Mizoram E-Roll a Tuikuk la awm leh MBSE HSSLC result tihsual tam chungchangah MZP in hma lak tum; HSSLC result-ah topper ni thei hial khawp hmuhchhuah an ni leh chu thawktute inthlahdah vang liau liau ah MZP-in ngai

Aizawl | August 8, 2020: Nimina MZP General Headquarters president B Vanlaltana hova MZP hruaitute ṭhukhawm chuan, Mizoram Electoral roll aṭanga Tuikukte paih an la nih loh chungchanga hmalak an tum dan leh, MBSE hnuaia pawl 12 exam result chhuak dik tawk lo hmuhchhuah belh chungchang te an sawi hova hmalak ngei an tum.

MZP chuan, Mizoram chhunga Village Council leh Local Council inthlan lo awm turah Mizorama lo let duh tawh lo Tuikuk, Tripura-a inbenbel duh tawh zawkte Vote thlak phalsak an nih thu leh election-a chuh ve theihna thlenga danin a phal thu State Election Commission(SEC) aṭanga thuchhuah (Ni 4.8.2020) awm chu mak a ti a, Mizo mipuite leh pawl hrang hrang aṭanga sawiselna a awm hnuah Ni 5.8.2020 (Nilaini) khan SEC chuan order thar tichhuak leh nghalin order hmasa a thlak(supersede) thu a tarlan hi Mizo mipuite bumna niin a ngai bawk.

He order tharah hian anmahni duhthu ngeia Tripura-a awm thlang zawk Tuikukte Mizoram Village Council inthlana vote an thlak theih lohna tur leh, an in candidate theih lohna tur tarlan a nih loh avangin Tuikukte vulh tumna leh Mizo mipuite bum tumna ni theiin MZP chuan a ngai nghet tlat a ni.

SEC leh Mizoram sawrkarin Tuikuk anmahni duhthu ngeia Tripura-a awmte Mizoram VC Electoral roll-aṭanga paih theihna hun remchang a awm laia a paih lo hi MZP chuan a dem takzet a. Central Sorkar, Mizoram sawrkar leh Tripura sawrkar ten Tripura-a awm tura inremna an siam vek tawh hnua Tuikuk ten Mizoram VC Election 2020-a vote an la rawn nei thei leh, Election-a an la chuh thei hi MZP chuan a ngai thiam lo takzet a, a rang thei ang bera roll aṭanga paih turin thuneitute an ngen a ni. 

"Tripura-a Tuikuk te hi Refugee an ni lo a, anmahni duhthu ngeia pem an ni." tiin, Refugee anga SEC in a tarlang hi thil dik lo a nih avangin rang taka siam ṭha turin MZP chuan SEC chu an phut bawk a ni.

MZP chuan, MBSE hnuaia kum 2020 Higher Secondary School Leaving Certificate (HSSLC) result chhuakah thil dik lo leh fel lo tam tak hmuhchhuah mek zel a ni a. Hei hian exam buaipuitute inthlahdahzia a tilang a. Result tih dik loh vanga zirlai tam tak rilru na chu pawi an tih thu an sawi.

Tun thlenga result siam ṭhat ngai la awm leh HSSLC topper ni thei hial khawp hmuhchhuah an ni leh ta hi thawktute inthlahdah vang liau liau ah MZP chuan a ngai.

Thil tidik lotute hi zawng chhuak a, a rang thei ang bera hremna pe turin MZP chuan Mizoram sawrkar a phut a.  Zirlaite rilru natna siamtu leh thil tidik lotute hi Mizoram sawrkarin hremna a pek vat loh chuan a ṭul angin MZP chuan hma lak an tum a ni.