Aizawl | August 10, 2020: Mizoram Pradesh Congress Committee (MPCC) media cell chuan vawiin khan an chairman Lallianchhunga hovin thuthar thehdarhtute an kawm a, “Village Council leh Local Council inthlanna hi Mizoram a COVID-19 hripui taidarhna hun remchang a nih theih avangin a hun sawn ni rawh se;" an ti a, "hrileng karah mipuiin vote an thlak tha ngam lovang” an ti bawk.
- exploremizoram.com
- exploremizoram.com
MPCC chuan, "mipui hriselna dinhmun te, COVID-19 dona kawnga Mizoram sorkar pachhiat ziate ngaihtuahin August 27, 2020-a Village Council leh Local Council inthlan buatsaih tumna hi ngaihtuah nawn leh nise, COVID-19 hrileng dinhmun ngaihtuah chungin inthlan hun hi sawn rih mai nise," tih chu Congress party duh dan a nih thu an sawi bawk.
MPCC chuan, "Mizoram State Election Commission-in August 27, 2020-a Village Council leh Local Council inthlan buatsaih a tum chungchangah Congress party chuan chak ngei tumin theihtawp a chhuah mek a, inbuatsaihna pawh thui tak kan kalpui tawh a; amaherawhchu, Mizoram mipui, vote thlak tur te himna leh hriselna kan ngaihpawimawh zawk avangin Village Council leh Local Council inthlan hun chungchangah chanchinthar thehdarhtute kaltlangin Mizoram sorkarah rawtna kan thlen duh," an ti a.
MPPC chuan, Political party te’n Village Council leh Local Council inthlan atana inbuatsaihna kan neih mek laiin tunhnaiah Mizoramah COVID-19 hri vei an pung chak hle a, vantlang mipuia inkaidarh (community spread) thleng mai thei dinhmunah kan din mek thu sawiin, Hetiang a nih avang hian Aizawl veng hrang hrangah Total Lockdown puan mek a ni bawk. COVID-19 dona kawnga a hmatawnga awm Medical lama thawktute, venghimtu police-te leh khunghran mek vengtute hialin an kai chho ve ta a, mi thenkhat phei chu khawi atanga an kai nge tih pawh hriat hleih theih loh an ni ta hial a ni. Hetiang a nih avang hian kan hlauh ber community spread hi a thleng tan der tawh em tih pawh ngaihtuah tham tak a ni ta. Hetiang a nih avang hian tuna Mizoram dinhmun hi a hma zawng aia fimkhur a ngaih hunlai ber niah Congress Party chuan an ngai tih an sawi bawk.
MPCC chuan, "Inthlan hi buatsaih tlang a nih chuan mipuite’n COVID-19 hrileng vangin vote an thlak tha ngam dawn lova, inthlan buatsaih a nih chhanin awmzia a nei dawn lo tihna a ni. Tin, party worker-te inhmuhkhawm fo a ngai dawn a, party hrang hrang hruaitute campaign a zin kual a ngaih dawn bakah house to house campaign neih ngei a ngaih dawn bawk si avangin sorkar duhdan anga social distancing vawn hleih theih a ni dawn lo a. Chuvangin, he inthlanna hi Mizoram a COVID-19 hripui taidarhna hun remchang tak a ni thei a ni." an ti.
Congress party chuan, "MNF sorkar hnenah Village Council leh Local Council inthlan buatsaih hun hi mipui himna atan sawn hla leh rih mai turin kan ngen a. Hei bakah hian July 14 a State Election Commission (SEC) a Congress party AMC Councillor te leh MPCC in rawtna leh ngenna a thlen ang khan Mizoram chhunga COVID-19 hrileng darh dan thlir chungin Village Council leh Local Council inthlan hi a rual khera neih tum lo turin sorkar kan ngen nawn leh bawk a ni.' an ti.
- H Zate
Founder/Editor
Explore Mizoram
(A hnuaia fakna hi lo hmet ve rawh.)
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: