Aizawl | August 8, 2020: Mizoram Larsap PS Sreedharan Pillai - in COVID-19 vanga inkharkhip chhunga lehkhabu a ziah-te chu Chief Minister Zoramthanga'n khuallian niin vawiin khan a tlangzarh.
CM Zoramthanga chuan, Larsap PS Sreedharan Pillai a lehkhabu tlangzarhna huna a tel thei chu lawmawm tiin, Mizoram larsap chu dan hremi a nihna leh mipui rawngbawl hna a thawhna bakah ziakmi ropui tak, lehkhabu za chuang sulhnu lo nei tawh a ni chu ngaihsanawm a tih thu a sawi a. Mi pangngai tan thu ziak leh hla phuah a harsatzia a hriat thu sawiin, Governor erawh chuan hun reilo te chhungin kutchhuak heti zat a nei tawh tih han hriat hian mi bik a nih zia a lantir thu a sawi a ni.
CM hian lehkhabu a buatsaih ve mek thu sawiin, Governor chu tlangzarh sak tura a beisei ve nghal thu a sawi bawk a ni.
He hunah hian Mizoram CM hlui Lal Thanhawla pawhin thu sawiin, lockdown hun tangkai taka hmang a lehkhabu tam tak governor in a ziak hman chu ropui a tih thu a sawi.
He inkhawmah hian Larsap PS Sreedharan Pillai kutchhuak thu leh hla lehkhabu 13 chu Chief Minister hian a chhawpchhuah sak. Heng lehkhabu te hi hmun hrang hrangah a tahtawl a tlangzarh tur a ni a. Vawiin hian lehkhabu pakhat "Corona Kavithakal", COVID-19 chungchanga hla thu a phuah, Malayalam tawnga ziak chu Chief Minister hian a tlangzarh sak nghal.
Gauhati High Court Chief Justice, Justice Ajai Lamba chuan 'Republic Day 2020' leh 'Thus Speaks the Governor' tih chu Guwahati atangin video katlangin a rawn tlangzarh sak bawk a ni.
Lehkhabu tlangzarh inkhawm Raj Bhavan Durbar Hall-abuatsaih-ah hian Justice Michael Zothankhuma, Judge, Gauhati High Court, Justice Nelson Sailo, Judge, High Court leh Chief Secretary Lalnunmawia Chuaungo bakah sawm bik mi tlemte ten an hmang a ni.
Lehkhabu tlangzarh zawh hian Larsap chuan thutharthehdarhtute a kawm a, zawhna chhangin, Mizoram chu nuam a tih thu leh Mizo hnam chu dan zawm leh zah hnam nia a hriat thu a sawi.
Governor hi social worker, dan hremi leh politician a nih bakah ziakmi a ni a, thu leh hla lamah a tui hle a, Malayalam tawngin lehkhabu za chuang a lo tichhuak tawh a ni.
(A hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: