MHA ORDER, VC/LC INTHLAN LEH NGAIHTUAHNA VAK VEL!



Nimin khan India ram Home Secretary Ajay Bhalla, IAS in thuchhuah thar a nei a. Ministry of Home Affairs (MHA) order - Dt. 29th July, 2020 a Unlock 3.0 Guideline an chhuah tihdanglamna thu a ni.

Tunah chuan state leh state emaw, state chhungah emaw pawh bungrua leh mihring pawh dan khap a ni ta hmiah mai a. Ṭhenawm ram te pawh a huam avangin Myanmar lam pawh danchah theih a nih tawh loh hmel.. Insumdawn tawn turin remna kha an ziak vein ka hria.. Ka hriat sual loh chuan.

He thuchhuah kalha che State leh District te chu Disaster Management Act 2005 behchhana hrem theih an ni dawn ta a ni.

Heti a nih chuan virus nena chenho kan zir a ngai dawn ta tak tak niin a lang a. Nizan lama Jonathan Lalsiamthara Ralte post ah khan a inkaichhawn theih dan kha a chipchiar ṭha khawp mai a, chhiar vel ila a duhawm hle mai kan fimkhur tlanna atan..

"He virus lakah hian fimkhur tur a ni a, mahse nunphung tibuai uchuak khawpa thlabar phah loh tur.." an rawn tihna angah ngaiin thluak fim tak kan neih a ngai ta niin a lang.

 

He thupek thar vang hian za ruaiin phi cheng kher lo ila, a ṭul lovah chuan inah i tawm ngam ila, mipui punkhawm tam theihna hun leh hmun chu i pumpelh hram hram ila, chu chu kan himna tur a la ni fan..

Keini ṭhalai te chuan kan pal dam mai mai thei a ni thei a, kan kai a ni tih inhriat hma hmain kan lo dampui leh hman pawh a ni thei. Mahse, kan kiangah kan hmangaih te - naupang, kum lama upa zawk te leh natna benvawn eng eng emaw nei chhungtin hian kan kawl deuh vek tih zawk hi i hmaih lo ang u..

VC/LC inthlan te hi an ruahman ang tak hian kalpui thei ang maw? Politics thlipui tleh dan a fuh loh chuan a huhova awm lo tura inven reng chu a har khawp ang..

Tin, community spread hi a awm leh awm loh, a nasat leh nasat loh pawh mipui nawlpui test kim a nih hma chu a hriat tak tak theih chuan loh avangin campaigner, intin luhchhuahtu te ngei ngei pawh hi hri semdarhtuah an ṭang palh thei tih thlenga ngaihtuah chuan Social Media hmanga campaign hi duhtawk ngam mai se a duhawm hle mai.. Candidate tinin video clip tawi te siamin, an sawi duh zawng kha record se, youtube ah te dahin a link kha share ta chuai chuai mai se la. Chutiang tih nachang hria te chu keini chhung chuan rawn lenglut kher te ai mahin kan vote châk zawk ngeiin ka ring.

Eng pawh ni se, nilen nuam vek u.


Date: 23rd August, 2020
Time: 7:55AM

Post a Comment

0 Comments