MISSION VENG LOCAL TASK FORCE THUCHHUAH

Dt. 15. 8. 2020 (Inrinni) 10:45AM

August ni 8, 2020 zinga Mission Venga Xerox dawra kal doctor chu, office a thlen hnuah Rapid Antigen Test tiin Covid19 a kai tih hriat a ni a.

Doctor kalna dawr nia report, Focus Photo Express, Mission Veng Bazar neitu chu biak vat niin Quarantine tura hrilh nghal a ni a. Amaherawhchu, Focus Dawr neitu hian, hemi ni chawhma chhung chu thil Print tura dawrtu (customer) tumah a neih loh thu leh Sana siama a buai hle thu a sawi avangin tihsual palh a awm thei e, tiin fimkhur thilah helai vela Xerox dawr dang pahnihte chu chhui tel nghal a ni a. Doctor-in Xerox dawr a tlawh hun nia a sawi zing dar 8 vela thil print tura dawrtu nei zawk, Kima Xerox Centre dawr chu a kalna nia ngaiin (a kalna ni lo zawk si chu) chhui zui a ni ta a ni.

He thil thleng avang hian Kima Xerox dawr neitute leh a dawr tlawhtu vengchhung leh veng pawn mite chu rilru hrehawm tak leh eizawnna chhunzawm thei lovin, ni 6 chhung teh meuh an awm phah a. Mission Veng LTF chuan Kima Dawr neitu leh a tlawhtu, rilru hrehawm taka awmte leh eizawnna chhunzawm thei lote kan tawrhpuiin kan lainat tak meuh a ni. Kima xerox dawr hi a him a, dawr zui zel ngam an ni tih kan puang e.

He thil thlen aṭanga Ni 6 hnuah dawr dik tak zawk hriat chhuah a ni ta chauh a. Hemi chhung hian mipui tam tak chu engmah hre lovin, dinhmun hlauhawm takah an lo awm hman ta a. Heng thil thleng avanga chi-ai taka awm, mipuite hnenah hriatthiamna kan dil bawk e.

Hripui donaa ṭhahnemngai taka thawktu Doctor-in a hnathawhna avanga natna a kai ta hi pawi kan tiin kan tuarpui a. Ani hi Swab Sample result nghah laia kal kual a ni lo va, a in-test hnu hian inla hrang nghalin ZMC-ah a in-admit zui nghal a, tumah a hnaih tawh lo a ni. A dam chhuah vat theih nan Pathian hnenah kan dilpui a, mipui tan ṭhahnemngai taka rawng a bawl zui theih nan duhsakna kan hlan bawk e.

*He thil thleng avanga inchhui zui ngai hmasa Focus Photo Express Dawr neitu leh a chhungte chhuinaah, mi pahnih (Mission Veng mi nilo)an positive tih vawiin 15.8.20 hian hriatchhuah a ni a. Chhui chian ngai a awm zel avangin thuleh awm hma chuan Mission Veng Total Lockdown puan zui a ni.*

Mipui chi-ai lo ila. Inhre miah lova hmun hlauhawma awm leh thei vek kan ni tih hriain, ṭul hle lovah chuan chhuak vak lo ila, hmai tuam ṭha ila, inhnaih chilh lo ila, kut sil ṭha ila, mi tinte fimkhur reng turin kan inchah bawk a ni.

Sd/-Lalsiamliana,

Chairman.

Sd/- Benjamin Lalmalsawma,

Secretary.