawh tih kan hria.
 LC/VC inthlan dawn khan  Party  worker Campaigner in zui dul dul a chaw eikhawm, Vote thlak ni a thu khawm tuau tuau, Vote in dilna a in chibai lawp lawp, House to House Campaign a kal kualte kha kan uar ru viau a nih kha.
 Mithiamten an sawi dan pakhatah chuan December  thlaah chuan Zorama hri kai chu 5000 chuang ni thei turin an chhut lawk tih a ni a. Chuti ni se inthlang lova kum tawp lama inthlan ni ta se, hri a darh fé hnu a inthlan a ni dawn a. Sawi dan dang lehah chuan tuna kan hri leng hian kum 2 pawh a la awh thei tih a ni leh bawk a. LC leh VC hi inthlang lawk lovin nakumah inthlang ta ila hri kai darh fe hnu a ni tawh dawn a,a hlauhawm ting maithei a ni. SEC leh sorkar tan pawh Inthlan hun bituk dan thiam a harsa viau in a rinawm.
 Kan inthlang emaw, thlang lo emaw, hri kai hi chu kan pung chho zel dawn a, tun tumah khan VC 580 zet-ah leh LC 83 ah kan inthlang a, Inthlanna hmun danga hri darh hluai lova, Aizawl khua bikah  hri a darh hluai bik a nih  chuan a zialo hle  dawn a ni.
 Kan rama Hripui a lo thlen tirh atang khan Sorkar leh mithiam te thu kan awih duh lova. Bazar ah kan innek tulh tulh a, Dawr hmunah thil lei kan inchuh thul. Gas laknaah kan bing lut lut a, Vawksa lei turin kan inhawrkhawm tuau tuau a, Khualzin motor ah kan fimkhur lo em em a,  Mask hmangtu tam zawkin kan khabe tuamna atan kan hmang a, Mask vuahtu tam zawkin thu kan sawi dawnah te kan Mask vuah kan phelh leh daih a, Ni za hlawh lakna, Inneih lawmna leh chhiat tawk te Inah kan inhawrkhawm tuau tuau a, kan kut kan silfai tha peih vak lova, tun hma lama kan fimkhur loh rah chu a lo lang tan ta a. A ruka hri paite pawh chu Inthlan duty ah te an lo inzep ru tawh a, chung miten a hma lama symptom awm lova hri an lo pai sate chuan tunah hian hlet a rawn chhuah ta a nih  a rinawm khawp mai.
 Kan rama hripui lo darh chak chhan hi midang   mawhpuh lovin  keimahni vang liau liau a ni i ti ngam zawk ang u hmiang ?

- Lenrual Daily
Editorial
12.9.2020

 

Post a Comment

0 Comments