Hripui do nan thawktu sang khat chuang mamawh belh; PCR machine in a awmna tur district 10 thleng tawh - Report

Aizawl | August 20, 2020: Health minister Dr R Lalthangliana hova thukhawm chuan, Mizoram-ah hripui do nan thawktu mi sangkhat chuang mamawh belh a nih thu tarlangin, hri vei enna khawl pawhin a awmna tur district 10 a thlen tawh thu an tarlang.




Vawiin khan Health & Family Welfare minister Dr. R. Lalthangliana kaihhruaiin SAD Conference Hall, MINECO-ah coordination meeting on COVID-19 neih a ni a. Health & Family Welfare Board Vice-Chairman, Dr. ZR Thiamsanga, MLA, Chief Secretary Pu Lalnunmawia Chuaungo, Health & Family Welfare department hnuaia COVID-19 dona kawnga hma la tu peng hrang hrangte bakah Indian Medical Association, Mizoram Government Doctors' Association, Non-Government Hospital Association Mizoram aiawhte an tel a ni.

Vawiin thukhawm hian COVID-19 dona kawnga hmalak chhunzawm zel dan tur an ngaihtuahho a. COVID-19 frontline medical workers, a bikin sample lakhawmtute leh COVID-19 vei enkawlna hmun Covid Care Centre (CCC) leh Dedicated COVID Health Centre (DCHC) a thawkte an in lamah haw lova hmun khata an riah khawmna tur district tinah ruahman tha an ti a, Aizawl-ah chuan Chaltlang Tourist Lodge additional building ruahman fel a nih thu tarlan a ni. Vairengte ah Covid Care Centre leh COVID-19 frontline medical workers-te awmna tur ruahman tul ni a hriat niin hmalak thuai tum a ni bawk.

Vawiin meeting-ah hian District 10 a dah tur Truelab Quattro Real Time Quantitative Micro PCR Machine in an awmna tur district a thlen vek tawh thu tarlan a ni a, a dahna tur hhmun leh thil dang danga civil works pawh tun kar hian zawhfel a nih dawn thu sawi niin, tun thla ral hma ngeia hman tan theih tura bun fel vek beisei a nih thu tarlan a ni. A enkawltu tur daktawr leh technician-te pawh training pek fel vek an ni tawh a ni.

Health Minister Dr. R. Lalthangliana chuan sawrkar laipuia Ministry of Health & Family Welfare-in an chhut danin Mizoramah hian December thla tir lamah COVID-19 hmuhchhuah zatin 5000 chuang a kai dawn a, hetiang dinhmuna kan awm avang hian lo inruahman lawk a tul hle a ni, a ti a. Contingency Plan te siam a tul a nasa takin ngaihtuahna sen mek a ni, a ti.

ZMC chu Dedicated Covid Hospital-a puan a nih avangin COVID-19 vei nilo enkawl nan a hman theih rih lova, anni enkawlna tur ruahman chungchang pawh sawrkar damdawiin leh private damdawiin hotute nen sawiho a ni. State pawn atanga damlo rawn haw damdawiina inenkawl chhunzawm nghal ngai an awm thin avangin Lengpui an rawn thlen veleh a Rapid Antigen Test an tih sak result chhuah hma a an lo awm lailawkna tur pawh ngaihtuah niin ruahmanna siam thuai tum a ni.

Hmalam hun thlirin Covid Care Centre (CCC) mamawh belhna a nasa dawna hriat a ni a, District tina thuneituten CCC neih belh dan tur an ngaihtuah a tul thu sawi niin Sports & Youth Services department-in Ramhlun Sports Complex-a an building pali, mi 100 vel awm theihna tur CCC atana hman an phal avangin lawmawm an tih thu an tarlang a ni.

COVID-19 dona kawnga thawktu (manpower) indaihlohna a nasat thu sawi a ni a, hetih laiin hmalam hun atana inbuatsaih a tul bawk si avangin manpower indaihlohna nasa hi engtia phuhruk tur nge tih an rel a. COVID-19 reh fel hma, abikin kumin december thla tawp thlenga temporary basis a rawih tur COVID-19 frontline workers mamawh belh zat chhut chhuah chu mi 1151 an ni -

1. Covid Care Centre (CCC) ah - Doctor (AYUSH) 45, Nurse 135, Health Worker 135, Helper 190
2. Dedicated COVID Health Centre (DCHC) ah - Doctor (AYUSH) 20, Nurse 60, Driver 10, Helper 60
3. TrueNAT laboratory ah - Doctor 10, Technician 20, Helper 10, Data Entry Operator 10, Driver 10
4. Sample Collection Team - Technician 36, Health Assistant 36, Driver 36
5. Contact Tracing Team - Leader 13, Assistant 26, Data Operator 13
6. volunteer a tlem berah Diploma/Graduate chunglam 32 leh Non-Graduate 20 mamawh belh ni a hriat a ni.
7. Sub-Centres/Health Clinics ah Health Worker 40 mamawh belh ni a hriat a ni

Heng bakah hian hmun hrang hranga duty tur mamawh COVID-19 frontline workers 184 an la awm bawk ni a chhut a ni.

Health Minister chuan contact tracing tih laia sample laksakte chu an result a chhuah hma chuan anmahni leh an chhungte home quarantine-in an awm tur a ni, a ti a. Hemi chungchangah sawrkarin thupek a tichhuak tawh a, mipuite pawhin lo chik zui se tha a tih thu a sawi a ni.



Post a Comment

1 Comments

He post chungchanga i ngaihdan lo sawi ve rawh: