Mizoram Warrant of precedence vangin ADC pathumten a hrangin I Day lawm; CM Zoramthanga leh Lai hnam dinpui ngam lova tlanchhiah LADC a MNF(ULP) MDC te'n ngaihdam dil rawh se - Lai DCC

Aizawl | August 17, 2020: Lai District Congress Committee, Hqrs: Lawngtlai chuan thuchhuah siamin, Mizoram Warrant of Precedence 2020 tihchhuah taka  Autonomous District Council (ADC) hruaitute telh an nih loh chungchangah ngaihdam dil turin an phut.

 

MDCC chuan, Mizoram Order of Precedence hi Mizoram Sorkar-in a rang lamin siamțha a, Democracy ram kan nih anga ADC hruaitute hi Joint Meeting te an ngenna anga dah ngei turin an phut bawk.

Lai DCC thuchhuah chuan, "August 11, 2020 khan Chief Minister Pu Zoramthanga kaihhruai MNF Party sorkar GAD Department chuan Warrant of Precedence/Order of Precedence a ti chhuak a. Mizo District Council ruala Council nei ve Autonomous District Council (ADC) hruaitute telh an ni ve loin, hnuaichhiah takin 'sorkar program ah sawm an nih ve chuan..' ti chauhin Note 7 ah an dah a, hetah hian MDC te phei chu sawm tur pawn tih lan an ni ve lo hi Lai DCC chuan a ngai thu takin Hnam leh Ram Rorelna dah hniam an tumna niin a ngai a, hetiang taka mipui ten kan aiawha kan thlan kan hruaitute engamaha ngai lotu Pu Zoramthanga CM hian Autonomous District Council mipuite hnenah hian ngaihdam a dil kan phut takzet a ni." an ti.

Hemi chungchangah hian ADC pathum; Lai Autonomous District Council (LADC), Mara Autonomous District Council (MADC), leh Chakma Autonomous District Council (CADC)-te, NGO hrang hrang leh All Political Party hruaitute LADC CEM Conference Hall-ah Joint Meeting an nei a, Joint Meeting chuan Order of Precedence hi August 15, 2020 (Independence Day) hma ngeiin siamțha turin Mizoram Chief Minister hnenah thlen an rawt a, an ngenna anga siamțhat a nih loh chuan Independence Day hi ADC ten a hrana hman nise tiin an rel a,  Mizoram Sorkar atangin Order of Precedence siamțhatna thu hi an hmuh tak loh avangin LADC, MADC leh CADC te'n Independence Day lawmna chu a hranin an hmang ta theuh niin Lai DCC chuan an tarlang.



ADC ten a hrana Independence Day an lawmnaah hian MADC leh CADC ah te chuan Party hrang hrang MDC te chu an tel tha hle a, rorel lai MNF Party MDC te pawhin State program kalsanin Council program siamnaah an tel ta vek a; mahse, LADC hnuaia MNF (ULP) MDC te chu LADC in Independence Day lawmna a buatsaihah hian an tel ve ta lo a ni.

Lai DCC chuan, "Hetianga kan ram leh hnam issue lian tak a awm laia mahni hnam zahawmna tur leh an rorel ngei pawh dinpui ngam lova, phatsantu ang maia an awm hi a dem takzet a, LADC hruaitu atan thlan zel tlakah pawh an ngai lo a, Ram leh hnam zahawmna tlanchhiatsan a, dinpui ngamlo tu MNF (ULP) MDC te hian, Lairam mipuite hnenah thupha chawiin ngaihdam dil ngei turin Lai DCC chuan a phut tlat a ni." an ti.

Post a Comment

0 Comments