NAGALAND KOHHRAN IN CHINA HMEICHHIA ISUA NI-A INCHHAL LAKAH FIMKHUR ȚUL AN TI

Aug 22, 2020: The Nagaland Baptist Church Council (NBCC) chuan thu chhuah siamin Baptist Kohhran leh member zawng zawngte chu China ram ațanga zirtirna dik lo Eastern Lightning cult of China laka inthiar fihlim tur leh fimkhur turin thu an chhuah. He zirtirna  ang chuan Isua kha khawvelah lokalin, mihringah a rawn chang a, chu mihringa a rawn channa Chinese hmeichhe pakhat a hming chu *Yang Xiangbin* a ni a,  Lightning Deng an ti bawk.

 

He zirtirna dang lam tak (cult) hi China ramah kum 1991 khan din a ni tawh a, mahse China ramah hian khap a ni.

Nagaland Baptist Church Council (NBCC) chuan he zirtirna hian India hmar chhak Kristiante zingah hian bu khuar tawh ngeiin an ring a, chung zingah chuan Nagaland pawh tel ngeiin an ring bawk a ni. Thuthlung Thar bu aiah anmahni  bible ve  “The Word Appears in the Flesh" tih chu an hmang thung a ni.

NBCC General Secretary Rev Dr Zelhou Keyho, in fimkhurna leh invenna thu a chhuah chuan hetiang hian a ziak a ni  “He lehkhaah hian urhsun taka ka sawi duh chu zirtirna dik lo leh kal sual pawl China ram ațangin *Church of Almighty God* tih chu kan ramah a lolut tih hriat a ni."  He lehkhaa a sawi zel dan chu he pawl “The Church of Almighty God or Eastern Lightning cult te hi inrelbawlna țha tak nei an ni  a, mi hip thiam  leh tum tak an nih bakah thu chhuah chi hrang hrang te bakah social media Facebook pages ah te mi hip thei ang ber turin an inpho chhuak thiam hle a, chungah chuan Bible thu țha tak tak mawi leh mit la thei ang ber turin an tar chhuak țhin a ni, " tih a ziak.

Hengho hian zirtirna him lo leh dik lo (false Gospel) an theh darh a, NBCC chuan an mi te chu heng mi te leh an zirtirna laka fimkhur  tur leh “Kohhran zawng zawng te chu hetiang laka an mite humhim tur leh hetiang sakhaw dik lo laka inthiar fihlim turin " a hriattir a ni.

NBCC Youth Secretary Vikuo Rhi sawi dan chuan,  “Nagaland leh NE state an rawn lut tawh tih kan hria a, mahse eng zat nge, tu te nge an nih chu kan la hre thei lo, mi dang a bik takin kum naupang lam lak tumin Facebook leh WhatsApp lamah an che nasa hle a ni, " a ti.

Rhi sawi zel dan chuan, "he kal sual zirtirna hi China ațanga rawn chhuak a ni a, kan hriat dan chuan social media ah zuitu (follower) hi Nagaland ațangin tam tak an awm tih kan hria a, NE State dang ațang pawhin an awm bawk. Naga țhenkhat lo follow țhin te chuan eng nge an nih hriaiin an bansan leh tawh a ni," a ti.

" NBCC hian he thil hi May thla khan a hre tawh a, Kohhran leh media lamah fimkhurna thu chhuah pawh țha a ti a. Tunah hian FB page "Eastern Lightning, The Church of Almighty God" ah zuitu 3,348 an awm," tih thu a sawi.

Nagaland a Kohhran hruaitute chuan an state chhungah 400-500 vel heng kal sual (cult) zuitu hi an awm an ring. Nitin Pathian biakna  pawh WhatsApp hmangin an inhrilh tawn țhin niin an hria.

SAWI BELHNA
I chhiar tirh chuan i nuih a za rilru mai thei, kan țhenawm mai Nagaland Kohhranin an lak thu tak viau dan ațang hian mi hip theihna tak engemaw chu an nei tih a chiang hle mai.

Khawchhak lam mi, Kristian țha awm tak --Bible thu leh țawngțaina thu țha tak tak social media hmanga pho chhuak țhin friend request lo pawm mai suh ang che.

Source :
Times of India
August 22, 2020
@ 16:14 IST

===22==08==20==
Huna Kawlvawm

Post a Comment

0 Comments