COVID 19: Positive 27 hmuchhuak; Kolasib district atangin 22 hmuchhuak

Aizawl | August 8, 2020: Nimin khan Mizoram chhunga hmun hrang hranga test kalpui atangin hri vei 27 hmuhchhuah a ni.

Nimin-a Mizorama COVID-19 positive hmuhchhuah zawng zawng hi 27 niin an zinga 22 hi Kolasib district-a hmuh an ni.

 

Nimin khan Kolasib district-a Truck driver leh handyman te Rapid Antigen Test hmangin an swab sample endik-ah Rapid Antigen Test atanga COVID-19 hmuhchhuah zinga 21 hmuhchhuah niin, National Highway-306 siam vanga Sethawn leh Thingdawl inkara bungraw phur Truck tangkhang khalhtu driver leh handyman te an ni a, anmahni atanga kai chhawng ni a ngaih Sethawn mipa naupang kum 12 a upa a tel bawk a, an vaiin 22 hmuhchhuah an ni ta a ni.

Truck driver leh handyman COVID-19 positive hmuhchhuahte hi mipa vek niin, kum 17-44 inkara upa an ni a. Assam atanga lo lut 20 leh Meghalaya mi pakhat a ni. Kolasib district-a COVID-19 positive vei hmuhchhuah tharte hi Polytechnic CCC, Thingdawl- ah dahluh vek an ni.

Nimin khan ZMC Laboratory-a RT-PCR khawl hmanga swab sample test 146 zingah COVID-19 positive 5 hmuhchhuah a ni a.

Hetih lai hian Lunglei Civil Hospital Truenat PCR Laboratory-a sample test 24 a negative vek thung a ni.

ZMC Laboratory-a COVID-19 hmuhchhuah tharte hi mipa 4 leh hmeichhia 1 an ni a, kum 27 - 41 inkara upa, Aizawl district-a mi 3 leh Champhai district-a mi 2 niin Assam Rifles 3 (Mizo - 2, hnamdang - 1) leh BSF sipai 2 an ni a. Assam Rifles te hi Assam atanga lo kir Quarantine facility a awm lai mek an ni a, COVID-19 symptoms an neilo. BSF 2 (Mipa leh hmeichhia, hnam dang ve ve) hi COVID-19 symptoms an neih ve ve avanga ZMC-a admit lai an ni a. West Bengal atanga lo kir leh positive contact atanga kai an ni.

Nimin Lunglei Civil Hospital Truenat Laboratory-a test Negative te hi 61 Bn BSF Zotlang a mi 17 leh Tualchhung mi zin haw mi 7 te an ni.

Nimin tlai khan Kolasib DCHC atang COVID-19 vei enkawl dam hmeichhia pakhat chu chhuahtir a ni bawk

ZMC Laboratory-a sample test zingah hian COVID-19 vei engemawzat test nawn an tel a, an zinga 15 chu an la positive chhunzawm a ni.

 

Hri vei tawh zawng zawng hi mi 566 niin, enkawl mek 277 an ni a, dam tawh 289 an ni. Heng zingah hian Mipa 453 niin, hmeichhia 113 an ni.