BUNGRAW LAKLUH TIH TLEM

Editor, ZINGTIAN


Phailam atanga kan bungraw lakluh hi fimkhur a hun hle mai. Kan ramin a neih ve loh leh kan tharchhuah ve theih loh ho chauh hi a theih chin chinah lakluh theih ni se. Kan ram hruaitute pawhin helam zawng hian an ngaihtuahna seng se la a duhawm tak meuh a ni.




Tunah hian Covid vang pawh ni lem lo African Swan Flue avangin Vawk lakluh ngam a ni ta lo a, Ar erawhchu a phurtu Driver zingah Covid-19 positive an awm tak nawlhah chuan phurhluh zel chi a ni em? Tih hi ngaihtuahtham tak a ni ve thung. Mithiam te sawi dan chuan Rapid Antigen Test hian 50 % vel positive a hmu niin an sawi a, tuna hnamdang driver rawn lut mi 90 vel zet an hmuh chhuah aia tam fe hi RT-PCR hi hman ni se la positive hmuhchhuah an ni thei tihna a ni. PCR lah a result a chhuak har a, Vairengte daiah motor a din tam dawn lutuk avangin hman chi rual a ni si lo.


Tun aia kan him theihna awm chhun chu kan tharchhuah ve theih reng ho lakluh loh mai niin alang a, Oil, LPG, Buhfai leh Cement, Rod etc. te hi chu lakluh loh ngawt theih pawh a ni lo. Kan thar ve theih thlai hrang hrang erawh hi chu a tlem thei ang ber lakluh a, keimahni hian intodelh tura kan hmun neih ang ang hi kan hman a ngai tawh hle. 


Kan mithiam pensioner te pawh Political party lama luh a, Party Office lama hun hmang kual mai mai loa, an thiam leh finna te kan ram intodelh nana sawizawi duhna an neih a ngai hle a, thalai rual leng then mai mai te pawh an harh chhuah a hun ta hle.



Ar farm lian pui pui te hi kan mihausa hote hian siam intihhmuh se la, Vawk farm lian pui pui siam nan an pawisa te hi chiah puam ta se la, NLUP leh SEDP ringawt a innghat lovin kan ram hi kan siam thei ngei ang. A pawisa nei apiang maiin contract lei tur zawng a an tei hawi zel chuan kan ram hi a hniam zawngin kan kal zel ang.

Post a Comment

0 Comments