COVID-19 POSITIVE NAUPANG CHUNGCHANGA DISTRICT CHILD PROTECTION UNIT, AIZAWL DISTRICT-IN MIPUITE HNENA A NGENNA

Kan hriat ṭheuh angin tun hnaiah kum tling lo naupangten Covid-19 hri an kai a, an chanchin hria apiangin kan lainat a ni ber mai. Heng naupang lainatawm takte thlalak leh ZMC ward chhunga an chetla lai video hi a darh nasa hle a. Anmahni lainatna avang leh he hripui laka mi dangten fimkhur nachang kan hriat nana social media-ah hian pho chhuah niin a lang.

Amaherawhchu, hetianga kum tling lo naupang chhan chhuah, venhim leh enkawl ngai emaw, dân bawhchhetu kum tling lo naupang emaw nihna (identity) hriat theihna tura social media-a an thlalak emaw, an lanna video emaw pho lan hi naupangte humhalhna dân The Juvenile Justice (Care and Protection of Children) Act, 2015, Sec 74(1) chuan a phal hauh lo mai a, a pho chhuaktu chu thla 6 (ruk) thleng lung ina tantir emaw, chêng nuaih hnih chawitir emaw, a pahnih inkawp emawa hrem theih a ni a. Dân hriat loh hi court hmaah chhuanlam a tling lo tih hi kan hre tel bawk dawn nia. Hetianga naupang nihna (identity) tarlan hi ṭulna a awm a, naupang tana ṭha ber tur a nih erawh chuan anmahni enkawltu Board/Committee-in a phalsak thei ang tih a ni chauh.

Tin, The Mizoram (Containment & Prevention of Covid-19) Ordinance, 2020, Chapter-II, Sec 4(10)(a) chuan Covid-19 positive-te chauh ni lovin hri kaia rinhlelhte thlengin an nihna (identity) hi phalna pe theitu hnen aṭanga miin phalna a nei a nih loh chuan, eng ti kawng maha electronic leh social media-a pho lan hi a phalsak lo bawk a. Dân bawhchhetu chu thla 3 (thum) thleng lung ina tantir leh ₹ 5,000/- chawitir emaw, a inkawp emawa hrem theih a ni, a ti bawk.

Hetiang hi thil awm dan a nih avangin kum tling lo naupang (nausen pianghlim aṭanga kum 18 la pumhlum lo)-ten vanduaithlak taka Covid-19 hri hi an lo kai palh leh a nih pawhin naupang humhalhna dân leh hrileng chungchanga sorkar dân ding laite hi ngai pawimawh tur leh naupangte humhalhna kawnga theihtawp min chhuahpui zel turin mi zawng zawng kan sawm a che u.

Issued by:

DISTRICT CHILD PROTECTION UNIT (DCPU), AIZAWL DISTRICT