Thla thum khaihlak hnuin Hripui leng kar-ah HSSLC Exam chhunzawm; Zirlai sang sarih-in exam hmachhawn dawn

Aizawl | July 1, 2020: COVID 19 hripui leng vanga March 23 atanga HSSLC Exam chawlhsan lailawk chu vawiin atang khan exam centre hrang hrang-ah chhunzawm leh a ni.


Subject hrang hranga zirlai exam tur hi an vaiin 7,026 an ni a, Economics - 2662,  Chemistry - 2277, Sociology - 1641, Computer Science - 184 leh Home Science subject exam tur zirlai 262 an awm bawk. Mahse, zirlai zingah hian subject pakhat aia tam exam tur an awm avangin zirlai exam hmachhawn tur tak tak erawh sangsarih an tling lo a ni.

 

Exam hi Mizoram chhunga HSSLC Exam Centre 79-ah neih a ni a. Subject la exam zawh loh - Economics, Chemistry, Sociology, Computer Science leh Home Science te exam chhunzawm leh tur a ni. Zirlai mahni centre pan thei lote tan Centre hnai leh pan awlsam berah exam tir an ni. Exam hi tunkar Zirtawpniah zawh fel a ni ang.

 

HSLC (Compartmental) Exam, 2020 pawh District headquarters 11-ah neih nghal a ni a, vawiin khan Theory paper exam a ni a, July ni 2-ah Practical tih leh nghal a ni ang. Tun tum Compartmental Exam atan hian zirlai 143 an awm a ni.

Covid-19 hripui laka zirlaite an him theih nan ruahmanna felfai leh tha tak buatsaih a ni a. Centre tam zawkah Exam Hall-a an luh hmain Thermal Screening neih hmasak vek a ni. Zirlai exam tur zawng zawngte facemask vuahtir an nih bakah kut silna leh hand sanitiser-te chhawpsak an ni a, naupangte pawh a inhlat thei ang berin thuttir an ni.

 

Exam turte hi an inthut hlat mai bakah an luh dawnin dam lohna an neih lh neih loh test a nih bakah mask an vuah vek bawk.

Zirlai pakhat chuan, "kan inhre thei mang lo" a ti. "Thian hnai pawh kan inko sual nawk hlawm mai," tiin a sawi bawk.

Post a Comment

0 Comments