Sorkar thu puangzartute an tenau ta lutuk!

Khawvel nihphung inher danglam vang pawh a ni thei a, mi zawng zawngin News-man nih kan tum ta emaw tih mai tur a ni a, a bikin sorkar a lehkha pawimawh hrang hrangte a dawngtuin an dawn hma hmain mipuiah vawrh darh a ni a, an hre vek hman emaw tih mai tur a ni thin.

Khawl lar tak RT-PCR Khawl Lunglei DC office atanga Civil Hospital a dah tura Health Secretary Notification pawh Lunglei DC leh Civil Hospital a Medical Superintendent ten an hre hmasa tur niawm tak a ni a, an hriat hma hmain social media group hrang hrangah a awm hman.

Mipuiin engkim an hre vek zel emaw tih mai turin, sorkar lehkha ( a photocopy) hi social media-ah hian hmuh tur a awm cham chi ta mai a, hetianga a darh fo na chhan hi file khawihtuten a thla an laka an pek darh ni ngei thinin a lang a, Sorkar a langtlang a, a ṭhat viau laiin, kawng lehlamah chuan, buai lohna tura buaina siamtu pawh a ni thei.


Covid 19 kan buaipui mek lai pawh hian, covid case chungchang leh positive chungchangah te pawh, a hre hmasa tura ngaih zawkten social media atanga an hriat hmasak te a awm ta fo a, hengah pawh hian, a kaida deuh hi chu awm ngei tur a ni.

Sorkar hmasa hunlai khan PRISM in thuchhuah siama an tarlanah chuan, Parliamentary Secretary hoten Chief Minister leh Minister hote puan awm tur chi an puang nasa lutuk tiin an sawisel tawh a, tun dinhmunah chuan hei hi chu zia tak a ni a, tuna sorkar thu pawimawh puangzartute hi clerk ho an ni ta berin a lang.

Heti pheng phung hi chu, Sorkar tan pawh mualphona a tling a, a hnuaia hnathawkte hi mipui hriat tura thu puangzar vak vak lo turin, a khuahkhirh deuh hlek a.ngai tih a lang ta reng mai.

Sorkar hnathawkte hian hna a lak an nihna ang takin an hna thawk mai sela, thu puangzar kawngah hian engnge mawhphurhna an nei em? tih an hna nen in enfiah se a duhawm hle. Hemi rual chiah hian sorkar pawhin, mipuia thu darh thin tam tak hi khawi atanga darh nge a nih? thil pawi pang a thlen chuan, a mawhphurhtu chungah hremna lek tur a ni em? tihte hi ngaihtuah deuh se a duhawm ta khawp mai.

Confidential awm lo lutuk a, engkim mai lang nghal zung zung hi chu, sorkar tan mualphona a ni a, a hnathawkte a thunun thei lo tihna a ni.

- LUNGLEI TIMES editorial @ July 3, 2020

Post a Comment

0 Comments