Aizawl khawpui chhunga veng 83 zinga veng 34 ah COVID-19 positive hmuhchhuak tawh

Aizawl | September 10, 2020: Vawiin chawhnu dar 1:30 khan SAD Conference Hall, MINECO-ah nimin September ni 9, 2020 a COVID-19 positive hmuhchhuah an tam avanga hmalak dan tur ngaihtuahin thutkhawm hmanhmawh (emergency meeting) koh a ni a. Health & Family Welfare Minister Dr. R. Lalthangliana, Home Minister Pu Lalchamliana, I&PR Minister Pu Lalruatkima, Medical Operational Team on COVID-19 Leader Dr. ZR Thiamsanga, MLA bakah Chief Secretary Pu Lalnunmawia Chuaungo leh sawrkar official pawimawhte an tel a. NGO Co-ordination Committee hotute leh Mizoram Kohhran Hruaitu Committee (MKHC) aiawhte pawh he thutkhawmah hian an tel a ni.

Meetingah hian COVID-19 positive thar 141 zinga 138 chu ZMC RT-PCR laboratory-a sample test 178 zing ami a nih thu leh test zawng zawng atanga 77.52% a nih thu tarlan a ni a. Aizawl khawpui chhunga veng 83 zinga veng 34 ah COVID-19 positive hmuhchhuah an nih tawh thu tarlan a ni.

COVID-19 positive te enkawlna tur Covid Care Centre (CCC) dinhmun tarlan niin tun dinhmunah Civil mi COVID-19 positive 1737 enkawl theihna tur CCC neih a ni a, Para-military Forces COVID-19 positive 303 enkawl theihna tur CCC 6 a awm a ni. Aizawl khawpui leh a chheh velah CCC mamawh belh a nih dawn thu tarlan niin tunhnaiah Tuikhuahtlang Presbyterian kohhran in an kohhran hall a tul chuan CCC atan hman an remtih thu leh Tuikhuahtlang YMA in an veng YMA Hall CCC atan hman an remtih thu dawn a ni a, heng hmun hnih ah hian COVID-19 positive 70 enkawl theih beisei a ni a, Tuikhuahtlang Presbyterian kohhran leh Tuikhuahtlang YMA chungah meeting hian lawmthu an sawi nghal a ni.

COVID-19 a darh nasat avangin dinhmun derthawnga awm sa (vulnerable group) te, a bik takin kum upate, natna benvawn neite leh naupangte dinhmun ngaihtuah a pawimawh hle tih tarlan a ni a, chhungtinte tangrualin a theih ang anga an fimkhur a pawimawh takzet thu tarlan a ni.

COVID-19 pung zel tur ven nan leh tun kan dinhmun thlirin COVID-19 frontliner ten an hna tha tak leh chak taka an thawh theih nan hmalak a tula hriat a ni a. Contact tracing, surveillance leh sample testing rang taka tih a nih theih nan ruahmanna mumal tak siam a tula hriat niin sawrkar laipuia Ministry of Home Affairs in Unlock 4.0 guidelines a siam thlir chungin leh a tul anga Ministry of Home Affairs rawn chung zelin thuneitu pawimawhten ruahmanna siamin hma lo la se tih a ni.

Vawiin thutkhawmah hian NGO Coordination Committee leh MKHC hruaitute chuan sawrkarin harsatna a tawh emaw, mamawhna a neih ah chuan theihtawp chhuahpui an tum thu an sawi a ni.

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]

Post a Comment

0 Comments