Aizawl | August 25, 2020: Mizo Zirlai Pawl (MZP) General Headquarters chuan vawiin khan executive committee thutkhawm pawimawh neiin tun hnaia Assam Rifles chet dan chungchang, School Education Department hnuaia online exam leh Mamit District Pukzing khaw ram chhunga Chakma khua VC pek an nih chungchang te an ngaihtuah.
August 15 tlai dar 4:00 vela Champhai district Sesih khua-a Mizo hmeichhia pahnih laka Assam Rifles duty-te chet dan chu MZP chuan an ngaihaw hle a hma lak ngei an tum. Assam Rifles duty te’n Mizo nula zah lo leh tham lo taka sum hmanga lei theih ang mai a, sum nena an thlem hnuah hmeichhe zahawmna tihbawrhban tuma an chetna chu Mizo hnam hmuhsitna leh diriamnaah MZP chuan an ngai a. Hetiang titute hi hremna na tak pek bakah Mizoram chhuahsan turin MZP chuan an phut a ni.
Tin, MZP chuan, tunhnaia Mizoram chhunga cheng a ram neitute tithlabar leh buaina siamtute Assam rifles thlavang hauh zawnga tawng leh hmala thin Mizo zingah an awm chu an dem tak zet a. Hnam thinlungpua, mahni hamthatna chiah ngaihtuah lo turin an hriattir a. Assam Rifles te chet dante hi Union Home Minister, Union Home Secretary leh Lt. General Anil Chauhan, General Officer, Commanding-in-chief Eastern Command hnehah thlen ngei an tum bawk niin MZP thuchhuah chuan a tarlang.
School Education department hnuaia school thenkhatah online exam kalpui tum an awm nia hriain, mumal taka zirna kalpui a nih hma leh zirtur chin ruahmanna siam a nih hma a, online exam kalpui tumna awm chu MZP chuan tha an ti lova, hmalak zui an rel bawk.
Mamit District chhunga Pukzing khaw ramchhunga Chakma te khaw din Mizoram sorkarin Village Council hran a pe leh a pawmpui chu MZP chuan pawi an ti a, Kan ram leh hnam himna zel tur atan leh thang leh thar lo awm zel tur te tan a kan ram neih chhun Mizoram zimte hi hnam dang tan phalrai tawh lo turin leh pe tawh lo turin sorkar an ngen nghal a. He khaw din pawh hi MZP chuan zirchian an tum a, thil dik lo leh fel lo an hmuhchhuah chuan MZP chuan na taka hma lak chhunzawm an tum bawk.
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: