online exam chu ka hriatpui lo a, compulsory a ni lo - School education Minister

Aizawl | Aigust 27, 2020: MZP Hruaitute chuan nimin khan School Education Minister Pu Lalchhandama Ralte chu a Pisa-ah kawmin sikul-a online exam kalpui  chungchang sawipuiin an ngaihdan an thlen niin an thuchhuah chuan a tarlang.


MZP chuan zirna in hrang hrang ten naupangte hmakhua ngaia an thluak chawl tur ven nana hma an la chu tha a tiin a thlawp em em a. Chutih rual chuan kan ram internet signal chak tawk loh avangte, chhungkaw pakhata zirlai pakhat aia tam awm ten online class zawm nan smart phone an mamawh theuh a, hei hi chhungkaw tam tak tan phurrit a nih avang leh sawrkarin omit portion a la siam fel loh lai a Aizawl khawpui chhung school thenkhatah online exam kalpui an awm hi MZP chuan hriatthiam har a ti hle a. Heng harsatna hrang hrang ngaihtuah hian tun dinhmunah online exam kan la zo lo niin a lang a, chuvangin MZP hruaitute  chuan online exam kalpui chhunzawm anih loh nana hmala turin Education Minister chu an ngen a.

Education Minister chuan,”Zirlaite tana Online exam kalpui turin thuchhuah a awm lo a, online exam chu ka hriatpui lo a, compulsory a ni lo,” a ti a. Education Minister, Pu Lalchhandama Ralte chuan, MZP in zirlaite harsatna hriaa hma an la thin chu lawmawm a ti hle a. MZP rawtna leh thuthlente chu a tul anga lo enzui a, hma a lak tur thu MZP hruaitute a lo hrilh nghal bawk niin MZP thuchhuah chuan a tarlang bawk.

MZP chuan State Council of Educational Research and Training (SCERT) ruahmanna a Covid19 vanga lockdown chhunga zirlai te thluak chawl lutuk tur venna atan inlama zirna an lo kalpui theih turin, ni tin TV kaltlanga subject hrang hrang mithiam ten zirtirna an pe thin chu lawmawm a ti a, Zirlai zawng zawngin lo hmang tangkai a lo thlir ziah turin a chah a ni.

MZP chuan kumtina a tih thin angin September ni 2 hian Hnam dang nupui pasal neilo tura inzirtirna ni anih angin hemi pual hian zirlaite tan slogan writing competition a buatsaih dawn a. September ni 5 hi Zirtirtute Ni (Teachers Day) anih angin hemi pual hian Zirtitu tha chawimawina dawng (State awardee leh National awardee) te tan programme a buatsaih dawn a ni.

Post a Comment

1 Comments

  1. online a homework an inpek leh monthly fee chungchang thuchhuah thar ber hi enge nita le aw .... hriat theih dan a awm em ?

    ReplyDelete

He post chungchanga i ngaihdan lo sawi ve rawh: