SPORTS MINISTER-IN SYNTHETIC HOCKEY TURF PHAHNA TUR LUNG A PHUM

Aizawl | July 29, 2020: Nimin khan Pu Robert Romawia Royte, Sports & Youth Services Minister chuan Muallungthu Hockey Phullem phahna tur lung a phum.

 

Sports Minister Pu Robert Romawia Royte New Education Policy siam mek angin sports leh physical exercise chu co-curricular activity (zirna peng khat) ni tawh lovin curriculum (zirna pangngai)-ah a tel tawh dawn, tiin, English, Mathematics subject te angin sports chu subject a ni chho tawh dawn a ni, a ti a. He ruahmanna thar avang hian Mizoram pawhin nasa takin sports infrastructure siam belh kawngah tan lak a tul a ni, a ti. Sports Department chuan Covid-19 avanga infiam theih loh lai hmang tangkaia MSSC-in field leh infiamna hmun tam tak cheithat leh siamthar hna a thawk chu a remhriatthlak hle a ni, a ti a. Hockey chu tunhma atanga Mizote thiam chi niin tunah pawh Nl. Lalremsiami leh Hockey thiam dangte avangin Mizote chu khawvel hriatah pholan mek kan ni a, FIH Rising Star of the Year Chawimawina Remsiami'n a dawng chu Mizo hnam ang pawha chhuan tham a ni, a ti.


Pu Robert Romawia Royte chuan Mizoram Sorkar leh mipuiin Covid-19 avangin sum kan mamawh a, Mizoram budget ei hek lova Sports & Youth Services Department-in hmasawnna rahbi a tuk chho mek hi a lawmawm a, Officer leh staff te an fakawm hle a ni, a ti a. Zirna, thiamthil (skill development) leh Sports-a hmasawnna tluantling a thlen theih nan sports school tha kan mamawh tih hriain Mizoram hmun 5-ah Residential Sports School 5 dinna turin ruahmanna siam a ni a, vanneihthlak takin Central Sorkarin Rs 16751.70 lakh lai a sanction a, 50% chu Sports Department-ah allocate tawh a ni, a ti a. Heng Academy-ah hian Zirna tha dawng chungin zirlaiten sports an zir tak tak dawn a ni a ti.

 

Pu C.Lalrosanga, Member of Parliament(Lok Sabha) pawhin thu sawiin, Model Village atana amah ngeiin a thlan khuaah model an nih tawhna nemnghet tura Muallungthu khuain Synthetic Hockey Turf an phah thei tur chu a lawmpui thu a sawi a. Mizoram State Sports Council Complex tihchangtlunna tur leh Muallungthu khawtlang hmasawnna tura theihtawpa hmalatu Bialtu MLA Prof. F. Lalnunmawia leh Sports Minister Pu Robert Romawia Royte chungah lawmthu a sawi. Muallungthu khawtlang pawh model village atana thlan an nih anga model hlawhtling an nih theih nan duhsakna a hlan a. Village Development Plan pawh Central lamah thlen tawh niin a hlawhtlin theih nan theihtawp a chhuah zui ang, tih a sawi.

Aizawl South III Bialtu MLA, Prof. F.Lalnunmawia pawhin, "Aizawl District-a hmasa ber tur, Synthetic Hockey Turf siamna tur lungphum phum a ni ta hi ka lawm takzet a. Hockey Turf phah a nih theih nana theihtawpa chaka hma latu Sports Minister Pu Robert Romawia Royte leh a thawhpuite chungah pawh bial leh Muallungthu khawtlang aiawhin lawmthu ka sawi a ni," a ti. COVID-19 hrileng avanga engmah ti lova thut tlawk tlawk hi Sawrkar chuan a tum lova, Chief Minister Pu Zoramthanga kaihhruai sawrkar chuan ram hmasawnna turin chawl lovin hna a thawk zel dawn a ni, a ti.

Pu C.Laltlanthanga, Secretary, MSSC-in technical report pein, he Hockey Ground hi Khelo India Scheme atanga sum hmuh cheng nuai 550 hmanga siam a ni a, state share ngai lovin 100% Central sorkar tum vek a ni, a ti a. Standard size, a dung 91 metres leh a vang 55 metres-a siam tur niin, Fencing, RCC Water Tanky, Water Sprinkler System leh Electric Water Pump te dah nghal vek tur a ni a. RCC Pavilion mi 100 leng, Changing room pahnih leh toilet pahnih siam tel tur a nih thu tar lan a ni.

Programme hi Pu H.Lalengmawia IAS, Seretary, SYS-in kaihruaiin Pu T.C. Pachhunga, Vice Chairman, S,YS&TD Board; Prof. F.Lalnunmawia, MLA Aizawl South-III leh Pu C.Lalrosanga, MP (Lok Sabha) te bakah official pawimawh dangte an tel a. Nl. Lalremsiami, FIH Rising Star of the Year chu Special Guest a ni bawk.

- DIPR




(A hnuaia fakna hi lo hmet ve rawh.)

Post a Comment

0 Comments