Aizawl | July 1, 2020: Eastern Ladakh lamah India leh China sipaite nasa taka an inep mek laiin, northern Ladakh lamah Pakistan sipaite tun hnai te hian ram ri-ah an insingsa thar nasa hle a, India ram ri an rawn hnaih thar hle a, ni dang aiin hmuh tur an tam zual hle nia hriat a ni.
Chinese army te hian Pakistan ram chhunga rawlrala che țhin (terror groups) pawl țhenkhat pawh an be ngei nia hriat a ni. Pakistan hian sipai 20,000 lai tun hnai hian Northern Ladakh lamah a thiar luta hriat a ni bawk.
India leh Chinese army hotute ram ria sipaite inepna boruak sang leh țang lutuk ti dai tura an inbiak mek lai hian Northern Ladakh lamah boruak dang chhuak mai thei dinhmunah dingin Pakistan hian sipaite Gilgit-Baltistan area lamah a rawn chhek nasa hle nia hriat a ni. He tih mek lai hian Chinese sipaite hian Pakistan a bu khuar Al Badr te chu India ram chhung Jammu & Kashmir a buaina nasa zawk chawk chhuak turin an inbia niin India Today thu dawnna chuan a sawi.
India Today in thu a dawn dan chuan Pakistan hian India ep tura China sipai zat dawn lai sipai 20,000 Ladakh chhehvela sipai awmsa belh chhah turin a dah lut thar a ni.
Pakistan hian India chu hmun hnih (two front attacks) ațanga beih tum leh chumi tur chuan a inbuatsaih a ni. Hetiang a boruak thar hi awm mahse India sipai hotute leh Indian intelligence te chuan boruak ti dai tura inbiakna chungchang an sawi ho hia hriat a ni.
Pakistan ISI te chu Chinese thlazar hnuaia awmin India chawh buai dan an ruahman nasa hle a, tuna India ram ri kana buaina leh kawhmawh chi hrang hrang an bawl aia nasa zawk a kalpuia rawl rala che țhin (terrorist) te tha hrui tih chak a, India beihna chu tun aia vung zawka BAT (border action team) hiala beih an tum niin India Today thu dawnna chuan a sawi.
India chawh buai tumtu pawlte hian India ram chhungah "thil hlu tih chhiat" hmanga che turin an rel bawk nia hriat a ni a, heng thil kalpui tur hian Pakistan terrorist 100 chuang lai tunah hian Kashmir ah an awm sa nia hriat a ni bawk.
Hetiang boruak anih lai hian India ram chhungah hian Pakistan terrorist te hi an duh ang ngawt chuan an che thei hauh lo a, tun hnai mai pawh khan India sipaite hian Kashmir terrorist 120 zet an that a, a tam ber hi Kashmir tual chhung mi an ni a, Pakistan lam mi pawh engemaw zat an awm bawk.Pakistan hian a ruk a rala India ram chhung Jammu & Kashmir a sipai hmun beih thut an tum nia hriat a ni bawk.
Nimin Thawhlehni khan India leh Chinese sipai hotute chu darkar 10 chhung zet Corps Commander-level an inbia a, ram ri leh venbuk hrang hranga sipaite Eastern Ladakh-a inepna leh a tah tawla hnuh kir chungchang an sawi ho a, thu tawp leh inhnuhkir dan tur an rel a ni. (Thu tlukna leh thu tawp erawh an la zial thei lo niin a lang).
India ram aiawh te hian China in ram ri atan a rawn rin thar "new claim lines" chu an pawm thei lo a, a hmaa awm dan pangngai ang turin an nawr a, ram ri-a hma an rawn sawn tharna ațang chuan Chinese sipaite chu tawlh kir ngei turin an kar tlat thung a ni. Chinese sipaiten India ram chhunga ramri an rawn sawnna hi Galwan Valley, Pangong Tso leh hmun tam takah a ni.
Source:
India Today
July 01, 2020
@ 08:26 IST
====01==07==20=
- Huna Kawlvawm
Post a Comment
He post chungchanga i ngaihdan lo sawi ve rawh: