ZAIMITE HUANG: C Vansanga

Chest voice ni chiah silo, pumpui lam aṭanga aw rawn khawchhuak nilo, aw thawl hek hawk a, hrawk bawr aṭanga rawn chhuak, sang veh vawh, octave sang ti mai teh ang, chutiang style a zai dan kalphung chikhat, hmeichhe awrawl level vela sang veh vawh a zaidan dangdai leh mawi tak, mipa ni tho si, hmeichhe aw level vela sanga zaidan mawi leh dangdai lunglenthlak leh mizo rilrem zawng ni tlat bawk si, mizote zinga ching chhuaktu leh mizo ṭhalai tam tak tihhmuhtu C Vansanga hi kum 1960 July ni-13 khan P Thansanga leh Vanngurliani te karah a lo piang a, a Pa P Thansanga pa hi Evan Hnema niin, Evan Hnema nupui chu Durtlang lal, Kristian khua Durtlanga dintu, M Suaka farnu a ni. M Suaka makpa Evan Hnema hi UPC kohhran dintu te zinga a meizanghlaptu ber, thusawi thiam hmingthang a ni.



C Vansanga Pa - P Thansanga hi indopui pahnihna laiin sipaiah ṭangin indo zawh hnuah indian postal deptt a zawm leh a. a pension thlengin a thawk ta a, chuvang chuan C Vansanga te unau ho hi Vairam, a bik takin, Assam khawpui Gawahati leh shillong-meghalayaah an sei lian vek a ni. An unau hi mipa 3 leh hmeichhia 3 anni a, C vansanga hi a tlum ber a ni. An upa ber CH Malsawma chu Shillong-Gawahati Radio artist lar tak niin hlaphuahthiam hmingthang a ni tel a, zaithiam hmingthang Lalnunmawia(Valtea) te nen inkawm chawt ṭhin an ni nghe nghe. a nau C Vansanga hla lar ber ber te hi CH Malsawma phuah an awm nual nghe nghe a ni.

Kum 1976-ah C Vansanga hian Shillonga Mizo modern High Schoolah Pawlriat a zirlaiin parents' day an hmannaah a u CH Malsawma hlaphuah "in ṭhen zai i rel lawng" tih chu parents'day programmeah chuan,  nu leh pa lo kal khawm leh zirlai hmaah a sa a, chumi ṭuma a fate an luh ve avanga kal ve Shillong Radio station announcer hna  thawk mek, mizo programme bika thu tak, Hlaphuahthiam hmingthang Pahlira Sena Chawngthu(PS Chawngthu)chuan  programme zawhah C Vansanga chu Bia-in, Radioa hla thun tura a tuk maia kal tur chuan a hrilh ta mai a.C Vansanga tan chuan a lawmawm teh ang chu chung hunlai chuan khawvel pumah Radio programme la hlut lai, Radio artist ngaihsan lai leh ngaih ropui lai.khawvel miten Radio an la ngaihthlak nasat em em lai a la ni si a.

Phur takin a tukah chuan C Vansanga leh a ṭhian te-Sena Gangte leh C Lalramsanga te chu Shillong Radio station lamah chuan ṭingṭang nen an in ak  bawr phei ta a ni.

Shillong Radio station an va thlen chuan chung hunlai a musician lar tak, ṭingṭang perhthiam, piono pawh tum thiam Hmingthanfala(IAS L-Tochhawngi nuṭapa)-- val-ke-a,... an tih mai chu lo awmin Radio Station a an lo chhawp sa, Piono chu lo tum ve tura sawmin a ni hian piono chu a lo tumsak ve ta bawk a ni.

C Vansanga rimawi khawvel zinkawng a zawh ṭanna atana a bung pawimawh leh bung  hmasa ber Shillong radio stationa hla a thun ṭuma  ṭawiawmtu/puibawmtu- Sena Gangte hi C Vansanga hlalar tak "Di inṭawm" tih phuahtu hi a ni a fam dairial a chang tawh a ni.

C Lalramsanga Shillong Radio Stationa Hla a thun hmasak ber ṭuma han ṭawiawm tu tho C Lalramsanga hian C Vansanga hla lar tak tak--1)in nghak zel ang 2)ka bawih mama 3) Di runah 4) Mangṭha mangṭha etc...te a phuah nghe nghe a ni. A ni pawh hian fam dairial a chang tawh a ni.

Hemi ṭuma C Vansanga hla thun, a u CH Malsawma hlaphuah a han thun te chu an lar ta vek nghe nghe a, he mi ṭum hian hla 3 an thun a ni.

C Vansanga hian Radio artist a nih hnuin kum 1979 shillong ṭhal favang kut mipa inzaisiaknaah lawmman pakhatna a lo la tawh bawk a ni.

C Vansanga Audio album siam hmasak ber chu Lelte nunnem tih a ni a. Album hi 12 a siam hman a, Album dang, Zama hlate tihah a zai bawk a, chu chu chhiar tel phei chuan album 13 vel a siam a tih theih a ni.


- C Lalṭhazuala (Bematuale)
Columnist, EXPLORE MIZORAM

Post a Comment

0 Comments