Hnahthial SP Office Kum Khat tlinna lawm; Mihring nunah hian hmasawnna tura kawng hrang hranga bul tan tu nih hi a pawimawhin a hlu hle a ni - Hnahthial Bawrhsap

Aizawl | August 12, 2020: Hnahthial District a Superintendent of Police, Office kum khat tlin lawmna chu vawiin khan an Office Training Hall-ah neih niin Hnahthial District Bawrhsap Pu Vanlalmawia chuan a hmanpui a, “Mihring nunah hian hmasawnna tura kawng hrang hranga bul tan tu nih hi a pawimawhin a hlu hle a ni” a ti




Pu Vanlalbiaka Joute, Dy.SP Hqrs kaihhruai SP Office Hnahthial kum khat tlin lawmnaah hian hun hmanpuitu Hnahthial District Bawrhsap Pu Vanlalmawia chuan Hnahthial SP Office-in kum khat a tling ta chu a lawmpui thu sawiin “District adminstration lam leh Police-te hi  kalkawp tlat tur kan nih angin kum khat liamta a kan hun hman ka thlir kir hian lawmawm ka ti a, VC leh NGO te nen pawh thawhhona tha tak neiin Covid-19 do kawngah leh thil hrang hrangah mualphona kan tawk lovin ka hria a, he thawhhona tha tak kan neih hi kan chhawmnun zel ka duh a ni. Police leh sawrkar hnathawk dangte pawh hian mahni mihring puite tana thawk kan ni tih hi kan hriat reng a ngai a, mi chunga hremna kan lek dawn a nih pawhin an mahni kan huat vang ni lova dan an bawhchhiat vang zawka hrem tur kan ni tih hi hrem turte chuan an hriat ngei a pawimawh a ni” tiin mipuite himna tura thawktu an ni tih hre renga theihtawp chhuah chhunzawm zel turin Hnahthial District Police-te chu a chah a ni

District thar pathum-te chu changtlung chaka a hriat thu pawh sawiin Hnahthial District Bawrhsap chuan “Election leh thil dangah pawh District puitling sate ang thovin sorkar hian min kalpui zelin a   ngai pawimawh hle a, keimahni lam zawk hi kan inring hman lo tep  zawk a ni” tiin District thar pathum te chu vannei a tih thu a sawi a ni. 

Hnahthial SP Pu Lalbiakkila chuan an Office kum khat tlin lawmna chu vantlang huapa buatsaih an duh viau laiin Covid 19 hrileng avangin mi 50 aia tam punkhawm phal a nih loh avangin Hnahthial a Police awmte  leh sawm bikte nen chauh hman a nih tak thu leh Hnahthial SP hmasaber Pu Divesh Kumar Mahla IPS  chu an hriatreng thu sawiin “Engmah neih nei lovin bul kan tan a, tunah chuan kan awm angin hma kan sawn ve tawh viau a, nikumin June atang khan Lunglei SP atangin engkimah kan indang a tih theih a ni” tiin Hnahthial District chhung Police State  pahnih – Hnahthial leh Thingsai PS bakah S.Vanlaiphai Outpost-ah te CCTV vuah vek a nih tawh thu leh  leh Mobile phone pawh pek vek an nih thu a sawi bakah Thingsai  Police State  building sak mek chu hna thawh tur 95 % zawh a nih tawh thu a sawi bawk a ni.

Hnahthial SP hnuaiah hian thawktu mi 117 awm tur an nih lain tun dinhmunah mi 49 chiah an awm mek thu SP Pu Lalbiakkila chuan sawiin post ruak 68 a awm a ni. Hetihlai hian Hnahthial SP hnuai atanga hlawh la, hmun danga awm mi 5 an awm mek a, hmun danga hlawh la, Hnahthial SP hnuaia dah mi 2 awm mek bawkin 2nd Bn.MAP atangin mi 28 te chu  Hnahthial SP hnuaiah hian an awm mek bawk a ni. Hnahthial District chhung Police Station leh Outpost-ah te hian August 2019 atanga August 2020 chhungin Case 21 ziahluh a ni bawk.

Hnahthial SP Office hian an kum khat tlin lawmna atan hian District Hospital Hnahthial –ah Poor fund atan Rs.5000 leh Ruihhlo ngaite enkawlna Jehova Jire Home, Hnahthial tan Rs.5000 bakah Covid 19 laka mipuite an him theih nan hmaituamna (Mask) 500 chu a thlawnin an sem  chhuak a, NH 54 kawngpui sira Hnahthial Police Tuikhur chu an chei tha bawk a ni.

Hnahthial SP Office lawmna puala inkhawmah hian Rev.H.Laldintluanga chuan Pathian hnena lawmthu sawina hun hmangin Hnahthial Town Village Council Association President Pu C.Lalbuatsaiha leh Pu Micky R.Lalenkawla, SDEO Hnahthial ten thu a sawi bawk a ni.

- DIPR




(A hnuaia fakna hi lo hmet ve rawh.)

Post a Comment

0 Comments